អ្នកឃ្លាំមើលសង្គម អំពាវនាវឱ្យមេដឹកនាំបក្សកាន់អំណាចលោក ហ៊ុន សែន ធ្វើជាគំរូក្នុងការផ្សះផ្សានយោបាយផ្ទៃក្នុងជាមួយប្រធានគណបក្សសង្គ្រោះជាតិលោក កឹម សុខា ដែលកំពុងត្រូវឃុំខ្លួននៅក្នុងផ្ទះ មុននឹងចូលខ្លួនទៅសម្របសម្រួលទំនាស់នយោបាយផ្ទៃក្នុងរបស់ភូមា ដោយសារស្ថានភាពអ្នកនយោបាយទាំងពីរនាក់នេះដូចគ្នា។
អ្នកសិក្សាផ្នែកច្បាប់ លោក វ៉ន ចាន់ឡូត បានសរសេរលើគណនីហ្វេសប៊ុករបស់លោកនៅថ្ងៃទី៨ ឧសភា នេះថា សំណើរបស់លោក ហ៊ុន សែន ទៅកាន់មេដឹកនាំរដ្ឋប្រហារយោធាភូមា លោក មីន អ៊ុងឡាំង ក្នុងបំណងចង់ជួបពិភាក្សាជាមួយប្រធានគណបក្សសម្ព័ន្ធជាតិដើម្បីប្រជាធិបតេយ្យ អ្នកស្រី អ៊ុងសាន ស៊ូជី ដែលកំពុងត្រូវបានឃុំខ្លួនក្នុងផ្ទះពីសំណាក់របបសឹកភូមា នៅពេលនេះ គឺជារឿងដែលគួរឱ្យអបអរសាទរជាទីបំផុត ប៉ុន្តែលោក វ៉ន ចាន់ឡូត បានផ្តល់អនុសាសន៍ថា ដើម្បីបំពេញតួនាទីក្នុងការជួយសម្របសម្រួលវិបត្តិភូមា សព្វថ្ងៃនេះ លោក ហ៊ុន សែន គួរតែបង្ហាញពីអភ័យទាននយោបាយចំពោះអ្នកនយោបាយខ្មែរក្នុងរង្វង់ជាតិឯងជាមុនសិន ពីព្រោះស្ថានភាពលោក កឹម សុខា ដែលត្រូវបានឃុំខ្លួនក្នុងផ្ទះរយៈពេល ២៧ឆ្នាំ និងស្ថានភាពរបស់អ្នកស្រី អ៊ុងសាន ស៊ូជី ដែលត្រូវបានឃុំខ្លួនក្នុងផ្ទះពីសំណាក់របបសឹកភូមា នៅពេលនេះ គឺដូចគ្នា។
អ្នកសិក្សាផ្នែកច្បាប់រូបនេះបញ្ជាក់ថា ទាល់តែលោក ហ៊ុន សែន អាចផ្សះផ្សានយោបាយ ឬដោះស្រាយវិបត្តិផ្ទៃក្នុងជាតិរបស់ខ្លួនជាមុនសិន នោះទើបមានឥទ្ធិពលក្នុងការចូលខ្លួនទៅដោះស្រាយវិបត្តិរបស់ប្រទេសភូមា។
កាលពីថ្ងៃទី៧ ខែឧសភា ឆ្នាំ២០២៤ មេដឹកនាំបក្សកាន់អំណាចលោក ហ៊ុន សែន បានជួបជាមួយមេដឹកនាំរបបផ្ដាច់ការភូមា លោក មីន អ៊ុងឡាំង តាមប្រព័ន្ធវីដេអូ ដោយស្នើសុំជួបជាមួយអ្នកស្រី អ៊ុងសាន ស៊ូជី ក្រោមហេតុផលថា ដោយសារតែអ្នកស្រីធ្លាប់ជាសហការីជាមួយគ្នាជាច្រើនឆ្នាំនៅក្នុងកិច្ចការអាស៊ានកន្លងមក។
លោក ហ៊ុន សែន បញ្ជាក់ថា លោក មីន អ៊ុងឡាំង សន្យាថានឹងបញ្ជូនប្រេសិតពិសេសរបស់ខ្លួនទៅកាន់ប្រទេសកម្ពុជា នៅពេលខាងមុខ ដើម្បីបន្តពិភាក្សាទៅលើសំណើទាំងនេះ។
អនុប្រធានវេទិកាពលរដ្ឋលោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី៨ ឧសភា នេះដែរថា វិបត្តិភូមា និងវិបត្តិនៅប្រទេសកម្ពុជា មានលក្ខណៈតែមួយ គឺជាវិបត្តិប្រជាធិបតេយ្យ ហើយការដណ្តើមអំណាចពីមេដឹកនាំប្រជាធិបតេយ្យក៏មិនខុសគ្នាដែរ។
លោក ម៉ែន ណាត លើកជាសំណួរថា តើលោក ហ៊ុន សែន ពិតជាចង់ឃើញប្រទេសភូមា បញ្ចប់វិបត្តិនយោបាយជម្លោះផ្ទៃក្នុងដោយពិតប្រាកដមែនទេ ឬដើម្បីតែប្រជាភិថុតិនយោបាយរបស់គាត់។
លោកបន្ថែមថា បើគាត់មានចេតនាចង់ដោះស្រាយវិបត្តិនៅភូមា មែន ហេតុអ្វីគាត់មិនដោះស្រាយវិបត្តិនយោបាយផ្ទៃក្នុងជាតិខ្លួនឯងឱ្យរួចរាល់ជាមុនសិន។ លោក ម៉ែន ណាត ចោទសួរបន្ថែមថា តើវិបត្តិភូមា សំខាន់សម្រាប់កម្ពុជា ជាងវិបត្តិរបស់កម្ពុជាខ្លួនឯងឬយ៉ាងណា?
អនុប្រធានវេទិកាពលរដ្ឋរូបនេះលើកឡើងថា របៀបដឹកនាំនៃរបបសឹកដែលចាប់ឃុំខ្លួនអ្នកស្រី អ៊ុងសាន ស៊ូជី និងផ្ទេរការឃុំខ្លួនក្នុងពន្ធនាគារមកជាការឃុំខ្លួននៅក្នុងផ្ទះ គឺដូចគ្នាទៅនឹងអ្វីដែលលោក ហ៊ុន សែន បានធ្វើចំពោះលោក កឹម សុខា កន្លងមកបេះបិទ។
លោក ម៉ែន ណាត បញ្ជាក់ថា លោក ហ៊ុន សែន គ្មានឥទ្ធិពលអ្វីសម្រាប់ឱ្យរបបសឹកភូមា ធ្វើតាមគាត់នោះទេ ដូច្នេះក្រៅពីដោះស្រាយវិបត្តិនយោបាយផ្ទៃក្នុងរបស់ខ្លួនដោយការស្វែងរកការបង្រួបបង្រួមជាតិ និងព្យាយាមដឹកនាំកម្ពុជាឱ្យឃ្លាតពីរបៀបដឹកនាំតាមបែបផ្ដាច់ការ គឺគ្មានជម្រើសផ្សេងឡើយ៕