នាយករដ្ឋមន្ត្រី ហ៊ុន ម៉ាណែត នៅថ្ងៃពុធ ទី១៣ ខែមីនា នេះ ដាក់បញ្ជាឲ្យក្រសួងសុខាភិបាល បន្តយកចិត្តទុកដាក់ផ្តល់សេវាថែទាំសុខភាពជូនប្រជាពលរដ្ឋ ព្រោះជាវិស័យអាទិភាពនៃរាជរដ្ឋាភិបាលនីតិកាលថ្មី ដែលបានសន្យាក្នុងការបោះឆ្នោតកន្លងមក។
ថ្លែងក្នុងពិធីសម្ពោធដាក់ឲ្យប្រើប្រាស់មន្ទីរពេទ្យតេជោសែនកោះធំ ក្នុងខេត្តកណ្តាល លោក ហ៊ុន ម៉ាណែត ថាវិស័យសុខាភិបាលត្រូវបានប្រមុខរដ្ឋាភិបាលចាត់ទុកថាជាវិស័យអាទិភាព ដើម្បីថែទាំសុខមាលភាពប្រជាពលរដ្ឋ។ លោក ហ៊ុន ម៉ាណែត ថាគណបក្សប្រជាជនកម្ពុជាដែលឈ្នះការបោះឆ្នោត គឺបានអនុវត្ត និងកំពុងបន្តអនុវត្តគោលនយោបាយជាតិដោយគ្មានការភូតកុហកនោះឡើយ។
លោក ហ៊ុន ម៉ាណែត លើកឡើងបន្តទៀតថា ការលើកកម្ពស់សុខមាលភាពប្រជាពលរដ្ឋ គឺជានយោបាយអាទិភាពមួយនៃរាជរដ្ឋាភិបាលនីតិកាលថ្មី។ ការផ្តល់សេវាសុខភាពល្អទៅបាន គឺអាស្រ័យទៅលើមន្ទីរពេទ្យ និងគុណភាពគ្រូពេទ្យនៅគ្រប់ជាន់ថ្នាក់។
ប្រភពដដែលបានអះអាងថា ពលរដ្ឋខ្មែរដែលទៅព្យាបាលនៅក្រៅប្រទេសមានចំនួនតិចតួចប៉ុណ្ណោះ ប៉ុន្តែប្រជាពលរដ្ឋខ្មែរបានជ្រើសរើសការព្យាបាលជាមួយមន្ទីរពេទ្យក្នុងស្រុកមានចំនួនរាប់លាននាក់។
ត្រង់ចំណុចនេះ ជាការនិយាយលាក់ការពិតខ្លះដែរ។ អ្នកតាមដានខ្មែរបានមើលឃើញនឹងភ្នែកអំពីចំនួនប្រជាពលរដ្ឋខ្មែរ ទាំងមានស្តុកស្តម្ភ អ្នកមានមធ្យម អ្នកក្រ បានទៅរកការព្យាបាលនៅប្រទេសថៃឡង់ដ៍ ក្នុងមួយថ្ងៃៗរាប់ពាន់នាក់ ទាំងតាមមន្ទីរពេទ្យធំៗនៅក្រុងបាងកក ទាំងមន្ទីរពេទ្យថ្នាក់ខេត្តតាមខេត្តមួយចំនួន។ ពលរដ្ឋខ្មែរទាំងនោះនិយាយប្រាប់ថា គាត់មិនហ៊ានទៅមើលខ្លួននៅប្រទេសយៀកណាម ទេ ពីព្រោះគេព្យាបាលតាមវិធីឲ្យថ្នាំពន្យារពេលជញ្ជក់យកប្រាក់។ រីឯពេទ្យស្រុកខ្មែរវិញ គាត់ថាគេសួររកលុយមុន បើអត់លុយ ក៏អត់មានថ្នាំដែរ។ បុគ្គលិកក៏ប្រើសម្ដីគំរោះគំរើយ គ្មានការគួរសមទៀត។ ចំពោះអ្នកមានទ្រព្យ បើឈឺល្មមៗ គេរកពេទ្យឯកជននៅក្នុងស្រុក។ ពលរដ្ឋដែលទ្រាំព្យាបាលនៅក្នុងពេទ្យរដ្ឋស្រុកខ្មែរ គឺព្រោះតែគាត់ទ័លក្រ គ្មានមធ្យោបាយទៅរកការព្យាបាលឯណាបាន ពោលគឺគ្មានជម្រើស។
ក្រុមអ្នកឃ្លាំមើលសង្គមបានកត់សម្គាល់ទៀតថា ប្រជាពលរដ្ឋមួយចំនួនបានបង្ហាញពីក្តីកង្វល់អំពីគុណភាពព្យាបាលក្នុងស្រុក ដោយអ្នកមានលទ្ធភាពមួយចំនួនជ្រើសយកសេវាថែទាំ និងត្រួតពិនិត្យសុខភាពនៅក្រៅប្រទេស។ ពលរដ្ឋខ្មែរដែលទៅរកសេវាព្យាបាលនៅក្រៅប្រទេស ដោយសារតែគ្មានការជឿជាក់លើការព្យាបាលនៅក្នុងស្រុក ជាហេតុធ្វើឲ្យសេដ្ឋកិច្ចប្រទេសគេកាន់តែរីកចម្រើនព្រោះពលរដ្ឋខ្មែរយកលុយទៅចាយនៅទីនោះ។
ប្រភពដដែលបានអះអាងថា រាជរដ្ឋាភិបាលប្រទេសកម្ពុជា គួរតែកែប្រែវិស័យសុខភាពសាធារណៈ និងពង្រឹងក្រមសីលធម៌ចំពោះបុគ្គលិកសុខាភិបាលឲ្យល្អថែមទៀត ព្រោះមានពលរដ្ឋច្រើនរិះគន់លើប្រព័ន្ធព្យាបាលសុខភាពដោយបុគ្គលិកពេទ្យ ដែលប្រើអាកប្បកិរិយាមិនល្អ កន្លែងខ្លះគុណភាពព្យាបាលក៏មិនទាន់ប្រសើរ សូម្បីតែមន្ត្រីរាជការភាគច្រើនដែលត្រូវការសេវាសុខភាព តែងរត់ទៅរកគ្រូពេទ្យបរទេស។
ក្រុមអ្នកឃ្លាំមើលសង្គមបានលើកឡើងថា ថ្នាក់ដឹកនាំ និងក្រុមមន្ត្រីជាន់ខ្ពស់រដ្ឋាភិបាលហាក់នៅតែមិនមានជំនឿលើប្រព័ន្ធសុខាភិបាលក្នុងស្រុក ដោយពួកគេបន្តជ្រើសរើសទៅពិនិត្យសុខភាព និងព្យាបាលជំងឺធ្ងន់ស្រាល ឬការសម្រាលកូននៅក្រៅប្រទេស។ មន្ត្រីរដ្ឋាភិបាលគួរធ្វើគំរូដើម្បីឱ្យពលរដ្ឋងាកមកទទួលសេវាព្យាបាលនៅក្នុងស្រុក។
ប្រភពដដែលបានលើកឡើងថា គ្រូពេទ្យមួយចំនួនគិតលុយធំជាងការជួយសង្គ្រោះជីវិតមនុស្ស គ្រូពេទ្យមួយចំនួនប្រើប្រាស់ពាក្យសម្ដីគ្មានសីលធម៌ ឱសថខ្វះគុណភាព ឬឱសថក្លែងក្លាយនៅតែត្រូវបាននាំចូល និងនៅតាមមន្ទីរពេទ្យរដ្ឋខ្លះ ប្រើប្រាស់គ្រូពេទ្យមិនទាន់មានជំនាញច្បាស់លាស់ ព្យាបាលធ្វើឱ្យអ្នកជំងឺគ្រោះថ្នាក់ ជាដើម។
កាលពីពីប្រមាណជាងមួយទសវត្សមុន មានរឿងអាស្រូវកើតឡើងនៅមន្ទីរពេទ្យព្រះកេតុមាលា ដោយសារមានគ្រូពេទ្យពីប្រទេសចិន មកវះកាត់ធ្វើពិសោធលើអ្នកជំងឺខ្មែរ ហើយមានអ្នកបាត់ក្រលៀនដោយមិនដឹងខ្លួន។
អតីតនាយករដ្ឋមន្ត្រី ហ៊ុន សែន ធ្លាប់ព្រមានគ្រូពេទ្យថានឹងដកចេញពីមុខតំណែងដែរ បើសិនជាមិនយកចិត្តទុកដាក់ព្យាបាលប្រជាពលរដ្ឋដិតដល់តាមវិជ្ជាជីវៈ ប៉ុន្តែលោកមានប្រសាសន៍ឲ្យឮៗប៉ុណ្ណោះ គ្មានដែលចាត់វិធានការដូចលោកប្រកាសនោះទេ។
ពាក់ព័ន្ធរឿងនេះដែរ អ្នកជំនាញផ្នែកសុខភាព លោកវេជ្ជបណ្ឌិត គួច ម៉េងលី ធ្លាប់ប្រាប់សារព័ត៌មានក្នុងស្រុកកន្លងមកថា មូលហេតុដែលមន្ទីរពេទ្យនៅប្រទេសជិតខាងនៅតែស្រូបទាញអ្នកជំងឺពីកម្ពុជា គឺដោយសារគ្រូពេទ្យនៅក្រៅប្រទេសផ្ដល់សេវាកម្មបែបទន់ភ្លន់ រួសរាយ ប្រើប្រាស់សម្ភារៈទំនើប មានអនាម័យ រួមទាំងមានបច្ចេកទេសព្យាបាលច្បាស់លាស់ទៀតផង។
លោកយល់ឃើញថា ដើម្បីឱ្យការព្យាបាលនៅក្នុងស្រុកមានជំនឿទុកចិត្តពីពលរដ្ឋ គឺត្រូវការពេលច្រើនបន្ថែមទៀត ទាំងការអប់រំ និងការសាងសង់ឱ្យមានហេដ្ឋារចនាសម្ព័ន្ធ ឬមន្ទីរពេទ្យដែលមានបំពាក់ឧបករណ៍ទំនើប៕