អង្គការក្រៅរដ្ឋាភិបាលជាង ៥០ស្ថាប័នដែលធ្វើការលើវិស័យនានា អំពាវនាវឱ្យរដ្ឋាភិបាលកម្ពុជាដោះលែង និងទម្លាក់ចោលបទចោទពីអ្នកការពារសិទ្ធិមនុស្ស និងជាសកម្មជនការពារបរិស្ថាន លោក កើត សារ៉ាយ ជាបន្ទាន់ និងដោយឥតលក្ខខណ្ឌ ដើម្បីបើកចំហសេរីភាពក្នុងការបញ្ចេញមតិឱ្យបានពេញលេញដល់ពលរដ្ឋ។
អង្គការសង្គមស៊ីវិលទាំង ៥៤ស្ថាប័ន ដូចជា អង្គការលីកាដូ សមាគមការពារសិទ្ធិមនុស្សអាដហុក អង្គការសង់ត្រាល់ និងស្ថាប័នសង្គមស៊ីវិលចំនួន ៥១ ផ្សេងទៀត បានចេញសេចក្តីថ្លែងការណ៍រួមគ្នាកាលពីថ្ងៃទី៨ ខែមេសា ឆ្នាំ២០២៤ នេះថា ការឃាត់ខ្លួន និងឃុំខ្លួនលោក កើត សារ៉ាយ គឺជាការបន្តបិទសំឡេង និងសិទ្ធិសេរីភាពក្នុងការបញ្ចេញមតិ រួមទាំងការបង្ក្រាបទៅលើសកម្មជនសិទ្ធិមនុស្ស និងបរិស្ថាន ដែលជាការរំលោភបំពានលើសិទ្ធិសេរីភាពជាមូលដ្ឋានដែលធានាដោយរដ្ឋធម្មនុញ្ញកម្ពុជាយ៉ាងធ្ងន់ធ្ងរ។
ក្រុមអង្គការសង្គមស៊ីវិលខាងលើលើកឡើងថា ការផ្ដល់បទសម្ភាសន៍ ជាពិសេសការបញ្ចេញមតិពីវិវាទដីធ្លីក្នុងខេត្តព្រះវិហារ របស់លោក កើត សារ៉ាយ គឺជាការខ្វាយខ្វល់ចំពោះបញ្ហាជីវភាពរបស់ពលរដ្ឋ និងជាការពាំនាំក្តីកង្វល់របស់ពួកគេ ដើម្បីជំរុញឱ្យអាជ្ញាធរដោះស្រាយបញ្ហាដល់ពលរដ្ឋប៉ុណ្ណោះ មិនមែនជាការញុះញង់ឱ្យពលរដ្ឋប្រព្រឹត្តទង្វើល្មើសច្បាប់ណាមួយនោះទេ។
ប្រភពដដែលបញ្ជាក់ថា ការចាប់ខ្លួនសកម្មជននៅកៀកថ្ងៃនៃការប្រារព្ធពិធីបុណ្យចូលឆ្នាំប្រពៃណីជាតិនៅពេលនេះ គឺរឹតតែធ្វើឱ្យលោក កើត សារ៉ាយ បាត់បង់នូវសិទ្ធិសេរីភាពជួបជុំសមាជិកក្រុមគ្រួសារអំឡុងពេលបុណ្យចូលឆ្នាំថ្មីប្រពៃណីជាតិខ្មែរនេះថែមទៀត ដែលពលរដ្ឋខ្មែរគ្រប់រូបបានចាត់ទុកថាជាឱកាសដ៏វិសេសវិសាលក្នុងការជួបជុំគ្រួសារសម្រាប់ពលរដ្ឋខ្មែរគ្រប់រូបដែលកាន់ព្រះពុទ្ធសាសនា។
កាលពីថ្ងៃទី៥ ខែមេសា ឆ្នាំ២០២៤ ប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ ត្រូវបានកម្លាំងនគរបាលប្រមាណ ១០នាក់ចាប់ក្រៀកបញ្ចូលរថយន្តចេញពីការិយាល័យរបស់លោកក្នុងរាជធានីភ្នំពេញ ខណៈលោកកំពុងធ្វើការ។ សមត្ថកិច្ចបានចោទលោកពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។
ជុំវិញការចាប់ខ្លួននេះ កាលពីថ្ងៃទី៧ ខែមេសា ឆ្នាំ២០២៤ សាលាដំបូងរាជធានីភ្នំពេញ បានចេញសេចក្តីប្រកាសព័ត៌មានថា លោក កើត សារ៉ាយ បានរៀបចំផែនការអូសទាញពលរដ្ឋក្នុងខេត្តព្រះវិហារ ឱ្យប្រព្រឹត្តអំពើកាប់ទន្ទ្រានកាន់កាប់ដីខុសច្បាប់ និងចេញតតាំងដោយហិង្សាជាមួយនឹងអាជ្ញាធរមានសមត្ថកិច្ច ព្រមទាំងបានបំផុសឱ្យពលរដ្ឋមានការភ័យខ្លាចរត់ភៀសខ្លួនចូលព្រៃថែមទៀត ដែលជាហេតុធ្វើឱ្យមានការភ័ន្តច្រឡំលើអាជ្ញាធរយ៉ាងធ្ងន់ធ្ងរ។
កាលពីចុងខែមីនា ឆ្នាំ២០២៤ ប្រធានសមាគមសម្ព័ន្ធនិស្សិតបញ្ញវន្តកម្ពុជាលោក កើត សារ៉ាយ បានដឹកនាំនិស្សិតមួយក្រុម ចុះទៅសិក្សា និងតាមដានករណីពលរដ្ឋមានជម្លោះដីធ្លីនៅឃុំស្រយង់ ស្រុកគូលែន ខេត្តព្រះវិហារ ដែលកំពុងសម្ងំរស់នៅក្នុងព្រៃដើម្បីគេចខ្លួនពីការតាមចាប់របស់អាជ្ញាធរ ប៉ុន្តែដោយសារតែបញ្ហានេះ លោកក៏ត្រូវបានសមត្ថកិច្ចចោទប្រកាន់ និងចាប់ខ្លួននៅពេលនេះ។
លោក កើត សារ៉ាយ ធ្លាប់ត្រូវបានអាជ្ញាធរក្រុងភ្នំពេញចាប់ផ្សឹករួមជាមួយយុវជនអតីតសកម្មជនសង្គមចំនួន ៨នាក់ផ្សេងទៀតម្តងរួចមកហើយ ដោយសារតែធ្វើការតស៊ូមតិស្នើសុំឱ្យដោះលែងថ្នាក់ដឹកនាំសហជីពលោក រ៉ុង ឈុន កាលពីអំឡុងខែកញ្ញា ឆ្នាំ២០២០ កន្លងទៅ ពីបទញុះញង់តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។
លោកត្រូវបានកាត់ទោសឱ្យជាប់ពន្ធនាគារ ២០ខែ ប៉ុន្តែបន្ទាប់ពីអនុវត្តទោសបាន ១ឆ្នាំបួនខែក្នុងពន្ធនាគារ លោកក៏ត្រូវបានអនុញ្ញាតឱ្យព្យួរទោសរយៈពេល ៦ខែ និងត្រូវបានដោះលែងឱ្យមានសេរីភាពឡើងវិញនៅដើមខែវិច្ឆិកា ឆ្នាំ២០២១ កន្លងទៅនោះ។
របាយការណ៍ស្ដីពីនីតិរដ្ឋឆ្នាំ២០២៣ នៃគម្រោងយុត្តិធម៌ពិភពលោក The World Justice Project បានដាក់ចំណាត់ថ្នាក់លេខ១៤១ ក្នុងចំណោមប្រទេស ១៤២ ដល់កម្ពុជា ដោយសារតែគេរកឃើញពីការដឹកនាំគ្មានតម្លាភាព ការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការ ជាដើម៕