អ្នកនាំពាក្យរាជរដ្ឋាភិបាលកម្ពុជា អះអាងថា បើកងទ័ពថៃ គោរពកិច្ចព្រមព្រៀងបទឈប់បាញ់បានខ្ជាប់ខ្ជួន ករណីផ្ទុះមីនក៏មិនអាចកើតមានដែរ ព្រោះកងទ័ពថៃ ជាអ្នកចល័តកម្លាំងដោយបំពានកិច្ចព្រមព្រៀង ទើបបានជាជាន់គ្រាប់មីនដែលនៅសល់ពីសង្គ្រាមក្នុងទឹកដីកម្ពុជា។
ថ្លែងក្នុងសន្និសីទសារព័ត៌មាន នៅថ្ងៃទី១៤ ខែសីហា នេះ លោក ប៉ែន បូណា អ្នកនាំពាក្យរដ្ឋាភិបាលកម្ពុជា អះអាងថា ភាគីថៃ កំពុងតែយករឿងផ្ទុះគ្រាប់មីនធ្វើជាប្រធានបទ ដើម្បីចោទទម្លាក់កំហុសលើកម្ពុជា ដោយតាំងខ្លួនជាអ្នករងគ្រោះ ដើម្បីបំភាន់សហគមន៍អន្តរជាតិ។
លោក ប៉ែន បូណា អំពាវនាវឱ្យភាគីថៃ គោរព និងអនុវត្តឱ្យបានម៉ឺងម៉ាត់ និងដោយស្មោះត្រង់ចំពោះកិច្ចព្រមព្រៀងឈប់បាញ់ដែលបានចូលជាធរមានចាប់ពីថ្ងៃទី២៨ ខែកក្កដា មក ដែលភាគីទាំងពីរបានព្រមព្រៀងនៅប្រទេសម៉ាឡេស៊ី នោះ។
អ្នកនាំពាក្យរូបនេះបញ្ជាក់ថា ការពង្រាយកង់ឡាន បន្លាលួស និងការចល័តសព្វាវុធរបស់កងទ័ពថៃ ចូលក្នុងទឹកដីកម្ពុជា គឺជាភស្តុតាងមិនអាចប្រកែកបានឡើយ ដែលទង្វើនេះគឺបានបំពានបទឈប់បាញ់ ត្រង់ចំណុចទី២ និងទី៤ នៃកំណត់ហេតុកិច្ចព្រមព្រៀងគ្នាក្នុងកិច្ចប្រជុំវិសាមញ្ញ (GBC) យ៉ាងធ្ងន់ធ្ងរ។
កាសែត The Nation ស្រង់សម្ដីអ្នកនាំពាក្យរដ្ឋាភិបាលថៃ លោក ជេរ៉ាយុ ហួងសាប់ (Jirayu Huangsab) នៅថ្ងៃទី១៤ សីហា នេះថា រដ្ឋាភិបាលថៃ បានចោទប្រកាន់កម្ពុជាជាផ្លូវការហើយពីការលួចលាក់គ្រាប់មីនប្រឆាំងមនុស្សនៅតាមព្រំដែន ដែលបំពានយ៉ាងធ្ងន់ធ្ងរដល់ច្បាប់អន្តរជាតិ និងគោលការណ៍មនុស្សធម៌។
ប្រភពដដែល អះអាងថា ទីក្រុងបាងកក កំពុងជូនដំណឹងដល់សហគមន៍អន្តរជាតិចំពោះសកម្មភាពដែលកម្ពុជា បានបំពានលើអនុសញ្ញាអូតាវ៉ាស្ដីពីគ្រាប់មីននេះ។
អ្នកនាំពាក្យរដ្ឋាភិបាលថៃ រូបនេះបញ្ជាក់ថា ថៃក៏គ្រោងនឹងរៀបចំដំណើរទស្សនកិច្ចសម្រាប់គណៈប្រតិភូការទូតមកពីប្រទេសដែលជាភាគីនៃអនុសញ្ញាអូតាវ៉ាទៅកាន់ខេត្តអុប៊ុន និងខេត្តស៊ីសាកេត នៅថ្ងៃទី១៦ សីហា ខាងមុខនេះផងដែរ ដើម្បីប្រមូលភស្តុតាងអំពីគ្រាប់មីនទាំងនោះ។
ទោះជាយ៉ាងណាក៏ដោយ អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា បានថ្លែងនៅក្នុងសន្និសីទសារព័ត៌មានកាលពីថ្ងៃទី១៣ ខែសីហា ដោយអំពាវនាវឱ្យភាគីថៃ គោរពលក្ខខណ្ឌកិច្ចព្រមព្រៀងបទឈប់បាញ់ និងស្មារតីនៃការឯកភាពគ្នានៅក្នុងកិច្ចប្រជុំគណៈកម្មាធិការព្រំដែនទូទៅ (GBC) ដែលក្នុងនោះរួមមានការព្រមព្រៀងគ្នារក្សាកម្លាំងយោធារបស់ខ្លួននៅក្នុងទីតាំងបច្ចុប្បន្ន ដោយមិនអនុញ្ញាតឱ្យផ្លាស់ទីពីទីតាំងដែលខ្លួនឈរជើង នៅមុនពេលកិច្ចព្រមព្រៀងបទឈប់បាញ់ចូលជាធរមាន នៅម៉ោង ១២ រំលងអាធ្រាត្រថ្ងៃទី២៨ ខែកក្កដា។
អ្នកស្រីបានលើកឡើងថា ពាក់ព័ន្ធនឹងករណីមីននេះ កម្ពុជាក៏ធ្លាប់រំឭកទៅភាគីថៃ ជាច្រើនលើកដែរថា តំបន់ប្រាសាទតាមាន់ បណ្តោយព្រំដែន គឺនៅមានគ្រាប់មីនដែលសេសសល់ពីសង្គ្រាម កម្ពុជាមិនមានការប្រើប្រាស់ និងមិនប្រើមីនថ្មីជាដាច់ខាត។
អ្នកស្រីបន្តថា កម្ពុជាជារដ្ឋភាគីនៃអនុសញ្ញាហាមប្រើប្រាស់មីនប្រឆាំងមនុស្ស (អនុសញ្ញាអូតាវ៉ា) ដែលកម្ពុជា បានផ្ដល់សច្ចាប័ននៅឆ្នាំ១៩៩៩ ហើយក៏ត្រូវបានទទួលស្គាល់ជាអន្តរជាតិចំពោះសមិទ្ធផលបោសសម្អាតមីន និងមិនប្រើប្រាស់មីនប្រឆាំងនឹងមនុស្សឡើយ។
អ្នកនាំពាក្យក្រសួងការពារជាតិកម្ពុជា រូបនេះ អះអាងថា មកទល់ពេលនេះ មិនមានការស៊ើបអង្កេតជាផ្លូវការ និងដោយតម្លាភាពណាមួយ ដើម្បីបញ្ជាក់ការពិតនៅឡើយទេ ពាក់ព័ន្ធនឹងករណីដែលទាហានថៃ បានជាន់មីនជាថ្មីទៀតនៅតំបន់ប្រាសាទតាមាន់ធំ៕
© 2025, ឌឹ ខេមបូឌា ដេលី. All rights reserved.