គណៈកម្មាធិការបាត់ខ្លួនដោយបង្ខំនៃអង្គការសហប្រជាជាតិ ឬហៅថា UN Committee on Enforced Disappearances នឹងបើកសម័យប្រជុំលើកទី២៦ ដើម្បីពិនិត្យករណីបាត់ខ្លួននៅកម្ពុជា និងប្រទេសពីរទៀត ប៉ុន្តែពុំបានលម្អិតពីករណីបាត់ខ្លួននៅកម្ពុជានោះទេ ដែលក្រុមអ្នកការពារសិទ្ធិមនុស្សរំពឹងថា នឹងពិនិត្យលើករណីបាត់ខ្លួនសកម្មជនសិទ្ធិមនុស្សថៃ លោក វ៉ាន់ឆាឡឺម សាតស័ក្តិសិទ្ធ។
សេចក្ដីប្រកាសព័ត៌មានរបស់គណៈកម្មាធិការសិទ្ធិមនុស្សកម្ពុជា (CHRC) ចេញថ្ងៃទី១៧ ខែកុម្ភៈ បានឲ្យដឹងថា លោក កែវ សុទ្ធិ អនុប្រធានគណៈកម្មាធិការសិទ្ធិមនុស្សកម្ពុជាដឹកនាំក្រុមការងារចូលរួមកិច្ចប្រជុំពិនិត្យរបាយការណ៍លើកដំបូងអំពីការអនុវត្តនូវអនុសញ្ញាអន្តរជាតិស្ដីពីការការពារជនគ្រប់រូបពីការបាត់ខ្លួនដោយបង្ខំ នៅថ្ងៃទី១៩-២០ កុម្ភៈ នៅទីក្រុងហ្សឺណែវ ប្រទេសស្វីស។
សេចក្ដីប្រកាសព័ត៌មានដដែល បានឲ្យដឹងថា ភាគីកម្ពុជាមានឆន្ទៈមុតមាំក្នុងការលើកកម្ពស់សិទ្ធិមនុស្ស តាមរយៈការផ្ដល់សច្ចាប័ន និងការចូលជាសមាជិកកតិកាសញ្ញា និងអនុសញ្ញាសិទ្ធិមនុស្សអន្តរជាតិ ជាពិសេសការចូលជាសមាជិកនៃអនុសញ្ញាអន្តរជាតិស្ដីពីការការពារជនគ្រប់រូបពីការបាត់ខ្លួនដោយបង្ខំនៅឆ្នាំ២០១៣។ ក្នុងនាមជារដ្ឋភាគីនៃអនុសញ្ញាមួយនេះ គឺកម្ពុជាមានកាតព្វកិច្ចសរសេររបាយការណ៍ដាក់ជូនគណៈកម្មាធិការស្ដីពីការបាត់ខ្លួនដោយបង្ខំ។
អង្គការសហប្រជាជាតិទទួលបន្ទុកផ្នែកសិទ្ធិមនុស្ស ចេញសេចក្តីប្រកាសព័ត៌មានរបស់ខ្លួននៅថ្ងៃទី១៦ ខែកុម្ភៈ បានឲ្យដឹងថា គណៈកម្មាធិការប្រឆាំងការបាត់ខ្លួនដោយបង្ខំរបស់អង្គការសហប្រជាជាតិ នឹងបើកសម័យប្រជុំលើកទី២៦ របស់ខ្លួនចាប់ពីថ្ងៃទី១៩ ខែកុម្ភៈ ដល់ថ្ងៃទី១ ខែមីនា ឆ្នាំ២០២៤ នៅទីក្រុងហ្សឺណែវ ប្រទេសស្វីស ដើម្បីពិនិត្យករណីបាត់ខ្លួននៅកម្ពុជា និងករណីបាត់ខ្លួននៅប្រទេសចំនួនពីរទៀត គឺប្រទេសបូគីណា ហ្វាសូ (Burkina Faso) និងប្រទេសហុនឌុយរ៉ាស់ (Honduras)។
សេចក្តីប្រកាសព័ត៌មានដដែលមិនបានលម្អិតអំពីករណីបាត់ខ្លួននៅកម្ពុជានោះទេ ប៉ុន្តែអ្នកការពារសិទ្ធិមនុស្សជឿថា នៅក្នុងសម័យប្រជុំលើកទី២៦ នេះ អង្គការសហប្រជាជាតិ នឹងពិនិត្យលើករណីបាត់ខ្លួនសកម្មជនសិទ្ធិមនុស្សថៃ លោក វ៉ាន់ឆាឡឺម សាតស័ក្តិសិទ្ធ ដែលបានបាត់ខ្លួននៅកម្ពុជាកាលពីថ្ងៃទី៤ ខែមិថុនា ឆ្នាំ២០២០ បន្ទាប់ពីមានជនមួយក្រុមបានចាប់បង្ខំឲ្យចូលក្នុងរថយន្តមួយដឹកយកទៅបាត់ នៅមុខអគារខុនដូ មេគង្គ ហ្គាដីន ក្នុងខណ្ឌជ្រោយចង្វារ។
ប្រភពដដែលបញ្ជាក់ថា អ្នកជំនាញការអន្តរជាតិឯករាជ្យចំនួន ១០នាក់នៃគណៈកម្មាធិការប្រឆាំងការបាត់ខ្លួនដោយបង្ខំ នឹងពិនិត្យករណីបាត់ខ្លួននោះ ដោយអនុវត្តទៅតាមអនុសញ្ញា និងអនុសាសន៍ដែលបានផ្តល់ដោយគណៈកម្មាធិការក្នុងសម័យប្រជុំកាលពីឆ្នាំមុន។
គណៈកម្មាធិការនេះបានទទួលរបាយការណ៍ដែលបានដាក់ជូនដោយគណៈប្រតិភូមកពីបីប្រទេស គឺកម្ពុជា បូគីណា ហ្វាសូ និងហុនដូរ៉ាស់។ សម្រាប់ប្រទេសកម្ពុជា នឹងចាប់ផ្តើមប្រជុំមុនគេនៅថ្ងៃទី១៩ និងទី២០ ខែកុម្ភៈ នេះ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត បានប្រាប់សារព័ត៌មានក្នុងស្រុកថា គណៈកម្មាធិការបាត់ខ្លួនដោយបង្ខំនៃអង្គការសហប្រជាជាតិ នឹងលើកយកករណីបាត់ខ្លួនដោយបង្ខំតាមប្រទេសនីមួយៗដែលជារដ្ឋភាគីនៃអនុសញ្ញានេះ មកសួរដេញដោលគ្នា។ លោកបន្តថា ករណីប្រទេសកម្ពុជា ទំនងជាមានការលើកយកករណីបាត់ខ្លួនលោក វ៉ាន់ឆាឡឺម សាតស័ក្តិសិទ្ធ (Wanchalearm Satsaksit) ដែលជាសកម្មជនថៃ មកសាកសួរប្រតិភូកម្ពុជា ពីព្រោះកន្លងមក គណៈកម្មាធិការនេះធ្លាប់បានទទូចឱ្យកម្ពុជាផ្ដល់ព័ត៌មានលម្អិត និងស្រាវជ្រាវពីករណីលោក វ៉ាន់ឆាឡឺម ផងដែរ។
កាលពីរំឭកខួប ៣ឆ្នាំនៃការបាត់ខ្លួនសកម្មជនថៃអាវក្រហម កាលពីថ្ងៃទី៤ ខែមិថុនា ឆ្នាំ២០២៣ ក្រុមសកម្មជនចំនួន ២១នាក់ដែលពាក់ស្រោមមុខរូបលោក វ៉ាន់ឆាឡឺម នៅតែបន្តស្នើអាជ្ញាធរកម្ពុជាបន្តការស៊ើបអង្កេតពីការបាត់ខ្លួន និងផ្តល់យុត្តិធម៌នៅក្នុងករណីនេះ។
ក្រោយរដ្ឋប្រហារថ្ងៃទី២២ ខែឧសភា ឆ្នាំ២០១៤ ក្នុងប្រទេសថៃ លោក វ៉ាន់ឆាឡឺម បានភៀសខ្លួនទៅកាន់ប្រទេសឡាវ ហើយក្រោយមកបានធ្វើដំណើរមកកាន់ប្រទេសកម្ពុជា ដើម្បីគេចពីរឿងក្ដីក្ដាំក្រោមការចោទប្រកាន់ដោយរដ្ឋាភិបាលថៃ ទាក់ទងនឹងបទល្មើសប្រមាថព្រះមហាក្សត្រ និងបទឧក្រិដ្ឋតាមប្រព័ន្ធកុំព្យូទ័រ៕