ប្រធានចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង លោក មាស ពិសាល អះអាងថា អ្នកធ្វើការ និងរស់នៅក្នុងសាធារណរដ្ឋកូរ៉េ ស្ទើរតែទាំងអស់ មិនទុកចិត្តរដ្ឋាភិបាលកម្ពុជាថានឹងអាចចរចាជាមួយប្រទេសថៃ ជាលក្ខណៈទ្វេភាគី យកចំណែកកម្មសិទ្ធិលើកោះគុតដែលថៃ រំលោភបំពានមកគ្រប់គ្រងវិញបានទេ។
លោក មាស ពិសាល ប្រាប់សារព័ត៌មាន The Cambodia Daily នៅថ្ងៃទី២៦ កុម្ភៈ នេះថា ទឹកដីកម្ពុជាស្ថិតក្រោមការគ្រប់គ្រងរបស់រដ្ឋាភិបាលឯកបក្សនៃគណបក្សប្រជាជនកម្ពុជាសព្វថ្ងៃនេះ មិនអាចឱ្យពលរដ្ឋខ្មែរទុកចិត្តលើឆន្ទៈ និងសមត្ថភាពរបស់មេដឹកនាំនៃគណបក្សនេះថានឹងអាចការពារទឹកដីរបស់កម្ពុជាបានទេ។
ប្រភពដដែលលើកឡើងថា កម្លាំងកងទ័ពរបស់កម្ពុជាដែលកំពុងក្តោបក្តាប់ដោយបក្សកាន់អំណាច មិនមានសមត្ថភាពអាចទប់ទល់នឹងប្រទេសជិតខាងដែលមានបំណងឈ្លានពានលើទឹកដីខ្មែរបានឡើយ។
លោកបន្តថា បើប្តឹងករណីនេះទៅតុលាការអន្តរជាតិ រដ្ឋាភិបាលនឹងត្រូវបញ្ចៀសនូវការសង្ស័យគ្រប់យ៉ាងពីពលរដ្ឋរបស់ខ្លួន ហើយបើករណីនេះចាញ់ក្តីថៃ នៅតុលាការអន្តរជាតិនោះ ពលរដ្ឋខ្មែរក៏មិនសង្ស័យថាមេដឹកនាំកម្ពុជាគប់គិតជាមួយមេដឹកនាំថៃ ក្នុងរឿងនេះដែរ។
លោកគូសបញ្ជាក់ថា ផ្ទុយទៅវិញ បើបណ្តឹងនេះឈ្នះថៃ នោះក៏នឹងមិននាំឱ្យមានសង្គ្រាមរវាងប្រទេសទាំងពីរដែរ ដូច្នេះមានន័យថា ការដោះស្រាយករណីនេះនៅតុលាការអន្តរជាតិល្អ ទាំងរដ្ឋាភិបាលរួចផុតពីការសង្ស័យរបស់ពលរដ្ឋ។
ចលនាខ្មែរក្រៅស្រុកជាច្រើន ដូចជា ចលនាខ្មែរដើម្បីប្រជាធិបតេយ្យ បណ្ដាញយុវជនសកល សមាគមប្រជាធិបតេយ្យខ្មែរក្វាងជូ សមាគមបេះដូងខ្មែរក្នុងប្រទេសកូរ៉េ និងចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង ជាដើម បានចេញសេចក្តីជូនដំណឹងរួមគ្នាមួយកាលពីពេលថ្មីៗនេះថា មហាបាតុកម្មស្ដីពីបញ្ហាកោះគុត នឹងធ្វើឡើងនៅថ្ងៃទី២ ខែមីនា ឆ្នាំ២០២៥ ខាងមុខនេះ ស្ថិតនៅទីក្រុងសេអ៊ូល ក្បែរចំណតរថភ្លើងលេខ៤។
ក្រោយសេចក្តីជូនដំណឹងនេះ យុវជនប្រមាណជា ២ ទៅ ៣នាក់ដែលគេដឹងថាមាននិន្នាការគាំទ្រគណបក្សប្រជាជនកម្ពុជា បានចេញមុខផ្សព្វផ្សាយដោយការថតលើកបដាដែលសរសេរថា ខ្ញុំជាពលករនៅកូរ៉េខាងត្បូង ជឿជាក់លើរដ្ឋាភិបាលក្នុងការចរចាព្រំដែនជាមួយប្រទេសជិតខាង ដូច្នេះសូមពលករខ្មែរក្នុងប្រទេសកូរ៉េខាងត្បូង កុំធ្វើបាតុកម្មជុំវិញបញ្ហាកោះគុតនេះ។
ជុំវិញបញ្ហានេះ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២៦ កុម្ភៈ នេះដែរថា បើរដ្ឋាភិបាលខ្មែរនៅតែបន្តចរចាជាលក្ខណៈទ្វេភាគីជាមួយប្រទេសថៃ កម្ពុជានឹងមិនអាចទទួលបានទឹកដីដែលថៃ បានរំលោភបំពានមកគ្រប់គ្រងវិញទេ។
លោក អ៊ុំ សំអាន បញ្ជាក់ថា ក្រៅពីលើកយកករណីនេះទៅដោះស្រាយនៅតុលាការអន្តរជាតិ ពលរដ្ឋខ្មែរនឹងមិនជឿជាក់លើវិធានការរបស់រដ្ឋាភិបាលទាំងអស់ ព្រោះថារដ្ឋាភិបាលដែលគ្រប់គ្រងដោយត្រកូលហ៊ុនសព្វថ្ងៃនេះ បានធ្វើឱ្យពលរដ្ឋបាត់ទំនុកចិត្ត ១០០% ទៅហើយពីរឿងការពារទឹកដីទាំងខាងកើត និងខាងលិច៕
© 2025, ឌឹ ខេមបូឌា ដេលី. All rights reserved.