គណៈកម្មាធិការសិទ្ធិមនុស្សកម្ពុជា អះអាងថា ការបិទព្រំដែនដោយឯកតោភាគីពីសំណាក់ភាគីថៃ គឺជាការរំលោភសិទ្ធិមនុស្សធ្ងន់ធ្ងរ។
គណៈកម្មាធិការសិទ្ធិមនុស្សកម្ពុជា ចេញសេចក្តីថ្លែងការណ៍នៅថ្ងៃទី២៦ មិថុនា នេះថា ការបិទព្រំដែនពីសំណាក់ប្រទេសថៃ ដែលមិនបានជូនដំណឹងដល់កម្ពុជាជាមុន បានប៉ះពាល់យ៉ាងធ្ងន់ធ្ងរដល់សិទ្ធិមនុស្ស និងសេរីភាពជាមូលដ្ឋានរបស់ពលរដ្ឋ ដូចជា សេរីភាពក្នុងការធ្វើដំណើរ សិទ្ធិមានជីវភាពរស់នៅសមរម្យ សិទ្ធិមានការងារធ្វើ សិទ្ធិទទួលព័ត៌មាន សិទ្ធិទទួលបានសុខភាព និងសិទ្ធិទទួលបានការអប់រំ។
ប្រភពដដែល លើកឡើងថា ការបិទព្រំដែនដោយឯកតោភាគីរបស់ថៃ គឺជាការរំលោភដល់សេរីភាពក្នុងការធ្វើដំណើរដែលបានចែងនៅក្នុងសេចក្តីប្រកាសជាសកលស្ដីពីសិទ្ធិមនុស្សមាត្រា១៣ និងកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយមាត្រា១២។ ជាងនេះទៀត ក៏ធ្វើឱ្យប៉ះពាល់ដល់កតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌ក្នុងមាត្រា១១។ បន្ថែមពីនេះ ក៏ធ្វើឱ្យប៉ះពាល់ដល់សេចក្តីប្រកាសជាសកលស្ដីពីសិទ្ធិមនុស្សមាត្រា២៣ និងកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌មាត្រា៦ ថែមទៀត។
គណៈកម្មាធិការដដែលនេះ បន្តថា ចំណែកឯមាត្រា១៩ ក្នុងកតិកាសញ្ញាស្ដីពីសិទ្ធិពលរដ្ឋ និងសិទ្ធិនយោបាយដែលចែងពីសិទ្ធិទទួលបានព័ត៌មាន ក៏រងនូវការរំលោភបំពានពីការបិទព្រំដែនពីសំណាក់ភាគីថៃ ដោយឯកតោភាគីនាពេលនេះដែរ។
មិនត្រឹមតែប៉ុណ្ណោះ ក៏បានធ្វើឱ្យប៉ះពាល់ដល់សិទ្ធិទទួលបានសុខភាព និងការអប់រំដែលត្រូវបានការពារដោយកតិកាសញ្ញាអន្តរជាតិស្ដីពីសិទ្ធិសេដ្ឋកិច្ច សង្គម និងវប្បធម៌មាត្រា១២ មាត្រា១៣ និងមាត្រា១៤ ថែមទៀត។
គណៈកម្មាធិការសិទ្ធិមនុស្សកម្ពុជា បញ្ជាក់ថា នៅពេលដែលច្រកព្រំដែនដែលមានសុវត្ថិភាព និងស្របច្បាប់ត្រូវបានបិទ នឹងបង្ខំឱ្យពលរដ្ឋប្រើប្រាស់មធ្យោបាយឆ្លងកាត់ព្រំដែនខុសច្បាប់ ជាពិសេសកម្មករដែលកំពុងត្រូវការការងារធ្វើ នឹងបង្កើនហានិភ័យនៃការជួញដូរមនុស្ស ជាពិសេសក្រុមជនងាយរងគ្រោះ ដូចជា ស្ត្រី កុមារ មនុស្សចាស់ និងជនមានពិការភាព ជាដើម។
មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស បានបង្ហាញរបាយការណ៍របស់ខ្លួននៅថ្ងៃទី២៦ មិថុនា នេះថា ពលករខ្មែរដែលធ្វើការក្នុងប្រទេសថៃ ជាង ១០០នាក់ (១០៥នាក់) រួមទាំងក្មេងៗ និងកុមារតូចៗផងនោះ ត្រូវបានប៉ូលិសថៃ ដឹកមកដាក់នៅច្រកព្រំដែនអន្តរជាតិប៉ោយប៉ែត នៅវេលាម៉ោង ៦ល្ងាច ថ្ងៃទី២៥ ខែមិថុនា នេះ បន្ទាប់ពីពលករទាំងនោះត្រូវដាក់ឱ្យរង់ចាំតាំងពីម៉ោង ៥ព្រឹកនៅស្រុកអារញ្ញ ខេត្តស្រះកែវ ប្រទេសថៃ។
អង្គការសង់ត្រាល់ អះអាងថា តាមការសង្កេតផ្ទាល់ពីក្រុមការងារស្មា (SMA) និងបណ្ដាញពលករ ព្រមទាំងបានសាកសួរពលករខ្មែរខ្លះដែលមិនមានឯកសារ កាលពីល្ងាចថ្ងៃដដែលនោះ បានឱ្យដឹងថា ពលករខ្មែរខ្លះត្រូវបានប៉ូលិសថៃ ទៅចាប់ដល់កន្លែងធ្វើការ ខណៈពលករខ្លះទៀតបានដើរពីកន្លែងធ្វើការមកកាន់ច្រកព្រំដែន ដើម្បីរង់ចាំឲ្យថៃ នាំពួកគេមកប្រទេសកម្ពុជាវិញ៕
© 2025, ឌឹ ខេមបូឌា ដេលី. All rights reserved.