កម្ពុជា បន្តជំរុញឱ្យភាគីថៃ ដោះលែងយោធិនកម្ពុជាចំនួន ១៨នាក់មកវិញជាបន្ទាន់ និងដោយឥតមានលក្ខខណ្ឌ ដោយទាមទារគោរពតាមស្មារតីដែលបានឯកភាពគ្នានូវលក្ខខណ្ឌទាំង ១៣ចំណុច បន្ទាប់ពីយោធិនកម្ពុជា ត្រូវបានភាគីថៃ ចាប់ខ្លួនរយៈពេល ២សប្តាហ៍កន្លងមក។
ថ្លែងនៅក្នុងសន្និសីទសារព័ត៌មាន នៅព្រឹកថ្ងៃទី១២ ខែសីហា អ្នកនាំពាក្យក្រសួងការពារជាតិ អ្នកស្រី ម៉ាលី សុជាតា បានលើកឡើងថា កម្ពុជាបន្តអំពាវនាវដល់ភាគីថៃ អនុវត្តទៅតាមកិច្ចព្រមព្រៀងខាងលើ និងប្រគល់ឱ្យមកកម្ពុជាវិញនូវកងកម្លាំងរបស់យើងចំនួន ១៨រូប ដើម្បីឱ្យពួកគាត់អាចវិលត្រឡប់មកជួបជុំគ្រួសារដែលកំពុងរង់ចាំ។
ប្រភពដដែលបានអះអាងថា កងយោធពលខេមរភូមិន្ទ សហគមន៍អន្តរជាតិនៅតែបន្តទាមទាររហូតដល់ភាគីថៃ បំពេញកាតព្វកិច្ចស្របតាមច្បាប់មនុស្សធម៌អន្តរជាតិ។ អ្នកស្រីថា រាជរដ្ឋាភិបាលកម្ពុជា នឹងមិនទុកសមាជិកគ្រួសារណាម្នាក់ចោល និងឯកាជាដាច់ខាត។
អ្នកនាំពាក្យក្រសួងការពារជាតិ បានបញ្ជាក់ពីការប្ដេជ្ញាជាថ្មីទៀតរបស់កម្ពុជា នៅក្នុងការបំពេញការងារប្រកបដោយស្មារតីស្ថាបនា ដោយស្មោះត្រង់ និងសហការយ៉ាងជិតស្និទ្ធជាមួយប្រទេសថៃ ប្រទេសម៉ាឡេស៊ី បណ្តាប្រទេសជាសមាជិកអាស៊ានដទៃទៀត និងដៃគូពាក់ព័ន្ធទាំងអស់ ដើម្បីធានាបាននូវបទឈប់បាញ់ប្រកបដោយប្រសិទ្ធភាព និងពេញលេញ និងដោះស្រាយវិវាទដោយសន្តិវិធី ស្របតាមច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន។
តាមការបញ្ជាក់របស់ក្រសួងការពារជាតិកម្ពុជា លោក Lloyd Gillett ប្រតិភូកងទ័ពថ្នាក់តំបន់នៃគណៈកម្មាធិការកាកបាទក្រហមអន្តរជាតិ ដែលបានចូលទៅជួបជាមួយទាហានកម្ពុជា ទាំង ១៨រូបដែលកំពុងឃុំខ្លួនដោយទាហានថៃ បានអះអាងថា ទាហានខ្មែរទាំង ១៨រូបដែលថៃ ឃុំខ្លួននោះ បច្ចុប្បន្នពួកគេមានសុវត្ថិភាព និងសុខភាពល្អទាំងអស់គ្នា។
អ្នកនាំពាក្យយោធាថៃ លោក Winthai Suvaree បានបញ្ជាក់ថា ថៃនឹងមិនដោះលែងទាហានខ្មែរទាំង ១៨នាក់នោះទេ ដរាបណាកម្ពុជាមិនឈប់ដាក់មីន។
នៅថ្ងៃទី១២ ខែសីហា នេះ អង្គការតម្លាភាពកម្ពុជា និងអង្គការសង្គមស៊ីវិលមួយចំនួន បានសម្ដែងនូវការព្រួយបារម្ភអំពីស្ថានភាពយោធិនខ្មែរចំនួន ១៨នាក់ ដែលត្រូវបានចាប់ខ្លួនដោយយោធាថៃ បន្ទាប់ពីបទឈប់បាញ់ត្រូវបានប្រកាស។
ក្រុមអង្គការសង្គមស៊ីវិលទាមទារឱ្យប្រទេសថៃ ដោះលែងយោធិនទាំងនេះជាបន្ទាន់ និងដោយគ្មានលក្ខខណ្ឌ ដោយសារមានការព្រួយបារម្ភអំពីសុខុមាលភាពផ្លូវកាយ និងផ្លូវចិត្តរបស់ពួកគេ ដោយផ្អែកលើស្ថានភាពទាហានពីរនាក់ដែលត្រូវបានដោះលែងពីមុន។
កាលពីព្រឹកថ្ងៃទី២៩ កក្កដា ក្រោយបទឈប់បាញ់រវាងកម្ពុជា-ថៃ បានចូលជាធរមាន ពួកទាហានថៃ បានចូលមកចាប់ខ្លួនទាហានកម្ពុជា នៅច្រកចុងតែ។ ឧត្ដមសេនីយ៍ទោ ច័ន្ទ សុភ័ត្រា មេបញ្ជាការតំបន់ប្រតិបត្តិការសឹករងខេត្តព្រះវិហារ បានអះអាងថា ហេតុការណ៍នេះបានកើតឡើងដោយទាហានថៃ បានហៅទាហានខ្មែរឲ្យមកថតរូបអនុស្សាវរីយ៍ជាមួយគ្នា តែភ្លាមៗនោះ ទាហានថៃ បានបញ្ជាឲ្យក្រុមខ្លួនដែលលាក់ខ្លួននៅក្នុងព្រៃ យកកាំភ្លើងភ្ជង់ និងចាប់ខ្លួនទាហានកម្ពុជាតែម្តង៕
© 2025, ឌឹ ខេមបូឌា ដេលី. All rights reserved.