មន្ត្រីជាន់ខ្ពស់គណបក្សភ្លើងទៀន បន្តទាមទារឲ្យក្រសួងមហាផ្ទៃ ចាត់វិធានការជាបន្ទាន់ក្នុងការផ្លាស់ប្ដូរសមាសភាពក្រុមប្រឹក្សាឃុំ-សង្កាត់របស់ខ្លួនដែលត្រូវបានបញ្ចប់សមាជិកភាព និងទៅចូលរួមជាមួយគណបក្សថ្មី ដើម្បីធានាមិនធ្វើឲ្យប៉ះពាល់ដល់អង្គបោះឆ្នោត និងលទ្ធផលនៃការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ នាថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ។
អគ្គលេខាធិការគណបក្សភ្លើងទៀន លោក លី សុធារ៉ាយុត្តិ បានប្រាប់សារព័ត៌មានក្នុងស្រុកថា គណបក្សភ្លើងទៀននៅតែជំរុញឲ្យក្រសួងមហាផ្ទៃ ប្រញាប់ផ្លាស់ប្ដូរសមាសភាពក្រុមប្រឹក្សាឃុំ-សង្កាត់ថ្មីតាមការស្នើសុំផ្លូវការរបស់គណបក្ស ដើម្បីធានានូវការបោះឆ្នោតមួយប្រកបដោយភាពត្រឹមត្រូវ សេរី និងស្មើភាពគ្នា ហើយមិនប៉ះពាល់ដល់អង្គបោះឆ្នោត និងលទ្ធផលនៃការបោះឆ្នោតអសកលខាងមុខ។
នៅថ្ងៃទី២២ ខែមករា កន្លងមក គណបក្សភ្លើងទៀនបានចេញសេចក្តីថ្លែងការណ៍មួយដោយអះអាងថា ស្ថាប័នមានសមត្ថកិច្ចមិនបានឆ្លើយតបរួសរាន់នឹងសំណើសុំផ្លាស់ប្ដូរសមាសភាពក្រុមប្រឹក្សាឃុំ-សង្កាត់ជាប់ឆ្នោតរបស់គណបក្សភ្លើងទៀន ដែលចេញទៅចូលរួមជាមួយគណបក្សផ្សេងនោះទេ។ គណបក្សភ្លើងទៀន សម្ដែងនូវការបារម្ភ និងខកចិត្តចំពោះការធ្វើឲ្យរាំងស្ទះក្នុងការផ្លាស់ប្ដូរ ឬដោះដូរនេះ។
តាមរយៈសេចក្តីថ្លែងការណ៍ដដែលបានលើកឡើងថា ទង្វើរបស់អាជ្ញាធរហាក់ដូចជាមានចេតនាក្នុងការបំបាក់ស្មារតីអង្គបោះឆ្នោតដែលជាសមាជិកក្រុមប្រឹក្សាឃុំ-សង្កាត់គណបក្សភ្លើងទៀន បំពានលើមាត្រា១៦ នៃច្បាប់ស្ដីពីការគ្រប់គ្រងរដ្ឋបាលឃុំ-សង្កាត់ និងមិនស្របតាមសេចក្តីណែនាំរបស់ក្រសួងមហាផ្ទៃ។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានប្រាប់សារព័ត៌មានក្នុងស្រុកថា ក្រសួងមហាផ្ទៃមិនទាន់ទទួលបានសំណើសុំផ្លាស់ប្ដូររបស់គណបក្សភ្លើងទៀននៅឡើយទេ។
សមាជិកក្រុមប្រឹក្សាឃុំ-សង្កាត់ចំនួន ៣២នាក់របស់គណបក្សភ្លើងទៀន ត្រូវបានគណបក្សស្នើសុំផ្លាស់ប្ដូរឈ្មោះដាក់អ្នកថ្មីជំនួសក្រុមប្រឹក្សាឃុំចាស់ ដោយសារតែសមាជិកក្រុមប្រឹក្សាចាស់ទទួលមរណភាព លាលែងពីតួនាទី អសកម្មការងារបម្រើម្ចាស់ឆ្នោត និងការចាកចេញពីគណបក្សនេះទៅចូលរួមជាមួយគណបក្សប្រជាជនកម្ពុជា។
គណបក្សភ្លើងទៀនមានក្រុមប្រឹក្សាឃុំ-សង្កាត់ជាប់ឆ្នោតរបស់ខ្លួនសរុបចំនួន ២១៩៨នាក់ ដោយសារតែគណបក្សនេះមិនមានសិទ្ធិចូលរួមបោះឆ្នោតព្រឹទ្ធសភានៅថ្ងៃទី២៥ ខែកុម្ភៈ ខាងមុខ គណបក្សភ្លើងទៀនបានជ្រើសរើសគណបក្សឆន្ទៈខ្មែរ ដែលនៅក្នុងសម្ព័ន្ធភាពជាមួយគ្នា ឲ្យឈរឈ្មោះប្រកួតប្រជែង។
ច្បាប់ស្ដីពីការគ្រប់គ្រងរដ្ឋបាលឃុំ-សង្កាត់មាត្រា៣៧ ចែងថា ការផ្លាស់ប្ដូរសមាសភាពក្រុមប្រឹក្សាឃុំ-សង្កាត់ត្រូវធ្វើឡើងដោយប្រកាសរបស់រដ្ឋមន្ត្រីក្រសួងមហាផ្ទៃ ក្នុងរយៈពេលយ៉ាងយូរ ១៤ថ្ងៃ។ សេចក្ដីប្រកាសក្រសួងមហាផ្ទៃ កំណត់ឱ្យអភិបាលខេត្ត-រាជធានី ត្រូវពិនិត្យសមាសភាពក្រុមប្រឹក្សាឃុំ-សង្កាត់នានាក្នុងរាជធានី-ខេត្តរបស់ខ្លួន។ ក្នុងករណីសមាជិកក្រុមប្រឹក្សាណាបាត់បង់សមាជិកភាព អភិបាលខេត្ត-រាជធានីត្រូវឱ្យសមាជិកក្រុមប្រឹក្សាឃុំ-សង្កាត់នោះលើកសំណើសុំប្ដូរជាបន្ទាន់។
ការបោះឆ្នោតសមាជិកព្រឹទ្ធសភា នឹងធ្វើឡើងនៅថ្ងៃទី២៥ ខែកុម្ភៈ ឆ្នាំ២០២៤ ដោយអង្គបោះឆ្នោតគឺជាតំណាងរាស្ត្រ និងក្រុមប្រឹក្សាឃុំ-សង្កាត់ទាំងអស់ក្នុងមុខតំណែង ដោយបោះឆ្នោតជ្រើសរើសសមាជិកព្រឹទ្ធសភាចំនួន ៥៨រូបក្នុងចំណោមសមាជិកសរុប ៦២នាក់។ បច្ចុប្បន្ន គណបក្សនយោបាយចំនួន៤ កំពុងបើកយុទ្ធនាការឃោសនា។
អតីតមេដឹកនាំបក្សប្រឆាំងលោក សម រង្ស៊ី ធ្លាប់បានអំពាវនាវឱ្យអង្គបោះឆ្នោតសម្រាប់ការបោះឆ្នោតព្រឹទ្ធសភានៅថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ នាំគ្នាទៅបោះឆ្នោតឱ្យគណបក្សភ្លើងទៀន គណបក្សកម្លាំងជាតិ និងគណបក្សឆន្ទៈខ្មែរ ដែលលោកចាត់ទុកថាជាគណបក្សដែលតំណាងឱ្យកម្លាំងប្រជាធិបតេយ្យនៅកម្ពុជានៅពេលនេះ ទើបអាចកម្ចាត់ការដឹកនាំបែបផ្ដាច់ការបានជោគជ័យ៕