សភានៃប្រទេសហុងគ្រី បានផ្ដល់សច្ចាប័នឱ្យប្រទេសស៊ុយអែត ក្លាយជាសមាជិកទី៣២ របស់អង្គការណាតូ ហើយ។
សារព័ត៌មាន The Guardian បានឱ្យដឹងថា ការបោះឆ្នោតមានសំឡេង ១៨៨ ជាសំឡេងគាំទ្រ និង ៦សំឡេងប៉ុណ្ណោះជាសំឡេងជំទាស់។ ដោយសំឡេងគាំទ្រមានភាពលើសលប់នេះហើយ បានធ្វើឱ្យស៊ុយអែត ដើរដល់គោលដៅរបស់ខ្លួនទៅរកភាពជាសមាជិករបស់អង្គការណាតូ មែន។
រដ្ឋាភិបាលនៃនាយករដ្ឋមន្ត្រីហុងគ្រី វិចទ័រ អូបាន (Viktor Orbán) បានដាក់សំណើឱ្យស៊ុយអែត ជាសមាជិកណាតូ ទៅកាន់សភា គឺក្រោមសម្ពាធទាំងខ្លួនមិនចង់។
ការដាក់សំណើតាំងពីខែកក្កដា ឆ្នាំ២០២២ តែពន្យារពេលរហូតដល់នាយករដ្ឋមន្ត្រីស៊ុយអែត ធ្វើដំណើរទៅកាន់ប្រទេសហុងគ្រី ជួបនឹងសមភាគីនេះ ទើបទីបំផុត សភានៃប្រទេសហុងគ្រី រួមនឹងសភាបក្សប្រឆាំងបានសម្រេចលទ្ធផលដូចថ្ងៃចន្ទសប្ដាហ៍នេះ។
ឥឡូវនេះ ប្រទេសដែលមានព្រំដែនជាប់នឹងរុស្ស៊ី ចំនួនពីរទៀតបានរួមសម្ព័ន្ធមិត្តនឹងអង្គការណាតូ ហើយ មានន័យថា សង្គ្រាមរុស្ស៊ីឈ្លានពានអ៊ុយក្រែន បានហុចផលឱ្យណាតូ ពង្រីកសមាជិកភាពរបស់ខ្លួនបានកាន់តែច្រើនឡើងនៅទ្វីបអឺរ៉ុប តំបន់អាត្លង់ទិចខាងជើង។
តាមនីតិវិធី ការសម្រេចឱ្យប្រទេសណាមួយជាសមាជិករបស់អង្គការណាតូ គឺត្រូវការសំឡេងកុងសង់ស៊ីស គឺមានន័យថា មិនអាចមានសំឡេងជំទាស់ពីប្រទេសណាមួយទេ ហើយត្រូវប្រទេសនីមួយៗធ្វើការបោះឆ្នោតក្នុងសភាជាតិរបស់ពួកគេ។
កន្លងមក ប្រទេសហុងគ្រី និងតួកគី តែងតែជំទាស់នឹងស៊ុយអែត ដោយមូលហេតុសន្តិសុខនៅឆាកណាតូ។ នាយករដ្ឋមន្ត្រីនៃប្រទេសស៊ុយអែត អូទ្រីស ជឺសុន បានថ្លែងថា ស៊ុយអែតបានសម្រេចបោះបង់ចោលអព្យាក្រឹតភាពយោធាដោយមើលឃើញករណីសង្គ្រាមប្រទេសធំបំពានប្រទេសតូច ដែលលោកទំនងសំដៅទៅកាន់រុស្ស៊ី យ៉ាងច្បាស់។
នាយករដ្ឋមន្ត្រីរូបនេះថ្លែងនៅទីក្រុងស្ដុកខម ដោយថានេះជាជំហានប្រវត្តិសាស្ដ្រដែលប្រទេសយើងបានក្លាយជាសមាជិកអង្គការយោធា ហើយយើងដើរចេញពីគោលនយោបាយពីរសតវត្សរបស់យើង។
លោកបញ្ជាក់ថា ស៊ុយអែតក្លាយជាសមាជិកណាតូ កម្លាំងទ័ពកាន់តែធំ គឺទ័ពណាតូនៅពីក្រោយស៊ុយអែត ហើយស៊ុយអែត នឹងមានការការពារសេរីភាព។ មិនខុសគ្នានោះទេ អគ្គលេខាធិការអង្គការណាតូ បានអបអរសាទរករណីនេះ ហើយថាហុងគ្រី ពិតជាទទួលស្គាល់អំពីការប្រែប្រួលប្រវត្តិសាស្ត្រ និងព្រំដែនណាតូ។
លោកសរសើរដល់ប្រទេសស៊ុយអែត ថាជាប្រទេសមានសក្ដានុពលយោធា ដូច្នេះស៊ុយអែត នឹងធ្វើឱ្យណាតូកាន់តែខ្លាំង ដោយស៊ុយអែត ជាប្រទេសផលិតអាវុធខ្លួនឯងបានទៀតនោះ។
តែយ៉ាងណា នាយករដ្ឋមន្ត្រីហុងគ្រី ដែលគេថាដើរដល់ក្រឡាទាល់ច្រក ទើបអនុម័តឱ្យស៊ុយអែត ជាសមាជិកណាតូ គឺបុរសដែលមាននិន្នាការស្និទ្ធនឹងរុស្ស៊ី នេះ នៅតែនិយាយថា ប្រទេសនៅអឺរ៉ុបហាក់បីដូចជានៅតែរុញឱ្យមានភ្លើងសង្គ្រាមកាន់តែខ្លាំងឡើង។
លោកបញ្ជាក់ថា ហុងគ្រីមានការអនុគ្រោះធំធេងពេកហើយសម្រាប់ស៊ុយអែត ហុងគ្រីជាប្រទេសមានអធិបតេយ្យភាពរបស់ខ្លួន ហុងគ្រីមិនអត់ឱនបានទេចំពោះប្រទេសណាឈ្លានពានប្រទេសរបស់លោក។ គេមិនដឹងថា លោកចង់សំដៅទៅកាន់ប្រទេសណានោះទេ ខណៈតាមធម្មនុញ្ញណាតូ គ្មានករណីអាចសមាជិកឈ្លានពានប្រទេសខ្លួនឯងនោះទេ បើមានបញ្ហា គឺត្រូវដោះស្រាយក្នុងអង្គការណាតូ។
យោងតាមមាត្រា៥ នៃអង្គការនេះ មានតែប្រទេសណាឈ្លានពានប្រទេសសមាជិកណាតូ គឺនឹងមានកម្លាំងរួមក្នុងការទប់ទល់ទៅវិញទេ។ ឯកអគ្គរដ្ឋទូតជាច្រើននៃប្រទេសណាតូ នៅតែមើលឃើញថា ហុងគ្រីប្រឹងធ្វើខ្លួនជាឧបសគ្គរបស់ណាតូ និងអឺរ៉ុប។
អ្វីដែលសំខាន់នោះគេដឹងថា ប្រធានាធិបតីអាមេរិក លោក ចូ បៃដិន បានគំរាមទៅកាន់ប្រទេសហុងគ្រី។ លោក បៃដិន ថា ប្រទេសដល់ទៅ ៣១ជាសមាជិកណាតូ គេបោះឆ្នោតឱ្យស៊ុយអែត ក្លាយជាសមាជិកអង្គការនេះហើយ គឺមិនត្រូវប្រទេសមួយធ្វើខ្លួនជាឧបសគ្គនោះទេ។ ដូចនេះ លោកសង្ឃឹមថា សភាហុងគ្រី នឹងមិនបង្អង់ទៀតនោះទេឱ្យស៊ុយអែត បានចូលជាសមាជិកអង្គការនេះ។
គេដឹងថា តួកគី ទេជាប្រទេសមានរឿងក្ដីជំទាស់នឹងណាតូ តែប្រទេសនេះនៅតែអាចសម្រេចការឱ្យស៊ុយអែត ចូលជាសមាជិកបានកាលពីខែមករា។
អ្វីដែលសំខាន់ ប្រធានាធិបតីនៃប្រទេសតួកគី នេះ បានជជែកពីការដោះដូរយន្តហោះចម្បាំង F-16 ជាច្រើនគ្រឿងក្នុងពេលទន្ទឹមគ្នានឹងសភាត្រូវអនុម័តឱ្យស៊ុយអែត ជាសមាជិកណាតូ នោះ៕