សារព័ត៌មានមួយបានចុះផ្សាយកាលពីពេលថ្មីៗនេះថា ប្រទេសនៅលើពិភពលោកដែលត្រូវបានធនាគារពិភពលោករកឃើញថាជាប្រទេសដែលជាប់បំណុលចិន ធ្ងន់ធ្ងរបំផុតនោះចាប់ពីជិត ៣ពាន់លានដុល្លារឡើងទៅ គឺមាន ២០ប្រទេស។
យោងតាមទិន្នន័យរបស់ធនាគារពិភពលោក ប្រទេសទាំងអស់នេះពិបាកក្នុងការដោះស្រាយសងបំណុលចិន ទាំងប្រាក់ដើម និងការប្រាក់។ ប្រទេសទាំង ២០ នេះភាគច្រើនជាប្រទេសនៅតំបន់ទ្វីបអាហ្វ្រិក ដែលគេហៅថាប្រទេសកំពុងអភិវឌ្ឍ ប៉ុន្តែក្នុងទ្វីបអាស៊ី ក៏មានរាជាណាចក្រកម្ពុជាមួយផងដែរឈរនៅលេខរៀងទី១២ ក្នុងចំណោមប្រទេសទាំង២០ នេះ។
នេះគឺជាឈ្មោះប្រទេសទាំង ២០ ដែលត្រូវបានរាយការណ៍នៅក្នុងទិន្នន័យរបស់ធនាគារពិភពលោក ហើយចុះផ្សាយដោយសារព័ត៌មាន Yahoo Finance កាលពីថ្ងៃទី៥ មេសា មានដូចតទៅនេះ៖
- ប្រទេសដែលជាប់បំណុលចិន ធ្ងន់ជាងគេបំផុត គឺប្រទេសប៉ាគីស្ថាន មានសាច់ប្រាក់ ២៦ពាន់ ៦០០លានដុល្លារអាមេរិក។
- ប្រទេសអង់ហ្កូឡា ដែលជំពាក់បំណុលចិន ២០ពាន់ ៩៨០លានដុល្លារអាមេរិក។
- ប្រទេសស្រីលង្កា ជំពាក់បំណុលចិន ចំនួន ៨ពាន់ ៨៤០លានដុល្លារអាមេរិក។
- ប្រទេសអេត្យូពី ចំនួន ៦ពាន់ ៨២០លានដុល្លារអាមេរិក។
- ប្រទេសកេនយ៉ា ចំនួន ៦ពាន់ ៦៩០លានដុល្លារ។
- ប្រទេសហ្សាំបៀ ចំនួន ៦ពាន់ ៨០លានដុល្លារ។
- ប្រទេសបង់ក្លាដេស ចំនួន ៦ពាន់ ៥០លានដុល្លារ ។
- ប្រទេសឡាវ ចំនួន ៥ពាន់ ២៥០លានដុល្លារ។
- ប្រទេសអេហ្ស៊ីប ចំនួន ៥ពាន់ ២១០លានដុល្លារ។
- ប្រទេសនីហ្សេរីយ៉ា ចំនួន ៤ពាន់ ២៩០លានដុល្លារ។
- ប្រទេសអេក្វាឌ័រ ចំនួន ៤ពាន់ ១៤០លានដុល្លារ។
- ប្រទេសកម្ពុជា ចំនួន ៤ពាន់ ១០លានដុល្លារ។
- ប្រទេសបេឡារូស ចំនួន ៣ពាន់ ៩២០លានដុល្លារ។
- ប្រទេសកូតដូវ័រ ចំនួន ៣ពាន់ ៨៥០លានដុល្លារ។
- ប្រទេសកាម៉ារូន ចំនួន ៣ពាន់ ៧៨០លានដុល្លារ។
- ប្រទេសអាហ្វ្រិកខាងត្បូង ចំនួន ៣ពាន់ ៤៣០លានដុល្លារ។
- សាធារណរដ្ឋកុងហ្គោ ចំនួន ៣ពាន់ ៤២០លានដុល្លារ។
- ប្រទេសប្រេស៊ីល ចំនួន ៣ពាន់ ៣៨០លានដុល្លារ។
- ប្រទេសម៉ុងហ្គោលី ចំនួន ៣ពាន់ ២០លានដុល្លារ។
- ប្រទេសអាហ្សង់ទីន ចំនួន ២ពាន់ ៨៦០លានដុល្លារ។
ប្រទេសទាំងអស់នេះមិនមែនជាប់តែបំណុលរបស់ចិន តែប៉ុណ្ណោះ ប៉ុន្តែក៏ជាប់បំណុលប្រទេសផ្សេងៗទៀត និងជាប់បំណុលធនាគារអន្តរជាតិមួយចំនួនទៀតផង។
ករណីដែលជាប់បំណុលយ៉ាងធ្ងន់ធ្ងរបំផុតនេះ សម្រាប់ប្រទេសប៉ាគីស្ថាន និងស្រីលង្កា មានការរំជើបរំជួលនយោបាយជាច្រើនលើករហូតដល់ទម្លាក់រដ្ឋាភិបាលដែលជំពាក់បំណុលរបស់ចិន ផងដែរ។ ប្រទេសជាកូនបំណុលចិន ទាំងអស់នេះបានខ្ចីប្រាក់សុទ្ធពីចិន តែម្ដង ដោយពុំមានការជាប់បំណុលដោយការដោះដូរទំនិញអ្វីនោះទេ។
ប្រទេសទាំងអស់នេះ ក្រោយពីដោះបំណុលចិន មិនរួច ច្រើនតែសម្រេចដោះដូរជាមួយចិន ដោយកាត់កងនឹងអ្វីដែលមាន ដូចជា ភោគផលធម្មជាតិ ឬក៏ផ្ដល់ឱ្យចិននូវការជួលកំពង់ផែសមុទ្រ កំពង់ផែទន្លេ ឬការជួលឱ្យចិននូវផ្លូវរថភ្លើង ឬផ្លូវ High Way ឬផ្លូវល្បឿនលឿន ជាដើម នៅក្រោមប្រាក់កម្ចីរបស់ចិន ដែលប្រទេសទាំងអស់ពុំអាចបង្វិលសងទៅវិញបានតាមការកំណត់។
និយាយទៅ ចិន ជាប្រទេសម្ចាស់បំណុលធំបំផុតសម្រាប់ប្រទេសក្រីក្រនៅលើពិភពលោក។
ប្រទេសសេដ្ឋកិច្ចលំដាប់ទីពីរនេះបានបញ្ចេញប្រាក់កម្ចីរបស់ខ្លួនទៅឲ្យប្រទេសកំពុងអភិវឌ្ឍ ដែលភាគច្រើនសុទ្ធសឹងតែជាប្រទេសក្រីក្រទទួលប្រាក់ចំណូលទាបប្រចាំឆ្នាំ។ ប្រាក់កម្ចីរបស់ចិន ដែលផ្ដល់ឲ្យប្រទេសក្រីក្រទាំងនោះ គឺក្នុងគម្រោងខ្សែក្រវាត់មួយផ្លូវមួយ (BRI)។
យោងតាមរបាយការណ៍ AidData របស់វិទ្យាស្ថានស្រាវជ្រាវនៃសាកលវិទ្យាល័យ William and Mary នៅរដ្ឋ Virginia សហរដ្ឋអាមេរិក នៅទូទាំងពិភពលោកមាន ១៦៥ប្រទេសដែលជាប់បំណុលចិន ប៉ុន្តែមានតែ ២០% ប៉ុណ្ណោះដែលមា លទ្ធភាពសងទៅចិន វិញតាមកិច្ចសន្យា។
តាមការចុះផ្សាយរបស់កាសែត The Guardian នៅពេលនេះចិនកំពុងតែពិបាកក្នុងការប្រមូលទាំងប្រាក់ដើម និងការប្រាក់ពីប្រទេសទាំងនោះ ព្រោះតែប្រទេសកូនបំណុលភាគច្រើនមិនមានលទ្ធភាពសងឲ្យចិន វិញនោះទេ សូម្បីតែប្រាក់ដើម។
ភាគច្រើនប្រទេសដែលមិនអាចបង្វិលសំណងទៅចិនវិញ ត្រូវបានអង្គការ Aiddata របស់អាមេរិករកឃើញច្រើនតែប្រទេសនៅក្នុងទ្វីបអាហ្វ្រិក ហើយក៏មានប្រទេសនៅក្នុងអាស៊ីមួយចំនួនដែរ។
ចំពោះប្រទេសពីរនៅក្នុងតំបន់អាស៊ីខាងត្បូងដែលរដ្ឋាភិបាលថ្មីនៅក្នុងប្រទេសនេះ ដែលសម្រេចមិនសងការប្រាក់ និងប្រាក់ដើមទៅឲ្យចិន នោះគឺមានប្រទេសពីរ គឺស្រីលង្កា និងប៉ាគីស្ថាន។
ប្រទេសទាំងពីរនេះមានរដ្ឋាភិបាលថ្មីពុំមែនជារដ្ឋាភិបាលដែលជំពាក់បំណុលចិន បានសម្រេចព្យួរការសងប្រាក់ដើម និងការប្រាក់ទៅឱ្យចិន ដែលការពិត ប្រទេសពីរនេះត្រូវបង្វិលសងទៅចិន វិញនៅក្នុងឆ្នាំ២០១៧ ប៉ុន្តែពុំមានលទ្ធភាព ព្រោះតែប្រទេសពីរនេះធ្លាក់ក្នុងវិបត្តិសេដ្ឋកិច្ចធ្ងន់ធ្ងរបំផុតចំពេលដែលពិភពលោកកំពុងធ្លាក់ក្នុងជំងឺរាតត្បាតនៃជំងឺកូវីដ-១៩។
ការព្យួរការសងប្រាក់ដើម និងការប្រាក់របស់ប្រទេសពីរនេះ បានក្លាយទៅជាប្រទេសគំរូទៅប្រទេសដទៃទៀត ក៏បានសម្រេចព្យួរការសងប្រាក់ទៅឲ្យប្រទេសចិន ជាពិសេសគឺប្រទេសនៅទ្វីបអាហ្វ្រិក។
Bradley Parks ជានាយកប្រតិបត្តិនៃក្រុមអ្នកស្រាវជ្រាវ AidData របស់វិទ្យាស្ថានស្រាវជ្រាវនៃសាកលវិទ្យាល័យ William and Mary នៅរដ្ឋ Virginia សហរដ្ឋអាមេរិក បាននិយាយថា ចិននឹងកាន់តែប្រឈមមុខនឹងវិបត្តិសេដ្ឋកិច្ចថែមទៀត បើកូនបំណុលមិនព្រមសងបំណុលឱ្យទាន់ពេលវេលាកំណត់ ហើយគ្មានលទ្ធសងបំណុល។
តាមអ្នកជំនាញរូបនេះ ចិនទំនងមិនសង្គ្រោះប្រាក់កម្ចីរបស់ខ្លួនពីប្រទេសទាំងនោះបានទេ។
ធនាគារកណ្ដាលប្រទេសចិន គឺជាអ្នកដើរតួនាទីក្នុងការបញ្ចេញសាច់ប្រាក់កម្ចី ហើយពេលខ្លះរដ្ឋាភិបាលតែម្ដងជាអ្នកផ្ដល់ប្រាក់ឱ្យកូនបំណុល។
ក្នុងរយៈពេលមួយឆ្នាំចុងក្រោយនេះ ក្រុមហ៊ុនឯកជនចិនជាច្រើនដែលខ្ចីប្រាក់ពីរដ្ឋាភិបាល ដើម្បីយកធ្វើជាទុនវិនិយោគលើការអភិវឌ្ឍហេដ្ឋារចនាសម្ព័ន្ធផ្លូវថ្នល់ អគារខ្ពស់ស្កឹមស្កៃ កំពង់ផែ ស្ពាន ផ្លូវដែក ឬផ្លូវល្បឿនលឿន កំពុងតែជួបវិបត្តិហិរញ្ញវត្ថុ ព្រោះភាគច្រើន គម្រោងសំណង់ត្រូវបានផ្អាក ខណៈអគារច្រើនជាន់ពុំមានអតិថិជនទិញ ឬជួល ធ្វើឱ្យក្រុមហ៊ុនទាំងនោះពុំមានលទ្ធភាពបង្វិលការប្រាក់ និងប្រាក់ដើមទៅឱ្យធនាគារកណ្ដាលរបស់ចិន បានឡើយ។
ករណីនេះ រដ្ឋាភិបាលចិន បញ្ជាឱ្យរឹបអូសអចលនទ្រព្យ ឬចលនទ្រព្យរបស់ក្រុមប្រទេសទាំងនោះទៀតផង៕