សាលាដំបូងខេត្តសៀមរាប សម្រេចឃុំខ្លួនជនត្រូវចោទចំនួន ៥នាក់ ពាក់ព័ន្ធនឹងក្រុមហ៊ុន ប៊្រីលាន ស៊ីធី វើលដ៍ ដែលប្រព្រឹត្តអំពើឆបោកជាមួយអ្នកស្រី ឡេង ចាន់ណា ដោយបង្កកគណនីធនាគារចំនួន ១៨៣គណនី និងចេញដីកាឱ្យនាំខ្លួនមនុស្ស ២៤នាក់ថែមទៀត។
សាលាដំបូងខេត្តសៀមរាប បានចេញសេចក្តីប្រកាសព័ត៌មានមួយកាលពីថ្ងៃទី១៧ ខែមេសា ឆ្នាំ២០២៤ នេះថា តុលាការបានអនុវត្តលើសំណុំរឿងឆបោករបស់ក្រុមហ៊ុន ប៊្រីលាន ស៊ីធី វើលដ៍ ដោយចាប់ផ្តើមបង្កកគណនីធនាគារជិត ២០០គណនី (១៨៣គណនី) និងទ្រព្យសម្បត្តិមួយចំនួន។
យ៉ាងហោចណាស់ មនុស្សជាង ៣០នាក់ (៣១នាក់) ត្រូវបានឃុំខ្លួន និងនាំខ្លួន ព្រមទាំងឱ្យចូលខ្លួនមកកាន់តុលាការផងដែរចាប់ពីថ្ងៃទី១៨ ខែមេសា រហូតដល់ថ្ងៃទី១៧ ខែឧសភា ឆ្នាំ២០២៤ នេះ។ តុលាការក៏បានចេញដីកាចាត់ឱ្យស៊ើបសួរជំនួសដោយបង្គាប់ឱ្យស្រាវជ្រាវទ្រព្យសម្បត្តិ និងសាវតារជាតិរបស់អ្នកពាក់ព័ន្ធផ្សេងទៀត ដើម្បីចាត់ការបន្តតាមនីតិវិធីថែមទៀត។
សេចក្តីប្រកាសព័ត៌មានខាងលើ អះអាងថា សាលាដំបូងខេត្តសៀមរាប កំពុងអនុវត្តចំណាត់ការ ហើយក៏កំពុងបន្តចាត់ការសំណុំរឿងពាក់ព័ន្ធនឹងក្រុមហ៊ុន ប្រ៊ីលាន ស៊ីធី វើលដ៍ ឯ.ក របស់ជនត្រូវចោទឈ្មោះ ឡេង ចាន់ណា ប្រកបដោយការយកចិត្តទុកដាក់ខ្ពស់ដែរ ដោយភាពត្រឹមត្រូវ ច្បាស់លាស់ តម្លាភាព និងយុត្តិធម៌ តាមច្បាប់ និងនីតិវិធីនានាជាធរមាន។
ប្រភពដដែលបញ្ជាក់ថា សំណុំរឿងនេះត្រូវធ្វើការស៊ើបសួរទៅលើបុគ្គលដែលជាក់ពាក់ព័ន្ធច្រើននាក់បន្តទៀត ហើយចំនួនជនរងគ្រោះក៏មានច្រើនដែរ ដែលទាមទារនូវពេលវេលាសមរម្យក្នុងការស្រាវជ្រាវឱ្យអស់លទ្ធភាព ក្នុងន័យស្វែងរកការពិត ដើម្បីដោះស្រាយជូនជនរងគ្រោះដែលជាដើមបណ្ដឹងរដ្ឋប្បវេណីទាំងអស់តាមនីតិវិធីច្បាប់។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី១៨ មេសា នេះថា អំពើឆបោករបស់ក្រុមហ៊ុន ប៊្រីលាន ស៊ីធី វើលដ៍ មិនមែនជាប់ពាក់ព័ន្ធត្រឹមតែបក្ខពួកដែលធ្វើសកម្មភាពជាមួយអ្នកស្រី ឡេង ចាន់ណា តែប៉ុន្មាននាក់នោះទេ គឺមានអ្នកនៅពីក្រោយខ្នងដែលជាអ្នកមានអំណាចកំពូលថែមទៀត ដូច្នេះតុលាការមិនអាចបញ្ឈប់ការស្រាវជ្រាវត្រឹមតែការចោទប្រកាន់ និងចាប់ដាក់គុកតែបុគ្គលរងគ្រោះប៉ុន្មាននាក់នោះឡើយ។
លោក គឹម សុខ លើកឡើងថា បុគ្គលដែលតុលាការត្រូវស្រាវជ្រាវស៊ើបអង្កេតមុនគេ គឺអនុប្រធានអង្គភាពប្រឆាំងអំពើពុករលួយលោក ស៊ាន បូរ៉ាត ដែលជាមនុស្សជាប់សង្ស័យបំផុតក្នុងការគ្រប់គ្រងសកម្មភាពឆបោកទាំងអស់នោះកន្លងមក ខណៈភស្តុតាងជាវីដេអូ និងរូបថតដែលបង្ហាញពីទំនាក់ទំនងស៊ីជម្រៅក្នុងការរកស៊ីក្នុងក្រុមហ៊ុន ប៊្រីលាន ស៊ីធី វើលដ៍ នេះ ក៏មានគេទម្លាយច្រើនដែរ ដូច្នេះតុលាការត្រូវតែចាប់ផ្តើមស៊ើបអង្កេតពីអ្នកនៅពីក្រោយនៃអំពើឆបោកនេះពីលោក ស៊ាន បូរ៉ាត មុនគេ ដើម្បីស្រាវជ្រាវឱ្យដល់អ្នកមានអំណាចនៅពីខាងក្រោយបន្តទៀត។
អ្នកវិភាគនយោបាយរូបនេះបញ្ជាក់ថា ចំណុចដែលគួរឱ្យសង្ស័យ គឺនៅត្រង់ថា មុនដំបូង តុលាការ និងអាជ្ញាធរមិនបានអនុវត្តច្បាប់លើករណីឆបោករបស់អ្នកស្រី ឡេង ចាន់ណា ទេ ទោះមានការលើកឡើងពីពលរដ្ឋយ៉ាងណាក៏ដោយ ប៉ុន្តែក្រោយបែកធ្លាយសំឡេងអ្នកស្រី ឡេង ចាន់ណា ថាលោក ហ៊ុន ម៉ាណែត នៅពីក្រោយខ្នង ទើបអាជ្ញាធរចាប់ខ្លួនគាត់តែម្តង ដូច្នេះដើម្បីធានាភាពយុត្តិធម៌ក្នុងករណីឆបោកនេះ ការស្រាវជ្រាវរកអ្នកនៅពីក្រោយខ្នងគឺជាការចាំបាច់បំផុត។
កាលពីថ្ងៃទី១២ ខែមីនា ឆ្នាំ២០២៤ ឧកញ៉ា ឡេង ចាន់ណា និងបក្ខពួកមួយចំនួន ត្រូវបានសមត្ថកិច្ចចាប់ខ្លួន និងចោទប្រកាន់ពីបទ «ឆបោកមានស្ថានទម្ងន់ទោស (ជាក្រុមមានការចាត់តាំង)» និងចោទប្រកាន់ពីបទ «សម្អាតប្រាក់» ព្រមទាំងចោទប្រកាន់ពីបទ «មិនបំពេញកាតព្វកិច្ចចំពោះឧបករណ៍អាចជួញដូរបាន» ឬចេញសែកស្អុយផងដែរ។
បន្ទាប់ពីត្រូវបានសមត្ថកិច្ចខេត្តសៀមរាប ចាប់ខ្លួនកាលពីថ្ងៃទី១២ ខែមីនា ឆ្នាំ២០២៤ កន្លងទៅ រូបថតជាច្រើនសន្លឹកដែលបានផ្ដិតជាប់រូបឧកញ៉ា ឡេង ចាន់ណា ជាមួយលោក ស៊ាន បូរ៉ាត បានបង្ហាញថា ពួកគេទាំងពីរនាក់នេះមិនត្រឹមតែសហការគ្នាបោកប្រាស់លុយប្រជាពលរដ្ឋប្រមាណជា ៣០០លានដុល្លារអាមេរិកនោះទេ ថែមទាំងមានទំនាក់ទំនងស៊ីជម្រៅរឿងស្នេហាថែមទៀត។
ជាក់ស្តែង រូបថតជាច្រើនសន្លឹករបស់ឧកញ៉ា ឡេង ចាន់ណា និងលោក ស៊ាន បូរ៉ាត ត្រូវបានបង្ហោះចែកចាយលើបណ្ដាញសង្គមហ្វេសប៊ុកព្រោងព្រាត ដួចជារូបថតចូលរួមពិធីអាពាហ៍ពិពាហ៍ស្ថិតក្នុងសម្លៀកបំពាក់ឈុតគូស្នេហ៍ រូបថតនៅក្នុងភោជនីយដ្ឋានចិន ដែលឧកញ៉ា ឡេង ចាន់ណា ឈរឱបដៃលោក ស៊ាន បូរ៉ាត រូបថតថតខ្លួនឯង ឬថតសែលហ្វីតែពីរនាក់ រូបថតទៅលំហែកាយនៅទីតាំងធម្មជាតិផ្សេងៗតែពីរនាក់ ជាដើម។
លើសពីនេះ ក៏មានរូបថតដែលលោក ស៊ាន បូរ៉ាត ចូលរួមកម្មវិធីជួបជុំសមាជិកក្រុមហ៊ុន ប៊្រីលាន ស៊ីធី ជាមួយអ្នកស្រី ឡេង ចាន់ណា ក្នុងនាមជាម្ចាស់ក្រុមហ៊ុននេះផងដែរ។ ជាងនេះទៀត ក៏មានវីដេអូដែលលោក ស៊ាន បូរ៉ាត បានណែនាំដល់សមាជិករាប់រយនាក់ក្នុងសិក្ខាសាលាអំពីវិធីប្រមូលលុយសម្រាប់ក្រុមហ៊ុន ប៊្រីលាន ស៊ីធី ថែមទៀត។
លោក ស៊ាន បូរ៉ាត ត្រូវគេដឹងថាមានតួនាទីខ្ពស់ៗជាច្រើនក្នុងគណបក្សប្រជាជនកម្ពុជា និងក្នុងជួររដ្ឋាភិបាល ដូចជាក្នុងគណបក្ស លោកមានតួនាទីជាសមាជិកគណៈកម្មការកណ្ដាលគណបក្សប្រជាជនកម្ពុជាផង និងជាអនុប្រធានយុវជនគណបក្សប្រជាជនកម្ពុជាថ្នាក់កណ្ដាលផងដែរ ចំណែកតួនាទីក្នុងជួររដ្ឋាភិបាល លោកមានឋានៈជារដ្ឋលេខាធិការក្រសួងអប់រំ យុវជន និងកីឡាផង ជាអនុប្រធានអង្គភាពប្រឆាំងអំពើពុករលួយ និងជាប្រធានសហព័ន្ធកីឡាបាល់បោះកម្ពុជាផងដែរ៕