តុលាការខេត្តព្រះវិហារ សម្រេចចោទប្រកាន់ និងឃុំខ្លួនប្រជាពលរដ្ឋចំនួន ២៩នាក់ដែលរស់នៅក្នុងភូមិម្រេច និងភូមិក្តាក់ ឃុំស្រយង់ ស្រុកគូលែន ដាក់ពន្ធនាគារពីបទ «កាន់កាប់ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃ» បន្ទាប់ពីពួកគេបានរារាំងអាជ្ញាធរមិនឲ្យឈូសឆាយផ្ទះសម្បែងរបស់ពួកគេ។
អ្នកនាំពាក្យសាលាដំបូងខេត្តព្រះវិហារ បានប្រាប់សារព័ត៌មានក្នុងស្រុកថា តុលាការខេត្តព្រះវិហារ សម្រេចចោទប្រកាន់ពលរដ្ឋទាំងនោះពីបទ «កាន់កាប់ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃ» ហើយបច្ចុប្បន្ននេះ ពួកគេត្រូវបានឃុំខ្លួនក្នុងពន្ធនាគារដោយរង់ចាំចៅក្រមស៊ើបសួរបើកការស៊ើបអង្កេតបន្ថែម។
អ្នកនាំពាក្យសាលាដំបូងខេត្តព្រះវិហារ លោក ណុប វុធ្ធី បានថ្លែងឲ្យដឹងនៅក្នុងសន្និសីទកាសែតថា ក្រុមប្រជាពលរដ្ឋទាំងនោះជាក្រុមអនាធិបតេយ្យចូលទៅកាន់កាប់ដីរដ្ឋដោយខុសច្បាប់ និងចង់យកដីនោះធ្វើជាតំបន់បំបែកខ្លួនប្រឆាំងនឹងអាជ្ញាធរដែលចុះអនុវត្តច្បាប់ ហើយដីនោះគឺជាដីរបស់រដ្ឋដែលបានចុះបញ្ជីរួចនៅក្នុងដីសម្បទានសេដ្ឋកិច្ចរបស់ក្រុមហ៊ុន សីលាដាម៉ិច។
កាលពីថ្ងៃទី៦ ខែមីនា ឆ្នាំ២០២៤ អាជ្ញាធរខេត្ត និងអាជ្ញាធរស្រុកគូលែន នៃខេត្តព្រះវិហារ ចាប់ឃុំខ្លួនប្រជាពលរដ្ឋប្រមាណជា ៣០នាក់នៅស្នងការដ្ឋាននគរបាលខេត្ត បន្ទាប់ពីចុះបង្ក្រាបដោយដុតបំផ្លាញផ្ទះសម្បែង និងឈូសឆាយបំផ្លាញដំណាំរបស់ប្រជាពលរដ្ឋក្នុងភូមិម្រេច និងភូមិក្តាក់ ឃុំស្រយង់ ស្រុកគូលែន។
ប្រជាពលរដ្ឋក្នុងភូមិម្រេច ឃុំស្រយង់ ប្រាប់សារព័ត៌មាន The Cambodia Daily ថា ពួកគាត់បានទៅរស់នៅលើដីនោះអស់រយៈពេលជាង ១០ឆ្នាំមកហើយ ខណៈក្រុមហ៊ុន សីលាដាម៉ិច មកអភិវឌ្ឍនៅតំបន់ភ្នំម្រេច នេះក្រោយពលរដ្ឋមករស់នៅ និងអាស្រ័យផលនោះទេ ប៉ុន្តែបន្ទាប់ពីក្រុមហ៊ុននេះបានទៅកាន់កាប់តំបន់នោះ ស្រាប់តែមន្ទីរបរិស្ថានខេត្តព្រះវិហារ ក៏ចុះទៅគ្រប់គ្រងតំបន់នោះដំណាលគ្នាដែរ ក្រោយមក ពួកគេក៏សហការគ្នាដេញប្រជាពលរដ្ឋដែលរស់នៅតំបន់នោះតែម្តង។
ប្រជាពលរដ្ឋខាងលើបញ្ជាក់ថា ក្រុមហ៊ុន សីលាដាម៉ិច បានផ្អាកសកម្មភាពអភិវឌ្ឍន៍នៅតំបន់នោះតាំងពីឆ្នាំ២០១៧ មកម្ល៉េះ បន្ទាប់ពីក្រុមហ៊ុននេះបានកាប់ឈើក្នុងតំបន់នោះលក់អស់គ្មានសល់ ប៉ុន្តែក្រោយមក ក្រុមហ៊ុនបានដាំដើមកៅស៊ូបានប្រហែល ១០ហិកតា ខណៈដីដែលនៅទំនេរក៏បានជួលឱ្យពលរដ្ឋតម្លៃ ១លានរៀលក្នុង ១ឆ្នាំលើទំហំផ្ទៃដី ១ហិកតា។
ប្រជាពលរដ្ឋចំនួន ១៣១គ្រួសារ ដែលបានកាន់កាប់ដីទំហំ ៦៤៩ហិកតានៅភូមិក្ដាក់ ឃុំត្បែងពីរ និងភូមិម្រេច ភូមិស្រយង់ត្បូង ឃុំស្រយង់ ស្រុកគូលែន ខេត្តព្រះវិហារ តាំងពីឆ្នាំ១៩៧៩ និងឆ្នាំ២០១២ បាននាំគ្នាដាក់ញត្តិទៅកាន់ស្ថាប័នពាក់ព័ន្ធជាបន្តបន្ទាប់ ដើម្បីស្នើសុំអន្តរាគមន៍ ដូចជា ស្ថាប័នរដ្ឋសភាកម្ពុជា ក្រសួងមហាផ្ទៃ និងខុទ្ទកាល័យនាយករដ្ឋមន្ត្រី ជាដើម ដើម្បីសុំឱ្យស្ថាប័នទាំងនេះជួយធ្វើអន្តរាគមន៍ទៅរដ្ឋបាលខេត្តព្រះវិហារ ដោះស្រាយវិវាទដីធ្លីជូនពួកគាត់ និងបញ្ឈប់ការបណ្ដេញពួកគាត់ចេញពីលំនៅឋានបន្តទៀត។
តាមឯកសារចុះបញ្ជី ក្រុមហ៊ុន សីលាដាម៉ិច ជាក្រុមហ៊ុនស្រាវជ្រាវអភិវឌ្ឍន៍មានទីស្នាក់ការនៅក្រុងភ្នំពេញ ចុះបញ្ជីនៅឆ្នាំ២០០៨ មានប្រធានក្រុមប្រឹក្សាភិបាលស្ត្រីឈ្មោះ អ៊ុក ហេឡែន និងបុរសឈ្មោះ សំណាង សីមា មាននាយកឈ្មោះ អ៊ុក សុភ័គ។ ក្រុមហ៊ុននេះមានអ្នកចូលភាគហ៊ុនឈ្មោះ ដួង វ៉ារី, គង់ ចាន់, ប៉ាន់ គឹមសាន, សំណាង ផល្លា, សំណាង ធីតា, សំណាង សីមា, ទេព សំអាន និង ម៉ី វ៉ាន់ធា៕