នាយករដ្ឋមន្ត្រីបន្តពូជថ្មីលោក ហ៊ុន ម៉ាណែត ព្យាករថា តាមរយៈនៃការកំណត់យកការទូតសេដ្ឋកិច្ចជាគោលសម្រាប់រដ្ឋាភិបាលអាណត្តិទី៧ នេះ កម្ពុជានឹងក្លាយជាប្រទេសអ្នកមាននៅចុងឆ្នាំ២០៤០ ប្រសិនបើកម្ពុជាអាចកែទម្រង់ប្រព័ន្ធរដ្ឋបាល និងប្រព័ន្ធការងារដែលជាមូលដ្ឋានគ្រឹះរបស់ខ្លួនបានរឹងមាំក្នុងអាណត្តិទី១ នេះ។
លោក ហ៊ុន ម៉ាណែត លើកឡើងក្នុងពិធីសន្និបាតបូកសរុបការងាររបស់ក្រសួងឧស្សាហកម្ម វិទ្យាសាស្ត្រ កាលពីថ្ងៃទី២១ ខែកុម្ភៈ ថា គោលនយោបាយបញ្ចកោណ គឺមានកំណត់រយៈពេល ២៥ឆ្នាំ ដែលស្មើនឹង ២អាណត្តិ ដូច្នេះក្នុងអាណត្តិទី១ ដែលមានរយៈពេល ៥ឆ្នាំនេះ បើរដ្ឋាភិបាលអាចកែទម្រង់ប្រព័ន្ធរដ្ឋបាល និងប្រព័ន្ធការងារដែលជាមូលដ្ឋានគ្រឹះឱ្យរឹងមាំ នោះកម្ពុជានឹងក្លាយជាប្រទេសអ្នកមាននៅ ២០ឆ្នាំក្រោយជាមិនខាន។
លោក ហ៊ុន ម៉ាណែត លើកឡើងថា ក្រោយលោកឡើងកាន់តំណែងជានាយករដ្ឋមន្ត្រីជាង ៦ខែមកនេះ កម្ពុជាបានចាប់ផ្តើមប្រើនយោបាយការទូតសេដ្ឋកិច្ចជាគោល ព្រោះថាមេដឹកនាំប្រទេសណាក៏ធ្វើបែបនេះដែរ ខណៈកម្ពុជានៅពេលនេះបានចាប់យកវិស័យឯកជនធ្វើជាម៉ាស៊ីនសេដ្ឋកិច្ចរបស់ខ្លួនយ៉ាងច្បាស់លាស់ ក្នុងនោះសហគ្រាសធុនតូច និងមធ្យម ត្រូវដើរតួនាទីសំខាន់បំផុត។
នាយករដ្ឋមន្ត្រីកម្ពុជារូបនេះបញ្ជាក់ថា កម្ពុជាត្រូវតែរួមកម្លាំងគ្នាទាំងអស់ ទាំងសេដ្ឋកិច្ចក្នុងប្រព័ន្ធ និងសេដ្ឋកិច្ចក្រៅប្រព័ន្ធ ធ្វើយ៉ាងណាដើម្បីទាញយកផលប្រយោជន៍សេដ្ឋកិច្ចឱ្យបានគ្រប់ផ្នែក ដែលនេះគឺជាការកសាងមូលដ្ឋានដ៏រឹងមាំមួយរបស់កម្ពុជាទៅថ្ងៃអនាគត ប៉ុន្តែការចាប់ផ្តើមដំបូង គឺត្រូវចំណាយពេលយូរ ដូចជាការកសាងអគារដែលត្រូវចំណាយពេលចាក់គ្រឹះឱ្យរឹងមាំជាមុនដូច្នោះដែរ។
ការអះអាងនេះ ធ្វើឡើងស្របពេលដែលគេមើលឃើញថា រដ្ឋាភិបាលអាណត្តិថ្មីនេះមិនទាន់ដាក់ចេញផែនការអភិវឌ្ឍន៍ជាតិជាដុំកំភួននៅឡើយទេក្រោយដំណើរអស់រយៈពេលជាងកន្លះឆ្នាំមកនេះ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី២២ កុម្ភៈ នេះថា ឱ្យតែប្រទេសកម្ពុជាស្ថិតក្រោមការគ្រប់គ្រងពីត្រកូលហ៊ុន សូមកុំសង្ឃឹមថានឹងក្លាយជាប្រទេសស្មើមុខស្មើមាត់ ឬជាប្រទេសអ្នកមាន និងជាប្រទេសថ្លៃថ្នូរលើឆាកអន្តរជាតិឱ្យសោះ ហើយការលើកឡើងរបស់លោក ហ៊ុន ម៉ាណែត ក៏គ្រាន់តែជាការភូតកុហកពលរដ្ឋខ្មែរប៉ុណ្ណោះ ព្រោះថាឱ្យតែអំណាចដឹកនាំប្រទេសស្ថិតក្នុងរង្វង់គ្រួសារដូចត្រកូលហ៊ុនអនុវត្តសព្វថ្ងៃនេះ ទោះប្រទេសកម្ពុជាមានទ្រព្យសម្បត្តិ មានធនធានធម្មជាតិហូរហៀរបែបណា ក៏មិនអាចក្លាយជាប្រទេសអ្នកមានបានដែរ។
លោក គឹម សុខ លើកឡើងថា បើលោក ហ៊ុន ម៉ាណែត ពិតជាចង់ឱ្យប្រទេសកម្ពុជាក្លាយជាប្រទេសអ្នកមានពិតប្រាកដមែននោះ ការធ្វើកំណែទម្រង់ទី១ ដែលរដ្ឋាភិបាលរបស់គាត់ត្រូវធ្វើមុនគេ គឺធានាឱ្យបាននូវការគោរពសិទ្ធិមនុស្ស និងការស្ដារប្រជាធិបតេយ្យ។
លោកបន្ថែមថា ការទូតសេដ្ឋកិច្ចរបស់កម្ពុជា ពឹងផ្អែកយ៉ាងខ្លាំងទៅលើការធានាឱ្យបាននូវការគោរពសិទ្ធិមនុស្ស និងប្រជាធិបតេយ្យ ព្រោះថាប្រទេសនានាដែលចង់សហការវិនិយោគជាមួយកម្ពុជា គឺគេពិនិត្យមុនគេទៅលើប្រព័ន្ធដឹកនាំរបស់រដ្ឋាភិបាល ប៉ុន្តែបើប្រព័ន្ធដឹកនាំដូចគណបក្សប្រជាជនកម្ពុជារៀបចំសព្វថ្ងៃនេះ គ្មានបរទេសណាហ៊ានទៅបណ្ដាក់ទុនវិនិយោគនោះទេ។
អ្នកវិភាគរូបនេះបញ្ជាក់ថា ការធ្វើនយោបាយការទូតសេដ្ឋកិច្ចរបស់រដ្ឋាភិបាលថ្មីដែលដឹកនាំដោយលោក ហ៊ុន ម៉ាណែត ទំនងជាទៅមិនរួចទេ ព្រោះកេរ្តិ៍ឈ្មោះរបស់គាត់លើឆាកអន្តរជាតិបានស្អុយរលួយពេញពិភពលោកទៅហើយ បន្ទាប់ពីសារព័ត៌មានអន្តរជាតិដាក់បញ្ចូលឈ្មោះរបស់គាត់ទៅក្នុងចំណោមមេដឹកនាំ និងអ្នកជំនួញកខ្វក់កាលពីពេលកន្លងទៅនោះ ដូច្នេះអ្នកវិនិយោគល្អៗប្រាកដជាមិនហ៊ានទៅបោះទុនវិនិយោគនៅកម្ពុជានោះទេ។
លោក គឹម សុខ គូសបញ្ជាក់ថា វាជាហានិភ័យខ្លាំងណាស់សម្រាប់ពួកគេ នៅពេលដែលមេដឹកនាំខ្មែរត្រូវគេមើលឃើញថាជាមេដឹកនាំដែលរំលោភច្បាប់ និងប្រើប្រាស់អំណាចតាមអំពើចិត្តដូចលោក ហ៊ុន សែន និងលោក ហ៊ុន ម៉ាណែត ប្រព្រឹត្តសព្វថ្ងៃនេះ៕