ថ្មីៗនេះ ប្រធានាធិបតីសហរដ្ឋអាមេរិក ដូណាល់ ត្រាំ ព្រមានថា ប្រសិនបើប្រទេសរុស្ស៊ី មិនព្រមចូលរួមចរចារកសន្តិភាពជាមួយប្រទេសអ៊ុយក្រែន នៅក្នុងរយៈពេល ៥០ថ្ងៃទៀតនេះទេ សហរដ្ឋអាមេរិកនឹងដាក់ពន្ធធ្ងន់លើប្រទេសដែលបង្កសង្គ្រាមឈ្លានពានប្រទេសអ៊ុយក្រែន ហើយនិងប្រទេសមានទំនាក់ទំនងពាណិជ្ជកម្មជាមួយនឹងរុស្ស៊ី។
ជាមួយគ្នានេះ លោក ត្រាំ ក៏បានប្រកាសផ្តល់ជំនួយយោធាថ្មីៗដល់អ៊ុយក្រែន មានដូចជា ប្រព័ន្ធការពារដែនអាកាស និងអាវុធដែលអាចបាញ់ទៅដល់ទីក្រុងមូស្គូ។
វិធានការថ្មីនេះ បង្ហាញអំពីការប្រែប្រួលនយោបាយអាមេរិកាំងចំពោះរុស្ស៊ី និងជម្លោះនៅអ៊ុយក្រែន ប៉ុន្តែការប្រកាសរបស់លោក ត្រាំ អាចធ្វើឲ្យសេដ្ឋកិច្ចរុស្ស៊ី រងការប៉ះពាល់ធ្ងន់ធ្ងរជាមួយនឹងការដាក់ទណ្ឌកម្មទំហំទណ្ឌកម្ម ៥០០ភាគរយទៅលើប្រទេសទិញប្រេងរុស្ស៊ី ដែលពិតណាស់ ទណ្ឌកម្មនេះមិនត្រឹមប៉ះពាល់តែរុស្ស៊ី ទេ តែវាប៉ះពាល់ដល់ប្រទេសដែលទិញប្រេងពីរុស្ស៊ី ទៀត ជាពិសេសប្រទេសចិន។
ក្នុងរបត់ថ្មីនេះ ប្រធានាធិបតីចិន លោក ស៊ី ជីនពីង បានប្រកាសថា ប្រទេសទាំងពីរ ចិននិងរុស្ស៊ី ត្រូវពង្រឹងការជួយគាំទ្រគ្នាទៅវិញទៅមកឲ្យកាន់តែខ្លាំងឡើងថែមទៀត។ ការប្ដេជ្ញារបស់លោក ស៊ី ធ្វើឡើងនៅក្នុងជំនួបជាមួយរដ្ឋមន្ត្រីការបរទេសរុស្ស៊ី Sergei Lavrov ពោលគឺបន្ទាប់ពីប្រធានាធិបតីសហរដ្ឋអាមេរិក ដូណាល់ ត្រាំ បានព្រមានដាក់ទណ្ឌកម្មលើប្រទេសរុស្ស៊ី និងបង្ខំឲ្យរដ្ឋអំណាចក្រុងមូស្គូ បញ្ចប់សង្គ្រាមនៅអ៊ុយក្រែន។
ក្នុងជំនួបជាមួយប្រមុខការទូតរុស្ស៊ី លោក Sergei Lavrov នៅរដ្ឋធានីប៉េកាំង កាលពីថ្ងៃទី១៥ កក្កដា នៅចំពោះមុខប្រមុខការទូតរុស្ស៊ី លោក ប្រធានាធិបតីចិន បានប្រកាសថា ចិននិងរុស្ស៊ី ត្រូវបន្តបំពេញឲ្យបាននូវការប្រកាន់ខ្ជាប់ជំហររួមគ្នា ដែលលោកបានឯកភាពគ្នាជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន។ ចិននិងរុស្ស៊ី ក៏ត្រូវតែពង្រឹងការជួយជ្រោមជ្រែងគាំទ្រគ្នាទៅវិញទៅមកឲ្យកាន់តែខ្លាំងឡើងៗនៅលើឆាកអន្តរជាតិ។ នេះបើតាមសម្រង់សារព័ត៌មាននៃប្រទេសអ៊ុយក្រែន Kyiv Independent ដែលបានចុះផ្សាយនៅថ្ងៃទី១៦ កក្កដា។
ចាប់តាំងពីផ្ទុះសង្គ្រាមឈ្លានពានរបស់រុស្ស៊ី លើអ៊ុយក្រែន នៅខែកុម្ភៈ ឆ្នាំ២០២២ មក ប្រទេសចិន បានក្លាយជាសម្ព័ន្ធមិត្តការទូត និងជាដៃគូសេដ្ឋកិច្ចដ៏ជិតស្និទ្ធជាមួយប្រទេសរុស្ស៊ី ទោះជាមានចិត្តប្រកាន់ជំហរថាខ្លួនជារដ្ឋអព្យាក្រឹតចំពោះសង្គ្រាមរុស្ស៊ី និងអ៊ុយក្រែន ក៏ដោយ។
ដោយសារតែលោក ពូទីន ចេះតែធ្វើឱ្យលោក ត្រាំ ខកចិត្តជាច្រើនលើកច្រើនសាមកហើយ ទីបំផុត លោក ដូណាល់ ត្រាំ បានប្រកាសដាក់ឱសានវាទចំនួន ៥០ថ្ងៃឲ្យរុស្ស៊ី ស្វះស្វែងរកកិច្ចព្រមព្រៀងបិទបញ្ចប់សង្គ្រាមនៅអ៊ុយក្រែន តែបើមិនដូច្នោះទេ រុស្ស៊ីនឹងទទួលទណ្ឌកម្មយ៉ាងធ្ងន់ធ្ងរ។
ក្នុងជំនួបជាមួយលោក Mark Rutte អគ្គលេខាធិការអង្គការតូអង់ ឬណាតូ (NATO) នៅសេតវិមាន លោក ដូណាល់ ត្រាំ ក៏អះអាងថា ទណ្ឌកម្មពាណិជ្ជកម្មជាអាវុធដ៏ល្អបំផុតសម្រាប់ដោះស្រាយជម្លោះ។
កាលពីថ្ងៃពុធ ទី១៦ ខែកក្កដា នេះ លោក Mark Rutte បានព្រមានថា ប្រទេសមួយចំនួនដូចជា ប្រេស៊ីល ចិន និងឥណ្ឌា អាចនឹងទទួលរងទណ្ឌកម្មធ្ងន់ធ្ងរ ប្រសិនបើពួកគេនៅតែបន្តទំនាក់ទំនងធ្វើអាជីវកម្មជាមួយប្រទេសរុស្ស៊ី។
ថ្លែងប្រាប់ក្រុមអ្នកសារព័ត៌មានក្រោយជួបលោក ត្រាំ កាលពីថ្ងៃចន្ទ ដោយបានឯកភាពគ្នាចំពោះចំណាត់ការថ្មីនេះ លោក Mark Rutte បាននិយាយថា លោកលើកទឹកចិត្តឱ្យប្រទេសទាំងបីនេះ គឺចិន ឥណ្ឌា និងប្រេស៊ីល គួរតែដកខ្លួនពីការបន្តទិញប្រេងពីរុស្ស៊ី បើពុំនោះ នឹងត្រូវរងទណ្ឌកម្មធ្ងន់ធ្ងរ។
ចំពោះអឺរ៉ុប វិញ លោក Mark Rutte បាននិយាយថា អឺរ៉ុបនឹងស្វែងរកថវិកាដើម្បីធានាថា អ៊ុយក្រែនអាចស្ថិតនៅជំហរដ៏រឹងមាំក្នុងកិច្ចចរចាសន្តិភាព។ តាមអគ្គលេខាធិការអង្គការ NATO នៅក្រោមការព្រមព្រៀងគ្នាជាមួយលោក ត្រាំ សហរដ្ឋអាមេរិកកំពុងចាប់ផ្តើមផ្តល់ការគាំទ្រសព្វាវុធទ្រង់ទ្រាយធំឡើងវិញដល់ប្រទេសអ៊ុយក្រែន គឺមិនត្រឹមតែប្រព័ន្ធការពារដែនអាកាសទេ ថែមមានទាំងមីស៊ីល គ្រាប់រំសេវ អាវុធផ្សេងៗទៀត ជាពិសេសអាវុធវាយលុក ដែលលោកថានឹងធានាបង់ចំណាយថ្លៃដឹកជញ្ជូន និងចំណាយលើតម្លៃអាវុធទាំងនោះ ដោយការរ៉ាប់រងពីក្រុមប្រទេសនៅទ្វីបអឺរ៉ុបជាសមាជិកអង្គការ NATO។
អ្នកសង្កេតការណ៍បានហៅជំនួយយោធាទៅឲ្យប្រទេសអ៊ុយក្រែន លើកនេះ ជាជំនួយផ្ទាល់របស់ NATO ដែលទីក្រុងមូស្គូ តែងតែប្រឆាំងទម្រង់ផ្ដល់ជំនួយយោធាបែបនេះដល់ប្រទេសអ៊ុយក្រែន៕
© 2025, ឌឹ ខេមបូឌា ដេលី. All rights reserved.