ប្រធានាធិបតីរុស្ស៊ី លោក វ្ល៉ាឌីមៀ ពូទីន មិនយល់ព្រមជាមួយនឹងគំនិតនៃសំណើបទឈប់បាញ់នៅអ៊ុយក្រែន ដែលមានរយៈពេល ៣០ថ្ងៃ តែផ្ទុយទៅវិញ លោក ពូទីន បានកំណត់លក្ខខណ្ឌមួយចំនួនសម្រាប់បទឈប់បាញ់ដែលស្នើឡើងដោយសហរដ្ឋអាមេរិក ហើយយល់ព្រមពីអ៊ុយក្រែន។
ថ្លែងនៅឯសន្និសីទសារព័ត៌មានក្នុងទីក្រុងមូស្គូ កាលពីថ្ងៃព្រហស្បតិ៍ លោក ពូទីន បានលើកឡើងអំពីសំណើបទឈប់បាញ់ថា គំនិតនេះគឺត្រឹមត្រូវ ដែលរុស្ស៊ី គាំទ្រ ប៉ុន្តែចង់បានការលម្អិតបន្ថែមទៀតទៅនឹងលក្ខខណ្ឌមួយចំនួន។
ការលើកឡើងរបស់លោក ពូទីន ត្រូវមើលឃើញថា មើលទៅក្រុងមូស្គូ ដូចជាច្រានចោលការទាមទារឲ្យមានបទឈប់បាញ់គ្នាភ្លាមៗ ខណៈកងទ័ពរុស្ស៊ី កំពុងមានប្រៀបនៅសមរភូមិ។
លោក ពូទីន បញ្ជាក់ថា បទឈប់បាញ់គួរតែជាកិច្ចព្រមព្រៀងសន្តិភាពដែលស្ថិតស្ថេរយូរអង្វែង និងលុបបំបាត់ឫសគល់ពិតប្រាកដនៃសង្គ្រាមមួយនេះ ហើយសម្រាប់រុស្ស៊ី ត្រូវការចរចាជាមួយសហសេវិក និងដៃគូសហរដ្ឋអាមេរិក ដែលោក ពូទីន ថានឹងទូរសព្ទទៅកាន់លោក ដូណាល់ ត្រាំ។
ការបង្ហាញការគាំទ្ររបស់លោក ពូទីន ដែលមិនច្បាស់លាស់ចំពោះសំណើបទឈប់បាញ់របស់អាមេរិក ត្រូវបានគេមើលឃើញថាជាចេតនារបស់មេដឹកនាំវិមានក្រឹមឡាំង រូបនេះ ដែលចង់បញ្ជូនសញ្ញាប្រាប់ពីសុច្ឆន្ទៈទៅកាន់ទីក្រុងវ៉ាស៊ីនតោន និងបើកចំហទ្វារសម្រាប់កិច្ចចរចានៅពេលអនាគតជាមួយប្រធានាធិបតីអាមេរិក លោក ដូណាល់ ត្រាំ។
លោក ពូទីន បានបន្ថែមថា នៅមានសេចក្ដីលម្អិតសំខាន់ៗជាច្រើនមិនទាន់ត្រូវបានដោះស្រាយ ហើយថាកិច្ចព្រមព្រៀងណាមួយត្រូវតែដោះស្រាយឫសគល់នៃជម្លោះ។ នេះជាការបញ្ជាក់របស់លោក ពូទីន ប្រាប់ក្រុមអ្នកសារព័ត៌មាននៅឯវិមានក្រឹមឡាំង។
ប្រតិកម្មភ្លាមៗ លោកប្រធានាធិបតីអ៊ុយក្រែន វូឡូឌីមៀ ហ្សេឡេនស្គី បានចាត់ទុកការឆ្លើយតបរបស់លោក ពូទីន គឺជាឧបាយកល។
លោក ហ្សេឡេនស្គី បានអំពាវនាវឱ្យមានការដាក់ទណ្ឌកម្មបន្ថែមទៀតលើប្រទេសរុស្ស៊ី ដោយកុំឱ្យចាញ់ឧបាយកលនេះ។
ប៉ុន្តែលោក ពូទីន ចោទចំៗថា អ៊ុយក្រែន ត្រូវការបទឈប់បាញ់នេះដើម្បីពន្យារពេលប្រមូលកម្លាំងទ័ពដែលនៅសមរភូមិប៉ុណ្ណោះ។ លោក ពូទីន បញ្ជាក់ថា ចំពោះឫសគល់នៃបញ្ហា កន្លងមករុស្ស៊ី តែងលើកឡើងពីការពង្រីកខ្លួនរបស់អង្គការណាតូ (NATO) និងអធិបតេយ្យភាពរបស់អ៊ុយក្រែន។
នៅមុនពេលលោក ពូទីន ចេញមុខថ្លែងប្រាប់ក្រុមអ្នកសារព័ត៌មាន មានមន្ត្រីជាន់ខ្ពស់របស់វិមានក្រឹមឡាំង លោក Yuri Ushakov បានលើកឡើងថា បទឈប់បាញ់រយៈពេល ៣០ថ្ងៃនៅអ៊ុយក្រែន តាមសំណើរបស់អាមេរិក នឹងមិនផ្តល់ផលប្រយោជន៍ដល់រុស្ស៊ី ទេ ផ្ទុយទៅវិញនឹងផ្តល់ឱកាសឲ្យអ៊ុយក្រែន រៀបចំកម្លាំងឡើងវិញ។
ការលើកឡើងរបស់មន្ត្រីជំនួយការលោក ពូទីន ធ្វើឡើងបន្ទាប់ពីកងកម្លាំងរុស្ស៊ី ទទួលបានជោគជ័យក្នុងការវាយប្រហារនៅសមរភូមិ Kursk ស្របពេលប្រធានាធិបតីអាមេរិក លោក ដូណាល់ ត្រាំ បានផ្លាស់ប្ដូរគោលនយោបាយ ដោយចាប់ផ្តើមផ្ដល់ជំនួយយោធា និងបើកប្រព័ន្ធផ្កាយរណបចារកម្មយោធាទៅឱ្យអ៊ុយក្រែន វិញ។
ទំនងដូចនេះហើយបានជាលោក Ushakov ជំនួយការលោក ពូទីន បានបញ្ជាក់ថា សំណើបទឈប់បាញ់ត្រូវតែកែប្រែដើម្បីផលប្រយោជន៍រុស្ស៊ី។
លោក Yuri Ushakov ដែលជាអតីតឯកអគ្គរដ្ឋទូតរុស្ស៊ី ប្រចាំក្រុងវ៉ាស៊ីនតោន និងជាទីប្រឹក្សាគោលនយោបាយការបរទេសរបស់លោក ពូទីន បានថ្លែងទៅកាន់ទូរទស្សន៍រដ្ឋរុស្ស៊ី ថា លោកបាននិយាយជាមួយលោក Mike Waltz ទីប្រឹក្សាសន្តិសុខជាតិសហរដ្ឋអាមេរិក កាលពីថ្ងៃពុធ ដើម្បីបញ្ជាក់ជំហររបស់រុស្ស៊ី ថា បទឈប់បាញ់មិនគួរគ្រាន់តែជាការផ្អាកដើម្បីឲ្យយោធាអ៊ុយក្រែន រៀបចំកម្លាំងឡើងវិញនោះទេ ហើយសំណើនេះត្រូវតែកែប្រែដើម្បីគិតគូរពីផលប្រយោជន៍របស់រុស្ស៊ី។
លោកសង្កត់ធ្ងន់ថា កិច្ចព្រមព្រៀងនេះគ្មានផ្តល់អ្វីសោះសម្រាប់រុស្ស៊ី ក្រៅតែពីផ្ដល់ឱកាសឲ្យអ៊ុយក្រែន ប្រមូលផ្ដុំកម្លាំងឡើងវិញ។
បេសកជនពិសេសរបស់លោក ត្រាំ គឺលោក Steve Witkoff កាលពីថ្ងៃព្រហស្បតិ៍ បានធ្វើដំណើរទៅកាន់ទីក្រុងមូស្គូ ដើម្បីពិភាក្សាអំពីសំណើបទឈប់បាញ់នៅអ៊ុយក្រែន ខណៈប្រធានាធិបតីអាមេរិក លោក ដូណាល់ ត្រាំ បានសម្ដែងក្តីសង្ឃឹមថា រុស្ស៊ីនឹងយល់ព្រមលើបទឈប់បាញ់រយៈពេល ៣០ថ្ងៃដែលអ៊ុយក្រែន បានគាំទ្រ។
នៅក្នុងជំនួបនេះហើយដែលក្រុមទីប្រឹក្សាលោក ពូទីន បង្វិលសំណើសុំបទឈប់បាញ់ដែលមានរយៈពេលមួយខែទៅឱ្យក្រុងវ៉ាស៊ីនតោន វិញ ហើយប្រាប់ថាក្រុងមូស្គូ ចង់បន្ថែមខ្លឹមសារថែមទៀតដើម្បីធ្វើឱ្យមានតុល្យភាពឆ្លើយតបនឹងមូលហេតុដែលនាំឱ្យមានសង្គ្រាមនេះ៕
© 2025, ឌឹ ខេមបូឌា ដេលី. All rights reserved.