ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបញ្ជាក់ជាថ្មីម្ដងទៀតថា លោកត្រៀមខ្លួនរួចរាល់ហើយក្នុងការជួបពិភាក្សាជាមួយលោក វូឡូឌីមៀ ហ្សេឡេនស្គី ប្រសិនបើប្រធានាធិបតីអ៊ុយក្រែន រូបនេះ យល់ព្រមទៅជួបលោកនៅទីក្រុងមូស្គូ។ នេះបើយោងតាមការចុះផ្សាយដោយបណ្ដាញផ្សាយព័ត៌មាន MSN នៅថ្ងៃទី៤ ខែកញ្ញា ឆ្នាំ២០២៥។
ថ្លែងចេញពីប្រទេសចិន ក្រោយបញ្ចប់ដំណើរទស្សនកិច្ចរបស់លោក លោក ពូទីន បានសង្កត់ធ្ងន់ថា៖ ការជួបជាមួយលោក ហ្សេឡេនស្គី សម្រាប់រូបលោកមិនដែលច្រានចោលលទ្ធភាពនៃជំនួបនេះទេ។ ប៉ុន្តែលោកសួរថា តើវាមានប្រយោជន៍អ្វីទេសម្រាប់រុស្ស៊ី?។
លោក ពូទីន បានរំលឹកពីជំហរវិមានក្រឹមឡាំង ថា ជំនួបបែបនេះត្រូវតែធ្វើឲ្យបានរៀបចំយ៉ាងល្អជាមុនសិន ដែលថាបើត្រូវជួបគ្នា គឺត្រូវតែនាំមកនូវលទ្ធផលពិតប្រាកដ។
តែជាមួយគ្នានេះ ប្រធានាធិបតីរុស្ស៊ី លោក វ្ល៉ាឌីមៀ ពូទីន រូបនេះ នៅតែបន្តដាក់លក្ខខណ្ឌថា អ៊ុយក្រែន ត្រូវតែរៀបចំការបោះឆ្នោត និងធ្វើប្រជាមតិអំពីបញ្ហាទឹកដី និងបោះបង់ការប្រយុទ្ធ ប្រសិនបើចង់ឲ្យមានវឌ្ឍនភាពណាមួយកើតឡើង។
ការថ្លែងរបស់លោក ពូទីន ធ្វើឡើងមួយថ្ងៃបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានសម្ដែងការខកចិត្តនឹងលោក ដែលបង្ហាញភាពស្និទ្ធស្នាលខ្លាំងជាមួយប្រធានាធិបតីចិន ស៊ី ជីនពីង នៅឯទីក្រុងប៉េកាំង អំឡុងពេលលោកចូលរួមរំលឹកខួប ៨០ឆ្នាំនៃការបិទបញ្ចប់សង្គ្រាមលោកលើកទី២ ដែលអាណាចក្រជប៉ុន ចាញ់សង្គ្រាមត្រួតត្រាលើប្រទេសចិន និងតំបន់អាស៊ី។
លោក ត្រាំ បានហៅកាយវិការលោក ពូទីន នៅទីក្រុងប៉េកាំង គឺរឿងភូតភរលោក ព្រោះតែលោក ពូទីន ចាត់ទុករូបលោកជាមេដឹកនាំសហរដ្ឋអាមេរិក ដែលធ្វើឱ្យមានការទុកចិត្ត និងចូលចិត្តជាងគេ ហើយលើសមេដឹកនាំប្រទេសណាទាំងអស់។ លោក ត្រាំ បានគំរាមថានឹងមានអ្វីមួយកើតឡើងទៅលើរុស្ស៊ី ឆាប់ៗនេះ។
នៅទីក្រុងប៉េកាំង នាឱកាសបិទបញ្ចប់ដំណើរទស្សនកិច្ច លោក ពូទីន បាននិយាយថា លោកមើលឃើញឱកាសបិទបញ្ចប់សង្គ្រាមនៅតែមាន ដែលលោកថាព្រោះជាកិច្ចប្រឹងប្រែងដ៏ស្មោះត្រង់ពីសហរដ្ឋអាមេរិក ក្រោមការដឹកនាំរបស់លោក ដូណាល់ ត្រាំ។
លោក ពូទីន បញ្ជាក់ដូចនេះថា៖ សម្រាប់ខ្ញុំ ប្រសិនបើអាចទទួលយកបាន វាមានន័យថាអាចទៅរួចក្នុងការព្រមព្រៀងលើដំណោះស្រាយមួយដើម្បីបញ្ចប់ជម្លោះនេះ។ ជាពិសេស យើងបានឃើញភាពស្មោះត្រង់របស់រដ្ឋការលោកប្រធានាធិបតី ដូណាល់ ត្រាំ ដែលធ្វើឱ្យរុស្ស៊ី មើលឃើញការបញ្ចប់សង្គ្រាមអាចចេញពីការចរចា តែបើពុំនោះទេ មានតែការបញ្ចប់ដោយកម្លាំងទ័ព។
ចំពោះក្រុមប្រទេសនៅទ្វីបអឺរ៉ុប ដែលកំពុងរៀបចំផែនការបញ្ជូនទ័ពទៅអ៊ុយក្រែន ក្រោមគោលការណ៍ការពារសន្តិសុខសម្រាប់អ៊ុយក្រែន នៅថ្ងៃទី៤ កញ្ញា នេះ អ្នកនាំពាក្យក្រសួងការបរទេសរុស្ស៊ី អ្នកស្រី Maria Zakharova បន្តលើកឡើងថា រុស្ស៊ីគ្មានផែនការពិភាក្សាអំពីប្រធានបទទាក់ទងនឹងកងទ័ពបរទេសត្រូវដាក់ពង្រាយនៅអ៊ុយក្រែន នោះទេ ទោះកាលៈទេសៈណាក៏ដោយ។ អ្នកស្រី Maria Zakharova ចាត់ទុកជារឿងមិនអាចទទួលយកបានឡើយ។
ស្ត្រីអ្នកនាំពាក្យក្រសួងការបរទេសរុស្ស៊ី រូបនេះ បានឆ្លើយតបចំពោះប្រធានគណៈកម្មការអឺរ៉ុប អ្នកស្រី Ursula von der Leyen ដែលបានលើកឡើងអំពីផែនការបញ្ជូនកងទ័ពអឺរ៉ុបទៅអ៊ុយក្រែន ខណៈអ្នកស្រីប្រាប់ក្រុមអ្នកសារព័ត៌មានថា រុស្ស៊ីនឹងមិននិយាយអំពីកិច្ចអន្តរាគមន៍ពីកងទ័ពបរទេសនៅអ៊ុយក្រែន ទេ ទោះជាស្ថិតក្រោមលក្ខខណ្ឌជាមូលដ្ឋាន និងសន្តិសុខណាមួយក៏ដោយ ព្រោះជាកងទ័ពបរទេសពីក្រុម NATO។
អ្នកស្រី Von der Leyen បាននិយាយថា អឺរ៉ុបកំពុងរៀបចំផែនការដាក់ពង្រាយកងទ័ពចម្រុះជាតិសាសន៍ទៅអ៊ុយក្រែន ជាផ្នែកមួយនៃការធានាសន្តិសុខក្រោយសង្គ្រាម ហើយក៏នឹងមានការគាំទ្រពីសហរដ្ឋអាមេរិកផងដែរ។
កន្លងមក តាមការអះអាងរបស់មន្ត្រីការទូតអឺរ៉ុប មានជាង ១០ប្រទេសក្នុងចំណោមជាង ៣០ប្រទេសបានសន្យាថានឹងបញ្ជូនទ័ពរបស់ពួកគេទៅអ៊ុយក្រែន ក្នុងនោះក៏មានប្រទេសជប៉ុន ប្រទេសអូស្ត្រាលី ផងដែរ។ តែជំហានដំបូង គឺប្រទេសអង់គ្លេស បារាំង នឹងបញ្ជូនទ័ពចំនួន ៣ម៉ឺននាក់នាំមុខគេទៅកាន់ប្រទេសអ៊ុយក្រែន នៅក្រោយពេលដែលអ៊ុយក្រែន និងរុស្ស៊ី ព្រមបិទបញ្ចប់សង្គ្រាមជាមួយគ្នា។
ចំណែកសហរដ្ឋអាមេរិកនៅក្រោមរដ្ឋការលោក ដូណាល់ ត្រាំ ប្រកាសថាក្រុងវ៉ាស៊ីនតោន ក៏ចូលរួមចំណែកផងដែរ តែបញ្ជូនតែកងយន្តហោះល្បាត និងយន្តហោះស៊ើបការណ៍ជួយល្បាតតាមឃ្លាំមើលសកម្មភាពកងទ័ពរុស្ស៊ី នៅតំបន់សមុទ្រខ្មៅ និងតំបន់សមុទ្របាល់ទិច៕
© 2025, ឌឹ ខេមបូឌា ដេលី. All rights reserved.