ពលរដ្ឋខ្មែររាប់រយនាក់ ប្រមូលផ្ដុំប្រឆាំងតវ៉ា និងបណ្តេញកងទ័ពថៃ មិនឱ្យចូលទៅរាយបន្លាលួសក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ឡើយ។
សារព័ត៌មានក្នុងស្រុក SBT News បានផ្សាយផ្ទាល់លើបណ្ដាញសង្គមហ្វេសប៊ុក នៅថ្ងៃទី២៦ សីហា នេះ អំពីសកម្មភាពតវ៉ារបស់ពលរដ្ឋខ្មែរដែលនាំគ្នាប្រឆាំងតវ៉ាការរាយបន្លាលួសរបស់កងទ័ពថៃ ដែលប៉ុនប៉ងចូលទៅរាយបន្លាលួសសាជាថ្មីក្នុងភូមិជោគជ័យ ស្រុកអូរជ្រៅ ខេត្តបន្ទាយមានជ័យ នោះ។
តាមរយៈវីដេអូផ្សាយផ្ទាល់ បង្ហាញឱ្យឃើញអំពីពលរដ្ឋខ្មែររាប់រយនាក់បានប្រមូលផ្ដុំនៅភូមិជោគជ័យ ក្នុងខេត្តបន្ទាយមានជ័យ ដើម្បីរារាំងកងទ័ពថៃ មិនឱ្យរាយបន្លាលួសចូលក្នុងទឹកដីខ្មែរ។
ចំណែកសារព័ត៌មាន ខៅស៊ុត របស់ថៃ (Khaosod) បានស្រង់សម្ដីនាយករដ្ឋមន្ត្រីស្តីទីថៃ លោក ភូមិថាំ វិឆាយាឆៃ នៅថ្ងៃទី២៦ សីហា នេះថា ចំពោះកម្ពុជាដែលបានដាក់សម្ពាធបង្ខំឱ្យថៃ រុះរើរបងបន្លាលួសចេញ លោកគ្មានសិទ្ធិសម្រេចលើរឿងនេះទេ។
នាយករដ្ឋមន្ត្រីរូបនេះបញ្ជាក់ថា បច្ចុប្បន្ន រដ្ឋាភិបាលថៃ បានប្រគល់សិទ្ធិការពារព្រំដែនឱ្យកងទ័ពថៃ ជាអ្នកដោះស្រាយអស់ហើយ ខណៈការរាយបន្លាលួសពីសំណាក់កងទ័ពថៃ នាពេលនេះ គឺធ្វើឡើងដោយត្រឹមត្រូវស្របតាមកិច្ចព្រមព្រៀងនៃបទឈប់បាញ់នៅប្រទេសម៉ាឡេស៊ី ទាំងអស់។
ជុំវិញបញ្ហានេះ រដ្ឋមន្ត្រីក្រសួងការពារជាតិកម្ពុជា លោក ទៀ សីហា បានសរសេរលើទំព័រហ្វេសប៊ុករបស់លោនៅថ្ងៃទី២៦ សីហា នេះថា កងកម្លាំងកម្ពុជាមិនបានបំពាក់ប្រដាប់ដោយអាវុធនៅទីតាំងកើតហេតុក្នុងភូមិជោគជ័យ ឃុំអូរបីជាន់ នោះទេ ដើម្បីបង្ហាញពីប្ដេជ្ញាចិត្តក្នុងការអនុវត្តបទឈប់បាញ់ឱ្យមានប្រសិទ្ធភាព ដូច្នេះសូមពលរដ្ឋមេត្តាយោគយល់ពីទឹកចិត្តកងកម្លាំងកម្ពុជានៅទីតាំងកើតហេតុ និងរួមគ្នាអត់ធ្មត់ដើម្បីប្រយោជន៍ជាតិ។
លោក ទៀ សីហា លើកឡើងថា ពេលនេះការដោះស្រាយជម្លោះព្រំដែនកម្ពុជា-ថៃ គឺត្រូវធ្វើឡើងជាបន្តបន្ទាប់ទៀត ដូចជា កិច្ចប្រជុំវិសាមញ្ញ RBC រវាងយោធភូមិភាគទី៤ របស់កម្ពុជា និងយោធភូមិភាគទី២ របស់ថៃ នៅថ្ងៃទី២៧ ខែសីហា និងកិច្ចប្រជុំ GBC នៅរាជធានីភ្នំពេញ នៅថ្ងៃទី៩ និងថ្ងៃទី១០ ខែកញ្ញា នោះ។
រដ្ឋមន្ត្រីក្រសួងការពារជាតិរូបនេះបញ្ជាក់ថា ការការពារប្រទេសជាតិ ការការពារព្រំដែន មិនមែនជារឿងតូចតាចទេ ហើយក៏គ្មានថ្នាក់ដឹកនាំខ្មែរណាយកប្រជាជនជាខែល ឬជាឈ្នាន់ដើម្បីការពារផលប្រយោជន៍ខ្លួនឡើយ។
នៅថ្ងៃទី២៦ ខែសីហា នេះ ក្រុមអ្នកសង្កេតការណ៍អន្តរកាល (IOT) ដែលមានតំណាងចូលរួម ៥ប្រទេស រួមមាន ម៉ាឡេស៊ី ឥណ្ឌូនេស៊ី ឡាវ ហ្វីលីពីន និងវៀតណាម ដឹកនាំដោយអនុព័ន្ធយោធាម៉ាឡេស៊ី បានចុះទៅពិនិត្យជាក់ស្ដែងនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលត្រូវទាហានថៃ ចូលមកឡោមព័ទ្ធ និងរាយលួសបន្លាយកដី ព្រមទាំងផ្ទះប្រជាពលរដ្ឋខ្មែរជាច្រើនគ្រួសារនោះ។
កាលពីថ្ងៃទី២៥ ខែសីហា ឆ្នាំ២០២៥ នៅវេលាម៉ោង ០២ និង ២០នាទី យោធាថៃ ប្រដាប់ដោយអាវុធ រួមទាំងឧបករណ៍បញ្ចេញរលកសំឡេង (Long Range Acoustic Device) បានចូលមករាយលួសបន្លានៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលមានភូមិសាស្ត្រទល់មុខនឹងភូមិណងចាន់ ឃុំខកសុខ ខេត្តស្រះកែវ ប្រទេសថៃ។
ពលរដ្ឋដែលជាម្ចាស់ដីនៅទីតាំងនោះ រួមមានជនពិការ ស្ត្រីមានផ្ទៃពោះ និងស្ត្រីពកូន ជាដើម បានរួមកម្លាំងគ្នាប្រឆាំងតវ៉ាមិនឱ្យទាហានថៃ រាយបន្លាលួសបន្តទៀត និងបានរុះរើបន្លាដែលទាហានថៃ ទើបនឹងដាក់ពង្រាយចេញផងដែរ៕
© 2025, ឌឹ ខេមបូឌា ដេលី. All rights reserved.