លោក ហ៊ុន ម៉ាណែត ស្នើឲ្យនិស្សិតពេទ្យកុំសុំជាប់ក្របខ័ណ្ឌជាមន្ត្រីសុខាភិបាលដោយមិនបានឆ្លងកាត់ការប្រឡងប្រជែង ពីព្រោះពេទ្យមិនខុសគ្នានឹងជំនាញដោះមីននោះទេ គឺត្រូវទាមទារឲ្យមានភាពច្បាស់លាស់។
ថ្លែងនៅក្នុងពិធីបិទសន្និបាតនៃក្រសួងសុខាភិបាល នារសៀលថ្ងៃទី១៩ ខែមីនា ឆ្នាំ២០២៤ នេះ លោក ហ៊ុន ម៉ាណែត បញ្ជាក់ថា ការបណ្តុះបណ្តាលផ្នែកវេជ្ជសាស្ត្រទាំងរដ្ឋ និងឯកជន ត្រូវមានស្តង់ដារច្បាស់លាស់ ដើម្បីធានាឲ្យបាននូវគុណភាពពិតប្រាកដ និស្សិតរៀនចប់ មានសមត្ថភាពចូលបម្រើការងារក្នុងក្របខ័ណ្ឌរដ្ឋតាមប្រព័ន្ធជ្រើសរើសមន្ត្រី។
លោក ហ៊ុន ម៉ាណែត បានស្នើឲ្យនិស្សិតពេទ្យកុំសុំជាប់ក្របខ័ណ្ឌជាមន្ត្រីសុខាភិបាលដោយមិនបានឆ្លងកាត់ការប្រឡងប្រជែង ពីព្រោះពេទ្យមិនខុសគ្នានឹងជំនាញដោះមីននោះទេ គឺត្រូវទាមទារឲ្យមានភាពច្បាស់លាស់។ លោកថា មិនថាតែជំនាញពេទ្យនោះឡើយ ជំនាញផ្សេងៗក៏ត្រូវមានភាពច្បាស់លាស់នោះដែរ ដូចជាកងទ័ពដែលមានជំនាញដោះមីន ត្រូវចេះឱ្យច្បាស់ បើពុំដូច្នោះទេ អាចផ្ទុះស្លាប់ខ្លួន។
លោក ហ៊ុន ម៉ាណែត បញ្ជាក់ថា ការពង្រឹងមណ្ឌលសុខភាពពីក្រោមទៅលើនោះ គឺជាការពង្រឹងសេវាព្យាបាលកម្រិតស្រាលនៅថ្នាក់មូលដ្ឋាន សេវាបឋម សេវាបញ្ជូន ជ្រើសរើសគ្រូពេទ្យ ពង្រឹងគុណភាពថ្នាំ និងបរិក្ខារពេទ្យ ជាដើម។ ចំណែកការពង្រឹងពីលើចុះក្រោមវិញ គឺការធ្វើទំនើបកម្មឧបករណ៍ពេទ្យ និងការបង្កើនសមត្ថភាពគ្រូពេទ្យនៅថ្នាក់ជាតិ តំបន់ និងថ្នាក់ខេត្ត ដើម្បីព្យាបាលជំងឺកម្រិតខ្ពស់។
កាលពីថ្ងៃទី២៦ ខែមករា កន្លងទៅ បុរសម្នាក់បានស្លាប់ដោយគ្រួសាររបស់អ្នកជំងឺបានចោទថា មន្ទីរពេទ្យមិត្តភាពខ្មែរ-សូវៀត ឬហៅថាពេទ្យរុស្ស៊ី បានទុកអ្នកជំងឺចោលជាច្រើនម៉ោងដោយគ្មានការសង្គ្រោះបឋម គ្មានពេទ្យប្រចាំការគ្រប់គ្រាន់ និងតម្រូវឲ្យបង់លុយជាមុន។
ករណីមួយទៀតកាលពីថ្ងៃទី១៦ ខែមីនា ឆ្នាំ២០២៣ កម្មការិនីរោងចក្រម្នាក់បានស្លាប់បន្ទាប់ពីធ្លាក់ខ្លួនឈឺរាំរ៉ៃរយៈពេល ៤ខែ ដោយសារគ្រូពេទ្យវះកាត់យកកូនចេញខុសបច្ចេកទេស។ គ្រូពេទ្យបានច្រឡំកាត់ពោះវៀនម្តាយថាជាទងសុកទារក។
ក្រុមអ្នកឃ្លាំមើលសង្គមលើកឡើងថា ដោយសារតែពុំសូវទុកចិត្តលើពេទ្យស្រុកខ្មែរ ក្រុមគ្រួសាររបស់លោក ហ៊ុន ម៉ាណែត ព្រមទាំងគ្រួសារអ្នកធំៗឯទៀតទុកចិត្តលើពេទ្យបរទេស ដូចជាប្រទេសសិង្ហបុរី ជាដើម។
ពួកគេនិយាយថា ស្របពេលដែលពលរដ្ឋធូរធារនាំគ្នាទៅព្យាបាលនៅប្រទេសថៃ និងវៀតណាម រីឯអ្នកដែលមានចំណូលមធ្យមនាំគ្នាព្យាបាលជំងឺតែនៅក្នុងស្រុកប៉ុណ្ណោះ ជាពិសេសគឺគ្រូពេទ្យតាមភូមិ។ ការមិនគាំទ្រសេវាសុខាភិបាលក្នុងស្រុករបស់ក្រុមគ្រួសារមេដឹកនាំធំៗ ក៏ជាមូលហេតុប៉ះពាល់ដល់ការអភិវឌ្ឍវិស័យសុខាភិបាលដែរ។
ក្នុងឆ្នាំ២០២៣ ក្រសួងសុខាភិបាល ចំណាយលុយជាង ៧០០លានដុល្លារអាមេរិក ប៉ុន្តែពលរដ្ឋនៅតែរិះគន់ពីសេវាព្យាបាលអន់ថយ និងមានអ្នកជំងឺខ្លះស្លាប់ដោយសារគ្មានប្រាក់ព្យាបាលជំងឺដដែល៕