 ស្នើឱ្យអាជ្ញាធរកម្ពុជា និងថៃ គោរពបទឈប់បាញ់ដោយស្មោះត្រង់ និងពេញលេញ ដោយកសាងនូវទំនុកចិត្តរវាងគ្នាឡើងវិញ បន្ទាប់ពីភាគីទាំងពីរបានព្រមព្រៀងលើបទឈប់បាញ់ភ្លាមៗ និងគ្មានលក្ខខណ្ឌ។){kind=link}
ការិយាល័យឧត្ដមស្នងការនៃអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ស្នើឱ្យអាជ្ញាធរកម្ពុជា និងថៃ គោរពបទឈប់បាញ់ដោយស្មោះត្រង់ និងពេញលេញ ដោយកសាងនូវទំនុកចិត្តរវាងគ្នាឡើងវិញ បន្ទាប់ពីភាគីទាំងពីរបានព្រមព្រៀងលើបទឈប់បាញ់ភ្លាមៗ និងគ្មានលក្ខខណ្ឌ។
យោងតាមសេចក្តីប្រកាសព័ត៌មានចុះថ្ងៃទី៣០ ខែកក្កដា ឆ្នាំ២០២៥ របស់ OHCHR ពីទីក្រុងហ្សឺណែវ ប្រទេសស្វីស ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក Volker Türk បានទទូចឱ្យភាគីកម្ពុជា-ថៃ គោរពបទឈប់បាញ់ និងអំពាវនាវឱ្យភាគីទាំងពីរការពារជនភៀសសឹកក្រោយការប្រយុទ្ធគ្នាដោយប្រដាប់អាវុធរយៈពេល ៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែកក្កដា។
ក្នុងសេចក្តីថ្លែងការណ៍ដដែល លោក Volker Türk ក៏បានស្នើផងដែរឱ្យភាគីទាំងពីរ ចាត់វិធានការប្រឆាំងនឹងព័ត៌មានក្លែងក្លាយ ព័ត៌មានញុះញង់ និងការបង្កើតសាច់រឿងបំភ្លៃពីជម្លោះព្រំដែនកម្ពុជា-ថៃ ផងដែរ។
លោកក៏បានស្នើឱ្យភាគីជម្លោះទាំងសងខាង គោរពបទឈប់បាញ់ឱ្យបានពេញលេញ និងស្មោះត្រង់ ក្នុងនោះរួមមានការស្ដារសន្តិសុខតាមព្រំដែន ការការពារជនរងគ្រោះ និងការសងសំណងទៅតាមច្បាប់ និងបទដ្ឋានសិទ្ធិមនុស្ស និងមនុស្សធម៌អន្តរជាតិ។
មកទល់ថ្ងៃទី៣១ ខែកក្កដា នេះ ជាថ្ងៃទី៣ ហើយដែលកម្ពុជា និងថៃ បានព្រមព្រៀងលើបទឈប់បាញ់ភ្លាមៗ និងគ្មានលក្ខខណ្ឌ ក្រោយកិច្ចប្រជុំពិសេសមួយកាលពីថ្ងៃទី២៨ ខែកក្កដា ដែលរៀបចំឡើងដោយនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម និងជាការផ្ដួចផ្ដើមដោយប្រធានាធិបតីអាមេរិក លោក ដូណាល់ ត្រាំ។
កិច្ចព្រមព្រៀងបទឈប់បាញ់នេះ បានធ្វើឡើងតាមសំណើរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ដែលបាននិយាយតាមទូរសព្ទជាមួយលោក ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជា និងនាយករដ្ឋមន្ត្រីស្ដីទីថៃ លោក ភូមិថាំ វេឆាយ៉ាឆៃ ដោយតម្រូវឱ្យមានបទឈប់បាញ់គ្នា បើកម្ពុជា និងថៃ ចង់បានកិច្ចព្រមព្រៀងពាណិជ្ជកម្មថ្មីជាមួយសហរដ្ឋអាមេរិក។
វិនាសកម្មដែលថៃ បានបើកការវាយប្រហារមកលើកម្ពុជា ទាំងកំរោល ដោយបានប្រើអាវុធធុនធ្ងន់ជាបន្តបន្ទាប់រួមមានយន្តហោះ F-16 ដ្រូន កាំភ្លើងត្បាល់ កាំភ្លើងធំ គ្រាប់បែកចង្កោម និងផ្សែងពុលជាដើម ដែលបានធ្វើឱ្យពលរដ្ឋខ្មែរប្រមាណជិត ១៧ម៉ឺននាក់ភៀសខ្លួនទៅកាន់កន្លែងមានសុវត្ថិភាព៕
© 2025, ឌឹ ខេមបូឌា ដេលី. All rights reserved.