សង្គ្រាមរុស្ស៊ី ឈ្លានពានអ៊ុយក្រែន មកដល់ពេលនេះវាចូលដល់ ២ឆ្នាំជិត ៣ខែមកហើយ។ នៅវគ្គដំបូងៗ រុស្ស៊ីលើកទ័ពលុកលុយប្រទេសអ៊ុយក្រែន គឺសឹងតែវាយបំបែករដ្ឋធានីគៀវ ទៅហើយ ប៉ុន្តែត្រូវបានទ័ពអ៊ុយក្រែន វាយបករុញច្រានទ័ពរុស្ស៊ី ត្រឡប់មកវិញជាមួយនឹងអ៊ុយក្រែន ទទួលបានអាវុធភ្លាមៗពីក្រុមបស្ចិមប្រទេស និងណាតូ។
គេថានៅសល់តែ ៦០គីឡូម៉ែត្រទៀតប៉ុណ្ណោះ ទ័ពរុស្ស៊ី វាយចូលរដ្ឋធានីគៀវ បានទៅហើយ តែក្នុងពេលនោះ រុស្ស៊ី រុលទៅមុខពុំរួចដោយសារតែរថក្រោះ និងរថពាសដែករបស់រុស្ស៊ី ជាប់ផុងដោយសារតែទ័ពអ៊ុយក្រែន បាញ់កម្ទេចឆេះយ៉ាងសម្បើមនៅលើដងផ្លូវដែលរថក្រោះរថពាសដែករុស្ស៊ីទាំងនោះរុលចូលទៅរដ្ឋធានីគៀវ។
នៅថ្ងៃទី០៤ មិថុនា រុស្ស៊ីបានសម្រេចដកទ័ពត្រឡប់ទៅឈរជើងវិញនៅតំបន់ដុនបាសភាគខាងកើតប្រទេស ហើយភ្លាមៗនោះ លោក ពូទីន ប្រកាសថា រុស្ស៊ីនឹងធ្វើយុទ្ធនាការទ្រង់ទ្រាយធំជាថ្មីម្ដងទៀត ដើម្បីរុលចូលរដ្ឋធានីគៀវ និងវាយយកដុនបាស ឱ្យបានពីអ៊ុយក្រែន។
មកដល់ពេលនេះ រុស្ស៊ីកំពុងស្ថិតនៅក្នុងសមរភូមិភាគខាងកើត និងភាគខាងត្បូងប្រទេស។ ប៉ុន្មានថ្ងៃចុងក្រោយនេះ លោក ពូទីន បានចេញបញ្ជាឱ្យកងទ័ពរុស្ស៊ី វាយបំបែកតំបន់ដុនបាស នៅត្រឹមខែកក្កដា ហើយសម្រេចរុលចូលគ្រប់សមរភូមិទាំងអស់ បើវាយយកដុនបាស បានហើយនោះ។ ត្រង់នេះហើយដែលអ្នកសង្កេតការណ៍ និងអ្នកវិភាគជជែកវែកញែកជាមួយនឹងបណ្ដាញផ្សាយព័ត៌មានអន្តរជាតិធំៗនៃក្រុមពួកបស្ចិមប្រទេសថា តើស្ថានការណ៍សឹកនៅពេលនេះនៅលើទឹកដីអ៊ុយក្រែន ដែលកងទ័ពរុស្ស៊ី កំពុងតែមានប្រៀបជាងកងទ័ពអ៊ុយក្រែន នៅសមរភូមិតំបន់ដុនបាស កងទ័ពរុស្ស៊ីមានលទ្ធភាពក្នុងការធ្វើសង្គ្រាមឈ្នះអ៊ុយក្រែន នៅក្នុងឆ្នាំ២០២៤ ដែរឬទេ។
យោងតាមអ្នកជំនាញផ្នែកយោធាពីពួកបស្ចិមប្រទេស មានទាំងអគ្គលេខាធិការអង្គការយោធាណាតូ Jen Stoltenberg ផងដែរ បានអះអាងថា រុស្ស៊ីគ្មានលទ្ធភាពក្នុងការវាយឈ្នះសង្គ្រាមនៅលើទឹកដីអ៊ុយក្រែនដាច់ខាត មិនថាឡើយនៅឆ្នាំ២០២៤ នោះទេ គឺច្រើនឆ្នាំទៅមុខទៀតក៏មិនអាចវាយកាន់កាប់ទឹកដីអ៊ុយក្រែន បានទាំងមូលឡើយ។
តើកត្តាអ្វីខ្លះដែលក្រុមអ្នកជំនាញរបស់ពួកបស្ចិមប្រទេស រាប់ទាំងមេដឹកនាំណាតូ បានថ្លែងដូចនេះ ហើយមានជំនឿថា អ៊ុយក្រែនអាចនឹងការពារទីតាំងឈរជើងរបស់ខ្លួនបាន បើទោះជាទ័ពរបស់រុស្ស៊ីវាយលុកយ៉ាងខ្លាំងក្លាក៏ដោយនោះ?
កត្តាទី១ គេអាចនិយាយបានថា រុស្ស៊ីបើទោះជាប្រើប្រាស់ទ័ពច្រើនមហិមាជាងកងទ័ពអ៊ុយក្រែនក៏ដោយ គឺកងទ័ពរបស់រុស្ស៊ីមួយភាគធំពុំមានស្មារតីរឹងមាំក្នុងការកាន់អាវុធប្រយុទ្ធនៅលើសមរភូមិនោះទេ ដូចជាថ្មីៗនេះ សារព័ត៌មាន The Kyiv Independent នៃប្រទេសអ៊ុយក្រែន ចុះផ្សាយថា ទ័ពរុស្ស៊ីជាង ១៨០០០នាក់ បានបោះបង់ទីតាំងឈរជើងរបស់ពួកគេ ហើយទម្លាក់អាវុធចុះចូលនឹងកងទ័ពអ៊ុយក្រែន។ ក្នុងចំណោមទ័ព ១៨០០០នាក់នេះ គឺជាង ១ម៉ឺននាក់ជាកងទ័ពដែលត្រូវបង្ខំឱ្យកាន់អាវុធប្រយុទ្ធនៅលើសមរភូមិ គឺពួកគេខ្វះភាពក្លាហាន។ ក្រៅពីនេះជាកងទ័ពដែលពួកគេមានសតិអារម្មណ៍មិនល្អក្នុងការកាន់អាវុធធ្វើសង្គ្រាមប្រយុទ្ធនឹងកងទ័ពអ៊ុយក្រែន។ ក្រុមនេះច្រើនតែជាក្រុមមនុស្សមានទោសឧក្រិដ្ឋ ដែលរុស្ស៊ីនាំខ្លួនចូលទៅសមរភូមិ។
សារព័ត៌មានរបស់អ៊ុយក្រែន បានអះអាងដូចនេះដោយបានស្រង់ប្រភពព័ត៌មានរបស់អគ្គសេនាធិការរបស់កងទ័ពអ៊ុយក្រែន តែទ័ពរបស់រុស្ស៊ី ជាង ១៨០០០នាក់នេះសម្រេចបោះបង់ចោលការប្រយុទ្ធរបស់ខ្លួននោះ កើតមានឡើងតែនៅសមរភូមិភាគខាងត្បូងតែប៉ុណ្ណោះ។ នេះក៏ជាកត្តាមួយដែលអ្នកជំនាញផ្នែកយោធាបស្ចិមប្រទេស មានជំនឿថាទ័ពរុស្ស៊ីមានតែបរិមាណតែប៉ុណ្ណោះ។
កត្តាមួយទៀតគេផ្អែកទៅលើចារកម្មព័ត៌មាន។ ត្រង់ចំណុចនេះ អ្នកជំនាញយោធារបស់ពួកបស្ចិមប្រទេសថា កងទ័ពរុស្ស៊ីមិនមានភាពច្បាស់លាស់ក្នុងការធ្វើចារកម្មដើម្បីទាញយកព័ត៌មានចេញពីអ៊ុយក្រែន នោះទេ។ ដូចគេបានដឹងហើយថា ក្រសួងការពារជាតិរុស្ស៊ី បានបញ្ជូនក្រុមចារកម្មចូលទៅដល់ទីក្រុងគៀវ និងបញ្ជូនកុម្ម៉ង់ដូពិឃាតផងដែរ តែត្រូវបានចារកម្មរបស់អ៊ុយក្រែន ដែលជំនួយដោយក្រុមចារកម្មរបស់ពួកបស្ចិមប្រទេស បានតាមសម្លាប់កងកុម្ម៉ង់ដូរបស់រុស្ស៊ីទាំងនោះដែលចូលដល់រដ្ឋធានីគៀវ។ កម្លាំងកុម្ម៉ង់ដូរបស់រុស្ស៊ី ដែលចូលរដ្ឋធានីគៀវ កាលពីសង្គ្រាមវគ្គដំបូងដើម្បីធ្វើឃាតលោកប្រធានាធិបតីអ៊ុយក្រែន វ៉ូឡូឌីមៀ ហ្សេឡេនស្គី។
មួយវិញទៀគេថា អ៊ុយក្រែនដែលអាចទប់ទល់កងទ័ពរុស្ស៊ីបានដោយសារតែស្មារតីប្រយុទ្ធរបស់ទ័ពអ៊ុយក្រែន មានភាពខ្លាំងជាងកងទ័ពរុស្ស៊ី ព្រោះតែពួកគេការពារអធិបតេយ្យភាពបូរណភាពទឹកដី។ ម្យ៉ាងទៀត គេថាកងទ័ពអ៊ុយក្រែន ដែលទទួលបានការលើកទឹកចិត្តជាខ្លាំងដោយពួកបស្ចិមប្រទេស ជាពិសេសចុងក្រោយនេះ សភាសហរដ្ឋអាមេរិកអនុម័តកញ្ចប់ជំនួយជិត ៦១ពាន់លានដុល្លារអាមេរិក ដើម្បីផ្គត់ផ្គង់អាវុធគ្រាប់រំសេវទៅឱ្យកងទ័ពអ៊ុយក្រែន គឺយ៉ាងហោចណាស់ធ្វើឱ្យយុទ្ធជនអ៊ុយក្រែន ដែលនៅសមរភូមិ កាន់តែមានស្មារតីប្រយុទ្ធជាមួយនឹងអ្នកឈ្លានពាន។
គេថារុស្ស៊ីដែលមិនអាចឈ្នះសង្គ្រាមឆ្នាំ២០២៤ នេះ គឺមិនអាចឈ្នះសង្គ្រាមទាំងស្រុងនៅលើទឹកដីអ៊ុយក្រែន នោះទេ ហើយសូម្បីវាយយកតំបន់ដុនបាស ដែលមានផ្ទៃដីជាង ៥៣០០គីឡូម៉ែត្រក្រឡា ទំនងក៏មិនអាចទៅរួចផងដែរ មិនថាឡើយរុស្ស៊ីក្រោមការដឹកនាំរបស់លោក ពូទីន ដាក់ផែនការឱ្យកងទ័ពវាយយកឱ្យបានតំបន់ភាគខាងកើតប្រទេសអ៊ុយក្រែន នេះនៅត្រឹមខែកក្កដា ក៏ដោយនោះ ក៏ទំនងមិនអាចទៅរួចនោះដែរ ព្រោះជាក់ស្ដែងនៅពេលនេះ កងទ័ពរុស្ស៊ីចាប់ផ្ដើមទប់ទល់នឹងកងទ័ពអ៊ុយក្រែនបានវិញហើយជាមួយនឹងការប្រើប្រាស់គ្រាប់មីស៊ីលជាជំនួយរបស់សហរដ្ឋអាមេរិក និងអង់គ្លេស។
សហរដ្ឋអាមេរិកផ្ដល់ជំនួយគ្រាប់មីស៊ីល ATACMS ឬហៅថាប្រព័ន្ធកាំជ្រួចបាញ់កម្ទេចជួយទ័ពថ្មើរជើងក្នុងសមរភូមិ (Army Tactical Missile System = ATACMS) និងអង់គ្លេស ផ្ដល់ជំនួយគ្រាប់មីស៊ីល Storm Shadow ជាច្រើនពាន់គ្រាប់ទៅឱ្យអ៊ុយក្រែន គឺកាលពីខែមីនា ហើយឥឡូវនេះ អ៊ុយក្រែនប្រើប្រាស់អាវុធពីរប្រភេទនេះកំពុងតែមានប្រសិទ្ធភាពក្នុងការវាយទៅលើទីតាំងកាន់កាប់ដោយកងទ័ពរុស្ស៊ី។
បន្ថែមលើនេះ គ្រាប់កាំភ្លើងធំដែលអ៊ុយក្រែនធ្លាក់ដៃជាច្រើនខែមកនេះ ដោយសារតែអ៊ុយក្រែនខ្វះគ្រាប់កាំភ្លើងធំដើម្បីប្រយុទ្ធ ឥឡូវនេះ អ៊ុយក្រែនចាប់ផ្ដើមមានគ្រាប់កាំភ្លើងធំដែលគេថាជាឧបករណ៍សង្គ្រាមដ៏សំខាន់បំផុតដើម្បីវាយបកទៅលើទ័ពរុស្ស៊ី នោះ គឺអ៊ុយក្រែនចាប់ផ្ដើមមានគ្រប់គ្រាន់វិញហើយ។
ឥឡូវនេះ អ៊ុយក្រែនអាចបាញ់គ្រាប់កាំភ្លើងធំចូលទៅទីតាំងរបស់រុស្ស៊ី គឺចាប់ពី ១ម៉ឺនគ្រាប់ទៅ ១ម៉ឺន ៥ពាន់គ្រាប់ក្នុងមួយថ្ងៃ។ ចំណែកឯមីស៊ីល ATACMS ពីសហរដ្ឋអាមេរិក ត្រូវបានអះអាងថា អ៊ុយក្រែនវាយប្រហារចំណុចដៅជាច្រើនលើកងទ័ពរុស្ស៊ី។
រយៈពេលប៉ុន្មានថ្ងៃចុងក្រោយនេះ រុស្ស៊ីទទួលស្គាល់ថា មីស៊ីល ATACMS របស់អាមេរិកមានភាពខ្លាំងដែលធ្វើឱ្យទ័ពរបស់រុស្ស៊ី ស្ទាក់ស្ទើរក្នុងការវាយពង្រីកទីតាំងកាន់កាប់ទៅលើកងទ័ពអ៊ុយក្រែន។
អគ្គលេខាធិការយោធាណាតូ លោក Jen Stoltenberg ដែលបានធ្វើដំណើរទៅរដ្ឋធានីគៀវ ជាថ្មីម្ដងទៀត លោកបានថ្លែងនៅចំពោះមុខអ្នកសារព័ត៌មាន និងនៅចំពោះលោក ហ្សេឡេនស្គី ថា អ៊ុយក្រែននឹងទប់ទល់ការវាយលុករបស់រុស្ស៊ីបានជាច្រើនខែច្រើនឆ្នាំទៅមុខទៀត រហូតទាល់តែរុស្ស៊ី អស់ចិត្តក្នុងការធ្វើសង្គ្រាមលើទឹកដីអ៊ុយក្រែន។
អ្វីដែលលោក Jen Stoltenberg ថ្លែងអះអាងដូចនេះ ដោយសារតែអាវុធយុទ្ធភណ្ឌទំនើបៗមានទាំងប្រព័ន្ធការពារដែនអាកាស Patriot កំពុងដឹកជញ្ជូនចូលទៅទឹកដីអ៊ុយក្រែន ដែលជាជំនួយពីបស្ចិមប្រទេសបន្ថែមទៀតទៅឱ្យអ៊ុយក្រែន។
ក្នុងកញ្ចប់ជំនួយរបស់សហរដ្ឋអាមេរិក ជិត ៦១ពាន់លានដុល្លារនោះ គឺមានប្រព័ន្ធការពារដែនអាកាស Patriot មានគ្រាប់មីស៊ីល ATACMS មានគ្រាប់កាំភ្លើងធំ ១៥៥មិល្លីម៉ែត្រ មានរថពាសដែក និងរ៉ុក្កែតបាញ់លើស្មា Javelin ដើម្បីបាញ់កម្ទេចរថក្រោះរុស្ស៊ី ផងដែរ។ រុស្ស៊ីប្រកាសថ្កោលទោសសហរដ្ឋអាមេរិកយ៉ាងខ្លាំងដែលនៅតែបន្តផ្ដល់អាវុធទៅឱ្យអ៊ុយក្រែន៕