ប្រធានាធិបតីសហរដ្ឋអាមេរិក លោក ដូណាល់ ត្រាំ និងប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី បានប៉ះទង្គិចពាក្យសម្ដីគ្នាម្តងទៀតជុំវិញកិច្ចខិតខំប្រឹងប្រែងបញ្ចប់សង្គ្រាម ខណៈលោក ត្រាំ បន្ទោសលោក ហ្សេឡេនស្គី ដែលបដិសេធការទទួលស្គាល់ការកាន់កាប់ពីរុស្ស៊ី លើតំបន់គ្រីមៀរ។
នេះបើតាមសារព័ត៌មាន Japan Today ចុះផ្សាយនៅថ្ងៃព្រហស្បតិ៍ ទី២៤ ខែមេសា។
លោក ត្រាំ ដែលធ្លាប់ទាស់ពាក្យសម្ដីជាមួយលោក ហ្សេឡេនស្គី ម្តងហើយក្នុងកិច្ចប្រជុំនៅឯសេតវិមាន ហើយម្ដងនេះលោកចាត់ទុកជំហរលោក ហ្សេឡេនស្គី ថាធ្វើឱ្យកាន់តែពិបាកក្នុងការសម្រេចបានសន្តិភាព។
លោក ត្រាំ បញ្ជាក់ថា គ្មាននរណាគេស្នើឱ្យលោក ហ្សេឡេនស្គី ទទួលស្គាល់តំបន់គ្រីមៀរ ជាដែនដីរុស្ស៊ី នោះទេ ប៉ុន្តែលោក ត្រាំ ថាបើលោក ហ្សេឡេនស្គី ចង់បានគ្រីមៀរ មកវិញ ម្ដេចមិនប្រយុទ្ធយកដីនេះមកវិញ ព្រោះវាមានរយៈពេល ១១ឆ្នាំហើយដែលវាធ្លាក់ទៅក្នុងដៃរុស្ស៊ី។
តំបន់ជ្រោយគ្រីមៀរ គឺជាដែនដីមួយនៃសមុទ្រខ្មៅ។ ដែនដីមួយនេះបានធ្លាក់ក្នុងដៃរុស្ស៊ី ក្នុងខែកុម្ភៈ ឆ្នាំ២០១៤ តាមរយៈការបោះឆ្នោតប្រជាមតិក្លែងក្លាយដែលយល់ព្រមដោយលោក វ៉ិចទ័រ យ៉ានុកកូវិច ឋានៈប្រធានាធិបតីអ៊ុយក្រែន ក្នុងសម័យនោះ។ តែបើទោះជាដឹងថាតំបន់ជ្រោយមួយនេះមានប្រជាជនរុស្ស៊ី ជាង ៨០ភាគរយក៏ដោយ លោក វ៉ិចទ័រ យ៉ានុកកូវិច នៅតែយល់ព្រមឱ្យមានការបោះឆ្នោតប្រជាមតិ។
ទីបំផុត លទ្ធផលបោះឆ្នោតបង្ហាញថាជាង ៨០ភាគរយ យល់ព្រមលើកគ្រីមៀរ ដាក់ចំណុះក្រុងមូស្គូ។ ក្រោយពីសុខចិត្តក្បត់ជាតិខ្លួនឲ្យដីទៅរុស្ស៊ី លោក វ៉ិចទ័រ យ៉ានុកកូវិច និងគ្រួសារ ប្រពន្ធកូន រត់ទៅជ្រកកោននៅក្រុងមូស្គូ ខណៈប្រជាជន និងកងទ័ពអ៊ុយក្រែន ងើបឡើងបះបោរភ្លូកទឹកភ្លូកដីទាញទម្លាក់ពីអំណាច ហើយកាត់ទោសលោកអំពីបទក្បត់ជាតិសាសន៍អ៊ុយក្រែន។
លោក ហ្សេឡេនស្គី បានប្រកាសទាត់ចោលលក្ខខណ្ឌបង្ខំអ៊ុយក្រែន ទទួលស្គាល់ដែនដីគ្រីមៀរ ជារបស់រុស្ស៊ី ស្របច្បាប់ ដែលស្នើឡើងដោយលោក ដូណាល់ ត្រាំ។ លោក ហ្សេឡេនស្គី បានបញ្ជាក់ក្នុងសេចក្ដីថ្លែងការណ៍របស់លោកថា៖ «តាមស្មារតីនៃរដ្ឋធម្មនុញ្ញប្រទេសអ៊ុយក្រែន ទោះជាលោកមានឋានៈជាប្រធានាធិបតី តែបុគ្គលដូចរូបលោកមិនអាចរំលោភរដ្ឋធម្មនុញ្ញបានឡើយ។»
លោកបញ្ជាក់ទៀតថា រដ្ឋធម្មនុញ្ញបានចែងច្បាស់ណាស់ គឺមិនអនុញ្ញាតឱ្យបុគ្គលណាមួយ ទោះមានឋានៈអ្វីក៏ដោយ មិនអាចកាត់ច្រៀកទឹកដីអ៊ុយក្រែន ទៅឱ្យប្រទេសណាមួយបានឡើយ។
អ្នកសង្កេតការណ៍បានហៅសាររបស់លោក ហ្សេឡេនស្គី គឺជាការវាយសំពងដ៏ធ្ងន់ធ្ងរទៅជំហរមិនច្បាស់លាស់ខាងលោក ដូណាល់ ត្រាំ ចំពោះក្រុងមូស្គូ។ សារវាយចំអកនេះហើយដែលនាំឱ្យលោក ត្រាំ គំរាមបោះបង់ចោលផែនការសន្តិភាពដើម្បីបញ្ចប់សង្គ្រាមឈ្លានពានរបស់រុស្ស៊ី។ លោកថា ចាប់ពីពេលនេះ លោក ហ្សេឡេនស្គី ត្រូវជ្រើសរើសរវាងសន្តិភាព និងសង្គ្រាម។ លោកព្រមានទៀតថា បើសង្គ្រាមនៅតែបន្ត គឺប្រទេសអ៊ុយក្រែន នឹងត្រូវរុស្ស៊ី លេបយក។
អ្នកនាំពាក្យវិមានក្រឹមឡាំង លោក Dmitry Peskov បានសរសើរលោក ត្រាំ ដែលបានយល់ពីស្ថានភាពសង្គ្រាមនៅលើសមរភូមិ បញ្ជាក់ថាតំបន់ចំនួន ៤ ដែលកងទ័ពរុស្ស៊ី កំពុងកាន់កាប់មានដូចជា ខេត្ត Luhansk, ខេត្ត Donetsk, តំបន់ Kherson និង Zaporizhzhia ត្រូវតែជារបស់រុស្ស៊ី។
ជាមួយគ្នានេះដែរ អនុប្រធានាធិបតីសហរដ្ឋអាមេរិក លោក JD Vance បាននិយាយថា វាដល់ពេលហើយសម្រាប់រុស្ស៊ី និងអ៊ុយក្រែន ក្នុងការយល់ព្រមចំពោះសំណើសន្តិភាពរបស់សហរដ្ឋអាមេរិក ហើយបើពុំនោះទេ ចង់ឱ្យអាមេរិកដើរចេញពីដំណើរការសន្តិភាពនេះ។
ដំណាលគ្នាដែរ រដ្ឋមន្ត្រីការបរទេសសហរដ្ឋអាមេរិក លោក Marco Rubio ក៏បានលុបចោលផែនការចូលរួមកិច្ចចរចានៅទីក្រុងឡុងដ៍ ដែលជាកិច្ចប្រជុំដ៏សំខាន់មួយជាមួយរដ្ឋមន្ត្រីការបរទេសមកពីប្រទេសអ៊ុយក្រែន អង់គ្លេស បារាំង និងអាល្លឺម៉ង់។ លោក Marco Rubio ដែលប្រកាសមិនធ្វើដំណើរទៅទីក្រុងឡុងដ៍ បន្ទាប់ពីលោក ហ្សេឡេនស្គី ទាត់ចោលសំណើរបស់លោក ត្រាំ ដែលបង្ខំឱ្យអ៊ុយក្រែន ទទួលស្គាល់តំបន់គ្រីមៀរ ជាដែនដីស្របច្បាប់របស់រុស្ស៊ី។
ករណីដែនដីគ្រីមៀរ នេះ ឧបនាយករដ្ឋមន្ត្រីអ៊ុយក្រែន អ្នកស្រី Yulia Svyrydenko បាននិយាយថា អ៊ុយក្រែនត្រៀមខ្លួនរួចរាល់ដើម្បីចរចាសន្តិភាព ប៉ុន្តែមិនដើម្បីចុះចាញ់នោះទេ។ រីឯរដ្ឋមន្ត្រីការបរទេសនៃប្រទេសអ៊ុយក្រែន វិញ លោក Andrii Sybiha បាននិយាយថា អ៊ុយក្រែននៅតែបន្តប្ដេជ្ញាធ្វើការជាមួយសហរដ្ឋអាមេរិកក្នុងគោលដៅឆ្ពោះទៅរកទីបញ្ចប់ចំពោះសង្គ្រាមឈ្លានពានពីរុស្ស៊ី។
ជុំវិញស្ថានភាពសង្គ្រាម នៅថ្ងៃព្រហស្បតិ៍ ទី២៤ ខែមេសា មនុស្សយ៉ាងហោច ៩នាក់ ត្រូវបានសម្លាប់ និងជាង ៧០នាក់ទៀត បានរងរបួស ក្នុងការវាយប្រហារដោយមីស៊ីល និងដ្រូនរបស់រុស្ស៊ី លើរដ្ឋធានីគៀវ របស់អ៊ុយក្រែន។ កងទ័ពអាកាសអ៊ុយក្រែន ប្រកាសថា រុស្ស៊ីបានបាញ់មីស៊ីលយ៉ាងតិច ៧០គ្រាប់ និងដ្រូន ១៤៥គ្រឿង មកលើអ៊ុយក្រែន កាលពីអំឡុងវេលាយប់ថ្ងៃពុធ។ កាលពីថ្ងៃពុធ ការវាយប្រហារដោយយន្តហោះដ្រូនរបស់រុស្ស៊ី បានដៅចំរថយន្តក្រុង ១គ្រឿងនៅទីក្រុង Marhanets ក្នុងតំបន់ភាគខាងត្បូងនៃប្រទេសអ៊ុយក្រែន បណ្តាលឱ្យមនុស្សយ៉ាងតិច ៩នាក់ស្លាប់ និងជិត ៥០នាក់រងរបួស៕
© 2025, ឌឹ ខេមបូឌា ដេលី. All rights reserved.