ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលធ្លាប់អះអាងថាមានតែរូបលោកទេអាចបញ្ចប់សង្គ្រាមរវាងរុស្ស៊ី និងអ៊ុយក្រែន ស្រាប់តែពេលនេះលោកបានប្រកាសថា ប្រទេសរុស្ស៊ី កំពុងគ្រប់គ្រងសន្លឹកបៀទាំងអស់នៅក្នុងការចរចារកសន្តិភាពជាមួយប្រទេសអ៊ុយក្រែន ខណៈលោកបន្តហៅលោក ហ្សេឡេនស្គី និងប្រទេសអ៊ុយក្រែន ថាពិបាកធ្វើការជាមួយគ្នា។
តាមបណ្ដាញសារព័ត៌មាន BBC ដែលមានទីស្នាក់ការនៅប្រទេសអង់គ្លេស លោក ត្រាំ បានបញ្ជាក់ដូចនេះដោយថ្លែងចេញពីសេតវិមានកាលពីថ្ងៃសុក្រ ទី៧ មីនា។ លោក ត្រាំ បានរំលឹកថា សង្គ្រាមរបស់លោក ពូទីន នៅអ៊ុយក្រែន អាចនាំទៅរកសង្គ្រាមលោកទី៣ ខណៈលោកទាមទារឱ្យមានដំណោះស្រាយឆាប់បំផុតដើម្បីពន្លត់ភ្លើងសង្គ្រាមរុស្ស៊ី-អ៊ុយក្រែន។
ផ្ទុយទៅវិញ ទូរទស្សន៍អាមេរិកាំង ABC នៅថ្ងៃទី១០ ខែមីនា លោក ត្រាំ កាលពីថ្ងៃអាទិត្យ បានថ្លែងថា សហរដ្ឋអាមេរិកត្រៀមខ្លួននឹងចែករំលែកការណ៍សម្ងាត់គ្រប់ប្រភេទជាមួយនឹងប្រទេសអ៊ុយក្រែន វិញ បន្ទាប់ពីបានផ្អាកមិនចែកចាយទៅវិញទៅមកមួយរយៈក្នុងពេលដែលភាគីក្នុងជម្លោះ និងអ្នកជួយផ្សះផ្សាបម្រុងជួបគ្នាជាថ្មីនៅប្រទេសអារ៉ាប៊ីសាអ៊ូឌីត។
លោកថ្លែងប្រាប់អ្នកកាសែតពីក្នុងយន្តហោះប្រធានាធិបតី Airforce 1 ទៀតថា ប្រទេសអ៊ុយក្រែន-រុស្ស៊ី កំពុងត្រៀមបោះជំហានទៅមុខក្នុងទិសដៅរកសន្តិភាពហើយ។
ដំណាលពេលគ្នានេះ ប្រទេសរុស្ស៊ី ក៏បាញ់កាំជ្រួចស្រោចទៅលើប្រទេសអ៊ុយក្រែន ឥតឈប់ឈរដែរ ដែលអ្នកវិភាគថាទំនងដូចជាដាក់សម្ពាធឲ្យអ៊ុយក្រែន ប្រញាប់ទៅរកតុចរចា។
លោក ត្រាំ ប៉ុន្មានថ្ងៃមុនពោលដោយផ្តើមសម្ដីដូចនេះថា៖ ខ្ញុំដឹងច្បាស់ថា អ៊ុយក្រែនចង់ដោះស្រាយ តែប្រសិនបើមិនចង់ឱ្យមានដំណោះស្រាយទេ យើងនឹងលែងដឹងឮហើយ។ តាមខ្ញុំដឹង អ៊ុយក្រែនជាភាគីមួយពិបាកនិយាយណាស់។ លោកថា លោកចង់បញ្ចប់សង្គ្រាមរយៈពេល ៣ឆ្នាំកន្លងមកនេះ ប៉ុន្តែលោក ត្រាំ ក៏គំរាមដាក់ទណ្ឌកម្មលើប្រទេសរុស្ស៊ី ថ្មីទៀត នៅពេលឃើញរុស្ស៊ី បាញ់មីស៊ីលស្រោចទៅលើប្រទេសអ៊ុយក្រែន មុនកិច្ចចរចានៅប្រទេសអារ៉ាប៊ីសាអ៊ូឌីត នោះ។
នៅពេលអ្នកសារព័ត៌មានសួរថា តើមានជំនឿថាលោក ពូទីន ចង់រកសន្តិភាព? លោក ត្រាំ ឆ្លើយថា Yes គឺពិតណាស់ ខ្ញុំជឿជាក់លោក ពូទីន។
យ៉ាងណា លោក ត្រាំ នៅតែអះអាងថា លោក ពូទីន កំពុងគ្រប់គ្រងសន្លឹកបៀទាំងអស់នៅចំពោះមុខការចរចាសន្តិភាពជាមួយអ៊ុយក្រែន។ តាមលោក ត្រាំ ភាគីរុស្ស៊ី និងអ៊ុយក្រែន ចង់បានដំណោះស្រាយដូចគ្នា។ ដូចនេះ ត្រូវតែរួមគ្នាដោះស្រាយ។
មេដឹកនាំអ៊ុយក្រែន វិញ លោក ហ្សេឡេនស្គី ក៏បានបញ្ជាក់ជាថ្មីអំពីភាពចាំបាច់ត្រូវគោរពតាមគោលការណ៍ដែលថាបើកកិច្ចចរចាសន្តិភាពសម្រាប់អ៊ុយក្រែន ទាល់តែមានអ៊ុយក្រែន ចូលរួមជាមួយផងដែរ។
ទោះជាយ៉ាងណាក្ដី ដំណាលពេលដែលក្រុមមន្ត្រីអ៊ុយក្រែន និងអាមេរិកាំង បានឯកភាពគ្នានឹងបើកកិច្ចពិភាក្សាជាថ្មីនៅសប្តាហ៍នេះ លោក ហ្សេឡេនស្គី បានបង្ហាញក្តីសង្ឃឹមថា វានឹងអាចជាកិច្ចពិភាក្សាមួយប្រកបដោយអត្ថន័យ ដើម្បីឆ្ពោះទៅផ្សះផ្សាទំនាក់ទំនងឡើងវិញរវាងក្រុងវ៉ាស៊ីនតោន ក្រុងមូស្គូ ហើយនិងក្រុងគៀវ។
ជាមួយគ្នានេះ លោកបានអំពាវនាវសាជាថ្មីឲ្យបញ្ឈប់ការវាយប្រហារតាមអាកាសទៅវិញទៅមកលើហេដ្ឋារចនាសម្ព័ន្ធសំខាន់ៗ។
កាលពីថ្ងៃទី៧ មីនា លោក ហ្សេឡេនស្គី ក៏បានអំពាវនាវជាថ្មីម្ដងទៀតឱ្យមានបទឈប់បាញ់ជាបន្ទាន់នូវការវាយប្រហារលើលំហអាកាស ប៉ុន្តែការទទូចពីមេដឹកនាំអ៊ុយក្រែន ធ្វើតែប៉ុន្មានម៉ោងប៉ុណ្ណោះ បន្ទាប់ពីរុស្ស៊ី បើកការវាយប្រហារជាថ្មីទៀតកាលពីចន្លោះយប់ថ្ងៃសុក្រឈានចូលថ្ងៃសៅរ៍ ទី៨ ខែមីនា ដោយផ្តាច់ជីវិតមនុស្សយ៉ាងហោចណាស់ ១២នាក់។
រុស្ស៊ី បានវាយប្រហារលើតំបន់មួយចំនួនរបស់អ៊ុយក្រែន ដោយប្រើមីស៊ីលជិត ៦៩គ្រាប់ និងដ្រូនប្រហែល ២០០គ្រឿង។ តែការវាយប្រហាររបស់ក្រុងមូស្គូ ធ្វើឡើងក្រោយរយៈពេល ២ថ្ងៃដែលសហរដ្ឋអាមេរិកក្រោមរដ្ឋការលោក ត្រាំ សម្រេចកាត់ផ្ដាច់ផ្កាយរណបព័ត៌មានចារកម្មដែលបានផ្ដល់ឱ្យអ៊ុយក្រែន រយៈពេល ៣ឆ្នាំមកនេះ ធ្វើឱ្យអ៊ុយក្រែន លំបាកខ្លាំងក្នុងការចាប់សញ្ញាវាយប្រហារដោយមីស៊ីលរបស់រុស្ស៊ី លើលំហអាកាសប្រទេសអ៊ុយក្រែន។
លោក ត្រាំ បានបង្ហោះសារដែលមានសេចក្ដីដើមដូចនេះថា៖ ស្របពេលដែលរុស្ស៊ី កំពុងតែបន្តវាយប្រហារអ៊ុយក្រែន ឥតសំចៃដៃនៅលើអ៊ុយក្រែន នាពេលនេះ ខ្ញុំពិចារណាដាក់ទណ្ឌកម្មទ្រង់ទ្រាយធំផ្នែកធនាគារ និងទណ្ឌកម្មបន្ថែមផ្នែកផ្សេងៗទៀត ហើយនិងវិធានការពន្ធគយទៅលើរុស្ស៊ី រហូតទាល់តែមានការសម្រេចបាននូវបទឈប់បាញ់គ្នា និងកិច្ចព្រមព្រៀងសន្តិភាពចុងក្រោយ។
តែអ្នកសង្កេតការណ៍យល់ថា សារព្រមានរបស់លោក ត្រាំ ទៅលើក្រុងមូស្គូ ដូចជាមិនធ្វើឱ្យរុស្ស៊ី បារម្ភពេកទេ ព្រោះលោក ត្រាំ បានស្ដារទំនាក់ទំនងទ្វេភាគីជាមួយក្រុងមូស្គូ ឡើងវិញទៅហើយនោះ៕
© 2025, ឌឹ ខេមបូឌា ដេលី. All rights reserved.