ពលរដ្ឋរស់នៅភូមិព្រែកច័ន្ទ ខេត្តបន្ទាយមានជ័យ ស្រែកយំអង្វរសុំឱ្យអន្តរជាតិ ជួយរកយុត្តិធម៌ ដោយសារតែផ្ទះសម្បែងរបស់ពួកគេត្រូវបានទាហានថៃ រាយបន្លាលួសហ៊ុមព័ទ្ធ។
ប្រជាពលរដ្ឋជាច្រើននាក់រស់នៅភូមិព្រែកច័ន្ទ ស្រុកអូរជ្រៅ ខេត្តបន្ទាយមានជ័យ ស្រែកយំអង្វរសុំឱ្យក្រុមអ្នកសង្កេតការណ៍អន្តរកាល (IOT) ដឹកនាំដោយអនុព័ន្ធយោធាម៉ាឡេស៊ី ជួយរកយុត្តិធម៌ បជន្ទាប់ពីផ្ទះសម្បែងរបស់ពួកគេត្រូវបានទាហានថៃ រាយបន្លាលួសហ៊ុមព័ទ្ធកាលពីរសៀលថ្ងៃពុធ នេះ។
កាលពីថ្ងៃទី១៣ ខែសីហា ឆ្នាំ២០២៥ ពលរដ្ឋខ្មែរជាច្រើននាក់ បានអះអាងថា កងទ័ពថៃ បានរាយបន្លាលួស និងប្រើសម្បកកង់ឡានហ៊ុមព័ទ្ធផ្ទះរបស់ពួកគាត់ដែលស្ថិតនៅភូមិព្រែកច័ន្ទ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
កាលពីថ្ងៃទី២៨ ខែកក្កដា ឆ្នាំ២០២៥ កម្ពុជា-ថៃ បានព្រមព្រៀងគ្នាលើបទឈប់បាញ់រហូតបង្កើតបាននូវលក្ខខណ្ឌចំនួន ១៣ចំណុចកាលពីថ្ងៃទី៧ ខែសីហា កន្លងទៅ ដែលក្នុងលក្ខខណ្ឌទាំងនោះ បានហាមប្រាមភាគីទាំងពីរមិនឱ្យវាយប្រហារលើជនស៊ីវិល និងគោលដៅយោធា រួមទាំងហាមមិនឱ្យចល័តកងទ័ពផងដែរ។
យ៉ាងណាក៏ដោយ រដ្ឋាភិបាលកម្ពុជា បានអះអាងថា ភាគីថៃ នៅតែបន្តរំលោភបំពានលើកម្ពុជា និងបទឈប់បាញ់នេះជាបន្តបន្ទាប់ ដោយការរាយបន្លាលួសចូលក្នុងទឹកដីកម្ពុជា ដូចជានៅច្រកអានសេះ ខេត្តព្រះវិហារ និងច្រកណងចាន់ ខេត្តបន្ទាយមានជ័យ ដោយព័ទ្ធយកផ្ទះពលរដ្ឋខ្មែរ ជាដើម។
ជុំវិញបញ្ហានេះ ទីភ្នាក់ងារសារព័ត៌មាន Reuters បានចុះផ្សាយនៅថ្ងៃទី១៤ សីហា នេះថា ក្នុងកិច្ចប្រជុំមេគង្គ-ឡានឆាង លើកទី១០ នៅប្រទេសចិន នៅថ្ងៃទី១៤ សីហា នេះ រដ្ឋមន្ត្រីការបរទេសចិន លោក វ៉ាង យី បានជំរុញឱ្យកម្ពុជា និងថៃ ដោះស្រាយជម្លោះព្រំដែនតាមកិច្ចសន្ទនា និងកិច្ចពិភាក្សាគ្នា។
ប្រភពដដែល អះអាងថា ចិនជឿជាក់លើភាគីទាំងពីរក្នុងការដោះស្រាយជម្លោះតាមរយៈកិច្ចសន្ទនា និងការចរចា ខណៈចិន ក៏គាំទ្រអាស៊ានក្នុងការដើរតួនាទីប្រកបដោយភាពវិជ្ជមានលើជម្លោះព្រំដែនកម្ពុជា-ថៃ ដើម្បីការរួបរួមរបស់អាស៊ានផងដែរ។
លោក វ៉ាង យី បញ្ជាក់ថា ចិនក៏គាំទ្រដល់ប្រទេសទាំងពីរក្នុងការពង្រឹងកិច្ចសន្ទនាដែរ ដោយសង្ឃឹមថា កម្ពុជា-ថៃ អាចកសាងទំនុកចិត្តរវាងគ្នានិងគ្នា ក៏ដូចជាស្ដារមិត្តភាពឡើងវិញបន្តទៀត។
ជុំវិញបញ្ហានេះ អ្នកនាំពាក្យក្រសួងការពារជាតិកម្ពុជា អ្នកស្រី ម៉ាលី សុជាតា បញ្ជាក់ក្នុងសន្និសីទសារព័ត៌មាននៅថ្ងៃទី១៤ សីហា នេះថា កម្ពុជាប្ដេជ្ញាធ្វើការប្រកបដោយស្មារតីស្ថាបនា ដោយស្មោះត្រង់ ដើម្បីធានាការអនុវត្តបទឈប់បាញ់ប្រកបដោយប្រសិទ្ធភាព និងដោះស្រាយរាល់វិវាទដោយសន្តិវិធី ស្របតាមច្បាប់អន្តរជាតិ ធម្មនុញ្ញអង្គការសហប្រជាជាតិ និងធម្មនុញ្ញអាស៊ាន៕
© 2025, ឌឹ ខេមបូឌា ដេលី. All rights reserved.