អតីតនាយករដ្ឋមន្ត្រីប៉ាគីស្ថាន លោក Imran Khan ត្រូវបានគណៈកម្មការបោះឆ្នោតរបស់ប្រទេសបានសម្រេចប្ដឹងទៅតុលាការកំពូល ឱ្យរំលាយដីកាដែលអនុញ្ញាតឱ្យបុរសនេះបាននៅក្រៅឃុំករណីប្រមាថស្ថាប័នជាតិមួយនេះ។ បណ្ដឹងនេះដែលនាំឱ្យលោក Imran Khan អាចបាត់បង់សិទ្ធិដឹកនាំគណបក្សសម្រាប់ការបោះឆ្នោតសភា នៅថ្ងៃទី១០ ខែវិច្ឆិកា ឆ្នាំ២០២៣។
លោក Imran Khan ជាមេដឹកនាំគណបក្ស PTI ដែលបានឈ្នះសភានៅក្នុងការបោះឆ្នោតឆ្នាំ២០១៨។ លោកត្រូវបានក្រុមប្រឆាំង និងប្រជាជនប៉ាគីស្ថានមួយចំនួនចោទថា ជាមេដឹកនាំដែលស្ថិតនៅក្រោមឥទ្ធិពលរបស់ចិនជាខ្លាំង ដែលគេនិយមហៅថាអាយ៉ងចិន។ លោកជាមេដឹកនាំទាញប្រទេសប៉ាគីស្ថាន ធ្លាក់ក្នុងបំណុលចិនវ័ណ្ឌក។
លោកត្រូវបានសភាក្រុមប្រឆាំងរួមគ្នាដកហូតអំណាចនៅខែមេសា ឆ្នាំ២០២២ ចំពេលប្រទេសធ្លាក់ក្នុងវិបត្តិសេដ្ឋកិច្ចដ៏ធ្ងន់ធ្ងរក្រោមបំណុលចិនគរដូចភ្នំដែលរើខ្លួនមិនរួច។
បុរសវ័យ ៧០ឆ្នាំនេះជាប់បណ្ដឹងដល់ទៅ ១៥០ករណី ដែលក្នុងនោះមានអំពើភេរវកម្ម និងពុករលួយ។ សំណុំរឿងនេះហើយដែលនាំឱ្យលោកធ្លាក់ពីអំណាចនាយករដ្ឋមន្ត្រីដោយសំឡេងសមាជិកនៃបក្សប្រឆាំង រួមនឹងសំឡេងសមាជិកសភាមកពីបក្សរបស់លោកបានបោះឆ្នោតដកអំណាចលោក។
ការប្ដឹងរបស់ស្ថាប័នបោះឆ្នោតដែលថាលោក Imran Khan បានប្រមាថស្ថាប័នជាតិព្រោះតែមិនព្រមមកបង្ហាញខ្លួននៅចំពោះមុខស្ថាប័នបោះឆ្នោតប្រទេសអាស៊ីខាងត្បូងមួយនេះ។
ករណីអាចនឹងនាំឱ្យអតីតនាយករដ្ឋមន្ត្រីប៉ាគីស្ថានរូបនេះមិនមានឱកាសនៅក្រៅឃុំ។ បើតាមបណ្ដាញផ្សាយព័ត៌មាន Aljazeera មួយថ្ងៃក្រោយពីលោក Imran Khan មិនមកបង្ហាញខ្លួន ប៉ូលិសយុត្តិធម៌ដែលកាន់ដីការបស់តុលាការនៅក្នុងដៃ បានទៅនាំខ្លួនលោកមកបង្ហាញខ្លួនចំពោះគណៈកម្មការបោះឆ្នោតករណីលោកប្រមាថស្ថាប័នមួយនេះ។
កាលពីខែវិច្ឆិកា ឆ្នាំ២០២២ នៅក្នុងការដឹកនាំការតវ៉ាដ៏ធំមួយនៅក្រុងអ៊ីស្លាម៉ាបាត ប្រឆាំងនឹងការដកហូតអំណាចរបស់លោកពីនាយករដ្ឋមន្ត្រី លោក Imran Khan បានរងរបួសចំស្មងជើងនៅពេលដែលក្បួនរថយន្តរបស់លោកត្រូវបានបាញ់ប្រហារ។ ក្នុងហេតុការណ៍នោះមានមនុស្សជាច្រើនរងរបួស តែសម្រាប់លោក Khan ត្រូវបានបញ្ជូនទៅកាន់មន្ទីរពេទ្យ។ លោក Imran Khan វ័យ ៧០ឆ្នាំដែលជាអតីតកីឡាករគ្រីឃីតដ៏ល្បីរបស់ប្រទេស។
ក្នុងហេតុការណ៍នេះ នាយករដ្ឋមន្ត្រីឡើងអំណាចជំនួសលោក Imran Khan គឺលោក Shehbaz Sharif បានថ្កោលទោសការបាញ់ប្រហារនេះ ហើយបានបញ្ជាឱ្យរដ្ឋមន្ត្រីក្រសួងមហាផ្ទៃបើកការស៊ើបអង្កេតជាបន្ទាន់។
ការផ្ដួលរំលំអំណាចរបស់លោក Imran Khan បាននាំឱ្យការវិភាគថាជាការធ្វើរដ្ឋប្រហាររបស់សភា បំបាត់អំណាចរបស់បុគ្គលម្នាក់ជាមេដឹកនាំដែលរុញប្រទេសធ្លាក់នៅក្រោមឥទ្ធិពលនៃរបបកុម្មុយនិស្តចិនជាខ្លាំង តាមរយៈបំណុលពាន់លានដុល្លារដែលពុំមានតម្លាភាព។
មិនតែប៉ុណ្ណោះ គឺជាការបំបែកយុទ្ធសាស្ត្រភូមិសាស្ត្រនយោបាយរបស់ចិននៅអាស៊ីខាងត្បូង ហើយក៏ជាការបំបាត់បាននូវការបារម្ភថា បុរសនេះនឹងបើកឱ្យមានមូលដ្ឋានទ័ពរបស់ចិននៅលើទឹកដីប៉ាគីស្ថាន ដែលឥណ្ឌា និងសហរដ្ឋអាមេរិកតែងតែព្រមាន។
លោក Imran Khan អតីតមេដឹកនាំប៉ាគីស្ថាន ដែលក្រុមប្រឆាំងចោទថាជាអាយ៉ងចិន លោកកំពុងប្រឈមមុខនឹងការបាត់បង់សិទ្ធិជាអ្នកនយោបាយ ខណៈតុលាការកំពុងសិក្សានីតិវិធីឈានទៅដល់ការបើកការជំនុំជម្រះក្ដីក្នុងសំណុំរឿង ១៥០ករណីប្រឆាំងរូបលោក៕