នាយករងទទួលបន្ទុកកិច្ចការតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃតស៍ វ៉ច្ឆ (Human Rights Watch) ចាត់ទុកលោក ហ៊ុន ម៉ាណែត ជាមេដឹកនាំគាបសង្កត់សិទ្ធិមនុស្សឆ្លងដែនថ្មីរបស់កម្ពុជា បន្ទាប់ពីនាយករដ្ឋមន្ត្រីខ្មែររូបនេះបានលើកសរសើរជាសាធារណៈដល់រដ្ឋាភិបាលថៃ ជុំវិញការចាប់ខ្លួនសកម្មជននយោបាយកម្ពុជាក្នុងទឹកដីថៃ កាលពីពេលថ្មីៗនេះ។
ប្រភពដដែលបញ្ជាក់ថា ទង្វើនេះបង្ហាញថា លោក ហ៊ុន ម៉ាណែត កំពុងតែធ្វើឱ្យកាន់តែសាហាវជាងឪពុករបស់គាត់ គឺលោក ហ៊ុន សែន។
នាយករងទទួលបន្ទុកកិច្ចការតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃតស៍ វ៉ច្ឆ (Human Rights Watch) លោក ហ្វីល រ៉ូបឺតសុន (Phil Robertson) បានចេញសេចក្តីថ្លែងការណ៍នៅលើទំព័រហ្វេសប៊ុករបស់លោកនៅថ្ងៃទី០៧ កុម្ភៈ នេះថា លោក ហ៊ុន ម៉ាណែត កំពុងព្យាយាមធ្វើឱ្យលើសពីឪពុករបស់គាត់ គឺលោក ហ៊ុន សែន ក្នុងការដឹកនាំបែបផ្ដាច់ការ និងការបំពានសិទ្ធិមនុស្សនៅក្នុងប្រទេសកម្ពុជា និងការបំពានសិទ្ធិមនុស្សឆ្លងដែន។
លោក ហ្វីល រ៉ូបឺតសុន (Phil Robertson) លើកឡើងថា តាមរយៈនៃការព្យាយាមលុបបំបាត់ក្រុមប្រឆាំងក្នុងប្រទេសកម្ពុជា និងក្នុងចំណោមប្រជាជនខ្មែរដែលរត់ភៀសខ្លួនទៅរស់នៅក្នុងដីថៃ នៅពេលនេះ គឺជារឿងគួរឱ្យអាម៉ាស់ជាទីបំផុតដែលរដ្ឋាភិបាលថៃថ្មី កំពុងរអិលធ្លាក់ចូលទៅក្នុងអំពើដ៏ឃោរឃៅនេះ ដោយការចាប់ខ្លួនជនភៀសខ្លួនកម្ពុជាដែលរត់ចេញពីការគ្រប់គ្រងដោយប្រើកណ្ដាប់ដៃដែករបស់នាយករដ្ឋមន្ត្រីកម្ពុជារហូតមកនោះ។
នាយករងទទួលបន្ទុកកិច្ចការតំបន់អាស៊ីនៃអង្គការឃ្លាំមើលសិទ្ធិមនុស្សរូបនេះបញ្ជាក់ថា ជនភៀសខ្លួនទាំងនេះគួរតែត្រូវបានដោះលែងភ្លាមៗ និងដោយគ្មានលក្ខខណ្ឌ ហើយនិងត្រូវបានអនុញ្ញាតឱ្យពួកគេស្វែងរកកន្លែងមានសុវត្ថិភាព និងត្រូវបានការពារនៅក្នុងប្រទេសទីបី ប្រសិនបើនោះគឺជាអ្វីដែលពួកគេចង់បាន។
លោក ហ្វីល រ៉ូបឺតសុន (Phil Robertson) សង្កត់ធ្ងន់ថា មេដឹកនាំរបស់ប្រទេសថៃ គួរតែទទួលស្គាល់ថា ការធ្វើជាអ្នកជិតខាងល្អ ក៏ត្រូវគិតគូរអំពីការលើកកម្ពស់សេរីភាព កម្ពស់មនុស្សជាតិដែរ មិនមែនត្រឹមតែការលើកកម្ពស់ពាណិជ្ជកម្ម ការវិនិយោគ និងការធ្វើកិច្ចព្រមព្រៀងឧស្ម័នធម្មជាតិប៉ុណ្ណោះទេ។
ការអះអាងនេះ ធ្វើឡើងបន្ទាប់ពីនាយករដ្ឋមន្ត្រីកម្ពុជាលោក ហ៊ុន ម៉ាណែត បានលើកសរសើរអាជ្ញាធរថៃ ជុំវិញការចាប់ខ្លួនសកម្មជននយោបាយបក្សប្រឆាំងដែលភៀសខ្លួនជ្រកកោនក្នុងទឹកដីថៃ កាលពីពេលថ្មីៗនេះ។
នាយករដ្ឋមន្ត្រីតត្រកូលនៅកម្ពុជាលោក ហ៊ុន ម៉ាណែត បានថ្លែងអំណរគុណដល់នាយករដ្ឋមន្ត្រីថៃ លោក ស្រេតថា ថាវីស៊ីន ក្នុងសន្និសីទសារព័ត៌មានរួមគ្នាមួយនៅថ្ងៃទី៧ ខែកុម្ភៈ ឆ្នាំ២០២៤ នេះថា លោកសូមអរគុណជាខ្លាំងដល់រដ្ឋាភិបាលថៃ ចំពោះការប្រឆាំងមិនអនុញ្ញាតឱ្យទឹកដីថៃ ត្រូវបានប្រើប្រាស់ក្នុងការធ្វើសកម្មភាពណាមួយដើម្បីលូកដៃជ្រៀតជ្រែកចូលកិច្ចការផ្ទៃក្នុងរបស់កម្ពុជា។
ចំណែកនាយករដ្ឋមន្ត្រីថៃ លោក ស្រេតថា ថាវីស៊ីន ក៏បានអះអាងក្នុងសន្និសីទសារព័ត៌មានរួមនោះដែរថា រដ្ឋាភិបាលថៃ នឹងមិនអនុញ្ញាតឱ្យមានការប្រព្រឹត្តសកម្មភាពគ្រោះថ្នាក់ប្រឆាំងនឹងប្រទេសជិតខាងឡើយ ហើយថា ថៃនឹងអនុវត្តច្បាប់របស់ប្រទេសយ៉ាងតឹងរ៉ឹង។
ជនភៀសខ្លួនខ្មែរដែលជាសកម្មជនបក្សប្រឆាំងលោក ផន ផាន់ណា លោក គង់ រ៉ៃយ៉ា និងលោក លឹម សុខា និងក្រុមគ្រួសាររបស់ពួកគេ ត្រូវបានអាជ្ញាធរថៃ ចាប់ខ្លួនកាលពីថ្ងៃទី២ ខែកុម្ភៈ ឆ្នាំ២០២៤ នេះ បន្ទាប់ពីសកម្មជននយោបាយទាំងនោះភៀសខ្លួនទៅរស់នៅប្រទេសថៃ ដើម្បីស្វែងរកសិទ្ធិជ្រកកោននយោបាយ ដោយសារបារម្ភអំពីការធ្វើទុក្ខបុកម្នេញពីនាយករដ្ឋមន្ត្រីខ្មែរនៅក្នុងប្រទេសកម្ពុជានាពេលកន្លងមក។
ជុំវិញបញ្ហានេះ ជនភៀសខ្លួនម្នាក់ក្នុងចំណោមជនភៀសខ្លួន ២នាក់ផ្សេងទៀត ឈ្មោះ គង់ រ៉ៃយ៉ា បានអះអាងថា ការចាប់ខ្លួនលោក និងសកម្មជន ២នាក់ទៀតនៅពេលនេះ គឺជា «ហេតុផលនយោបាយ» ដើម្បីទប់ស្កាត់ការតវ៉ាជុំវិញដំណើរទស្សនកិច្ចរបស់លោក ហ៊ុន ម៉ាណែត នៅប្រទេសថៃ។
ទិន្នន័យសង្គមស៊ីវិល បង្ហាញថា គិតត្រឹមចុងខែធ្នូ ឆ្នាំ២០២៣ កន្លងទៅ សកម្មជនសង្គម និងសកម្មជននយោបាយខ្មែរចំនួន ៧នាក់ហើយដែលជ្រកកោននៅប្រទេសថៃ ត្រូវបានអាជ្ញាធរថៃ ចាប់ខ្លួន និងឃុំខ្លួននោះ ដូចជា កញ្ញា អេង ម៉ាឡៃ ហៅ សូមេត្តា និងសាច់ញាតិរបស់កញ្ញា ជាដើម បើទោះបីជាពួកគេមានបណ្ណស្នាក់នៅបណ្ដោះអាសន្នក្នុងនាមជាជនភៀសខ្លួន ដែលចេញដោយឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សហើយ (UNHCR) ក៏ដោយ៕