អ្នកណាក៏ដឹងដែរថា ប្រទេសកម្ពុជាស្ថិតក្រោមការដឹកនាំរបស់អតីតនាយករដ្ឋមន្ត្រី ហ៊ុន សែន ហើយបានផ្ទេរទៅឱ្យកូនរបស់គាត់ គឺជារាជាណាចក្រមួយនៅអាស៊ីអាគ្នេយ៍ដែលប្រជាធិបតេយ្យរបស់ប្រទេសនេះស្ថាបនាឡើងដោយកម្លាំងនយោបាយរបស់សហគមន៍អន្តរជាតិ ដែលជួយធ្វើឱ្យសង្គ្រាមស៊ីវិលរបស់រាជាណាចក្រនេះ ត្រូវបានបិទបញ្ចប់តាមរយៈកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ ហើយរុញឱ្យប្រទេសអតីតកុម្មុយនីស្តមួយនេះប្រកាន់យកប្រព័ន្ធគ្រប់គ្រងបែបប្រជាធិបតេយ្យ។
តែនៅពេលនេះ ប្រជាធិបតេយ្យនៅកម្ពុជាត្រូវបានវាយកម្ទេចរួចទៅហើយជាមួយនឹងគោលដៅកម្ទេចក្រុមប្រឆាំង ដែលកាសែតជប៉ុនមួយឈ្មោះថា The Yomiuri Shimbun បានធ្វើអត្ថាធិប្បាយដោយដាក់ចំណងជើងថា «ស្ថានភាពប្រជាធិបតេយ្យរបស់ប្រទេសកម្ពុជារងគ្រោះ គឺជាការក្បត់នឹងក្ដីរំពឹងរបស់ប្រទេសជប៉ុន» ដែលជាប្រទេសដ៏ធំមួយជួយស្ដារសេដ្ឋកិច្ច និងប្រព័ន្ធប្រជាធិបតេយ្យរបស់រាជាណាចក្រនៅអាស៊ីអាគ្នេយ៍នេះ។
កាសែតដដែលនេះបន្តថា ប្រព័ន្ធប្រជាធិបតេយ្យត្រូវជំនួសមកវិញដោយរដ្ឋាភិបាលផ្ដាច់ការ ដែលធ្វើឱ្យជប៉ុន មានស្លាកស្នាមជាប់នឹងអារម្មណ៍របស់ខ្លួន គឺវិប្បដិសារី ព្រោះជាប្រព័ន្ធដឹកនាំរបស់គ្រួសារលោក ហ៊ុន សែន។
លោក ហ៊ុន សែន ដែលឡើងកាន់អំណាចជានាយករដ្ឋមន្ត្រីជិត ៤០ឆ្នាំ នៅបន្តនយោបាយយ៉ាងសកម្មក្នុងឋានៈជាមេដឹកនាំបក្សប្រជាជនកម្ពុជា បើទោះជាលោកទម្លាក់អំណាចខ្លួនឯង ហើយផ្ទេរទៅឱ្យកូនប្រុសរបស់គាត់ គឺលោក ហ៊ុន ម៉ាណែត ក៏ដោយ។
នៅក្នុងការបោះឆ្នោតសភាជាន់ខ្ពស់កាលពីពេលថ្មីៗនេះ បក្សប្រជាជនកម្ពុជាឈ្នះភ្លូកទឹកភ្លូកដីដោយទទួលបាន ៥៥អាសនៈនៃអាសនៈសរុប៥៨។ លោក ហ៊ុន សែន ក៏ត្រូវគេរំពឹងថា នឹងឆក់យកអំណាចមួយទៀត គឺប្រធានស្ថាប័នព្រឹទ្ធសភា។
តំណែងស្ថាប័នមួយនេះវាមានសារសំខាន់មួយផងដែរ បើនិយាយពីឋានានុក្រមនៃស្ថាប័នជាតិធំៗរបស់ប្រទេស។ ប្រធានស្ថាប័ននេះអាចក្លាយជាប្រមុខរដ្ឋស្ដីទីនៅពេលដែលព្រះមហាក្សត្រអវត្តមានក្នុងប្រទេស។ មានន័យថា ឋានៈជាប្រមុខរដ្ឋស្ដីទី ក៏មានសិទ្ធិក្នុងការសម្រេចកិច្ចការធំៗរបស់ជាតិ និងកិច្ចការរបស់រាជបល្ល័ង្គផងដែរ។
ជ័យជម្នះដែលគេថាឈ្នះយ៉ាងភ្លូកទឹកភ្លូកដីនៅក្នុងការបោះឆ្នោតសភាជាន់ទាបកាលពីឆ្នាំទៅមិញក៏គណបក្សប្រជាជនកម្ពុជាផ្ដួលគណបក្សប្រឆាំងធំៗរួចទៅហើយ ជាពិសេសគឺគណបក្សភ្លើងទៀន ដែលបក្សនេះមានប្រជាប្រិយភាព និងមានថាមពលធនធានកម្លាំងអ្នកគាំទ្រយ៉ាងធំជាងគេទាំងអស់ក្នុងចំណោមបក្សក្រៅរដ្ឋាភិបាល គឺមានតុល្យភាពនឹងគណបក្សប្រជាជនកម្ពុជា ប៉ុន្តែបក្សនេះត្រូវបានគេដកហូតសិទ្ធិបោះឆ្នោតក្រោមហេតុផលដែលគេថាខ្វះឯកសារគតិយុត្តិ។
ឥឡូវនេះ ស្ថានភាពនយោបាយនៅតែបន្តគាបសង្កត់គំរាមកំហែងបក្សប្រឆាំង ទោះបក្សប្រឆាំងកើតថ្មី គឺត្រូវមានគោលដៅកម្ទេចកម្លាំងប្រឆាំងដដែល បើទោះបីជារាជាណាចក្រកម្ពុជាមាននាយករដ្ឋមន្ត្រីថ្មីក៏ដោយនោះ ដែលនេះបញ្ជាក់ថា រាជាណាចក្រមួយនេះស្ថិតនៅក្រោមត្រកូលរបស់អតីតនាយករដ្ឋមន្ត្រី ហ៊ុន សែន។
កាលពីខែមុន សភាប្រថាប់ត្រាបានសម្រេចបោះឆ្នោតអនុម័តឱ្យកូនប្រុសពៅទីបីរបស់លោក ហ៊ុន សែន ក្លាយជាឧបនាយករដ្ឋមន្ត្រី។
ហេតុការណ៍នេះ ក៏គេដឹងថាចិនគាំទ្រជាខ្លាំងក្នុងអំណាចកណ្ដាប់ដៃគ្រួសារនិយមរបស់រាជាណាចក្រនេះ ដែលរដ្ឋាភិបាលកម្ពុជាបច្ចុប្បន្នមិនអាចរំលងពីភ្នែកចិនបានឡើយ។
ចិនជាកម្លាំងធនធាន និងជាគន្លឹះដ៏សំខាន់នៃការប្រើប្រាស់ឥទ្ធិពលនយោបាយលើរាជាណាចក្រកម្ពុជា។ អ្វីដែលសំខាន់ ចិនក្លាយជាអ្នកផ្ដល់ធនធានហិរញ្ញវត្ថុ ដើម្បីឱ្យកម្ពុជាក្លាយជាប្រទេសមួយមានលំនឹង មានកម្លាំងសេដ្ឋកិច្ចរឹងមាំ ប៉ុន្តែចិននៅពីលើ។ ចិនជាប្រទេសដ៏ធំមួយកំពុងតែពង្រីកឥទ្ធិពលរបស់ខ្លួនមិនត្រឹមតែលើកម្ពុជានោះទេ ប៉ុន្តែនៅពាសពេញតំបន់អាស៊ីអាគ្នេយ៍។
ត្បិតគេមិនអាចប្រកែកបានចំពោះជំនួយរបស់ចិន កម្លាំងវិនិយោគទុនរបស់ចិន ក្នុងការជំរុញកំណើនសេដ្ឋកិច្ចកម្ពុជា តែគេនៅតែឆ្ងល់ថា តើគ្រួសារលោក ហ៊ុន សែន នឹងប៉ុនប៉ងរក្សាអំណាចបានយូរប៉ុណ្ណាជាមួយនឹងការពឹងផ្អែកទៅលើឥទ្ធិពល និងធនធានរបស់ចិន។
គេមិនត្រូវភ្លេចថាប្រទេសដែលជាសមាជិករបស់អង្គការសហប្រជាជាតិ រួមមានជប៉ុន សហរដ្ឋអាមេរិក អឺរ៉ុប ក៏ជាកម្លាំងជំនួយដ៏ធំផងដែរដល់កម្ពុជា ហើយក៏ជាកម្លាំងដែលជំរុញឱ្យកម្ពុជាបញ្ចប់សង្គ្រាមស៊ីវិលមានរយៈពេលជាង ២០ឆ្នាំដែលផ្ទុះឡើងចាប់តាំងពីទសវត្ស១៩៧០។
ជាថ្មីម្ដងទៀត និយាយពីប្រទេសជប៉ុន ជប៉ុនដូចជាប្រទេសពិសេសមួយ ឬសំខាន់មួយផងដែរពាក់ព័ន្ធនឹងដំណើរការស្វែងរកសន្តិភាពសម្រាប់កម្ពុជា ក្នុងនោះក៏មានការចូលរួមដំណើរការបោះឆ្នោតនៅកម្ពុជា និងកសាងប្រព័ន្ធប្រជាធិបតេយ្យ ការស្ដារសេដ្ឋកិច្ចរបស់កម្ពុជានៅក្រោមអ្វីដែលគេហោថា កិច្ចព្រមព្រៀងសន្តិភាពទីក្រុងប៉ារីស។
ការកសាងកម្ពុជាដោយឆ្លងកាត់ការសម្លាប់រង្គាលនៃរបបកម្ពុជាប្រជាធិបតេយ្យ សម្រាប់ប្រទេសជប៉ុន ក៏បានបញ្ជូនកងរក្សាសន្តិភាពរបស់ខ្លួនមកជួយពង្រឹងប្រព័ន្ធប្រជាធិបតេយ្យនៅកម្ពុជាផងដែរ គឺក្រោមឆត្ររបស់អង្គការសហប្រជាជាតិ។
រដ្ឋាភិបាលជប៉ុន ព្យាយាមអត់ធ្មត់កសាងទំនាក់ទំនងល្អនឹងរដ្ឋាភិបាលកម្ពុជា និងលោក ហ៊ុន សែន ហើយតែងតែស្នើជំរុញឱ្យលោក ហ៊ុន សែន បន្តអនុញ្ញាតឱ្យមានកម្លាំងប្រឆាំងចូលរួមនៅក្នុងការបោះឆ្នោតដើម្បីពង្រឹងប្រព័ន្ធប្រជាធិបតេយ្យឡើងវិញ តែទីបំផុត ប្រព័ន្ធប្រជាធិបតេយ្យនៅកម្ពុជារងគ្រោះថ្នាក់ទៅហើយ។
ជប៉ុន បានធ្វើពលិកម្មគ្រប់យ៉ាងដើម្បីប្រព័ន្ធប្រជាធិបតេយ្យកម្ពុជាជាមួយនឹងការស្ដារសេដ្ឋកិច្ចកម្ពុជាឡើងវិញ ទោះបីជាជប៉ុនប្រឈមមុខនឹងផលវិបាករងការរិះគន់យ៉ាងណាក៏ដោយ គឺធ្វើម្ដេចឱ្យតែប្រព័ន្ធប្រជាធិបតេយ្យរបស់ព្រះរាជាណាចក្រកម្ពុជា មានដំណើរការល្អប្រសើរ តែពេលនេះ គឺជារឿងខកចិត្ត ក្បត់នឹងការរំពឹងរបស់ប្រទេសជប៉ុន៕