អតីតមេធាវីនៃសាលាក្ដីខ្មែរក្រហម ចាត់ទុកមហាអំណាចចិន ជាសម្ព័ន្ធមិត្តដ៏ចង្រៃបំផុតដែលទំនងជាខ្លួនមួយចង់ជិះទូកពីរ ទាំងថៃ និងកម្ពុជា ជាពិសេសការធ្វើសមយុទ្ធយោធារវាងចិន និងថៃ ក្នុងពេលកម្ពុជា មានជម្លោះព្រំដែនជាមួយថៃ នាពេលនេះ។
អតីតមេធាវីសាលាក្ដីខ្មែរក្រហម លោក កង ឫទ្ធិគិរី សរសេរលើគណនីហ្វេសប៊ុករបស់ខ្លួននៅថ្ងៃទី១៧ កញ្ញា នេះថា ចិនទំនងជាចង់ដណ្តើមតំណែងជាអ្នកដឹកនាំសណ្ដាប់ធ្នាប់ពិភពលោកថ្មីមួយទាំងផ្នែកសេដ្ឋកិច្ច និងយោធា ទៅថ្ងៃអនាគត។
លោក កង ឫទ្ធិគិរី លើកឡើងថា ទាំងកម្ពុជា និងថៃ សុទ្ធតែបានទិញអាវុធរបស់ចិន ប៉ុន្តែសង្គ្រាម ៥ថ្ងៃ ថៃបានប្រើយន្តហោះបស្ចិមប្រទេសផង និងយន្តហោះអាមេរិកផង ខណៈកម្ពុជា ប្រើប្រព័ន្ធការពារដែនអាកាសរបស់រុស្ស៊ី និងចិន ប៉ុណ្ណោះ។
អតីតមេធាវីរូបនេះបញ្ជាក់ថា សង្គ្រាម ៥ថ្ងៃរវាងកម្ពុជា-ថៃ ត្រូវសហរដ្ឋអាមេរិកអន្តរាគមន៍ខ្លាំងឱ្យមានបទឈប់បាញ់ ប៉ុន្តែចិន ដូចជារារែកក្នុងការអន្តរាគមន៍ចំពោះសង្គ្រាមមួយនេះ ដែលខុសពីឆ្នាំ២០០៨ ដែលចិន បានបង្ហាញជំហរច្បាស់លាស់ថានៅខាងកម្ពុជា ក្នុងពេលដែលកម្ពុជា មានជម្លោះព្រំដែនជាមួយថៃ នាពេលនោះ។
កាលពីថ្ងៃទី១៥ ខែកញ្ញា សារព័ត៌មានរដ្ឋចិន ស៊ិនហួ (Xinhua) បានចុះផ្សាយថា ចិននិងថៃ បានកំណត់ពេលធ្វើសមយុទ្ធហ្វឹកហ្វឺនកងទ័ពដែនអាកាសរួមគ្នារហូតដល់ដំណាច់ខែកញ្ញា ដែលធ្វើឡើងក្នុងប្រទេសថៃ ដោយដាក់ឈ្មោះថា «ការវាយប្រហាររបស់សត្វស្ទាំង ឬ Falcon Strike»។
ប្រភពដដែលបញ្ជាក់ថា ចិននឹងបញ្ជូនយន្តហោះយោធាជាច្រើនប្រភេទ និងកងទ័ពការពារដែនអាកាស ដើម្បីចូលរួមហ្វឹកហ្វឺនសមយុទ្ធនេះ ក្នុងនោះ ចិនក៏បានបញ្ជូនយន្តហោះ J10C ដែរ ដើម្បីសាកកម្លាំងយន្តហោះ Gripen ដែលថៃ បានទិញពីប្រទេសស៊ុយអែត ហើយក៏ជាយន្តហោះដែលថៃ បានវាយប្រហារលើកម្ពុជា ដែរ។
យ៉ាងណាក៏ដោយ ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា លោក វ៉ាង វិនពីន (WANG Wenbin) បានសរសេរនៅលើទំព័រហ្វេសប៊ុករបស់ខ្លួននៅថ្ងៃទី១៧ កញ្ញា នេះថា ភាគីចិន បានឃាត់ និងជំរុញឱ្យមានកិច្ចពិភាក្សាយ៉ាងសកម្មជុំវិញជម្លោះព្រំដែនរវាងកម្ពុជា-ថៃ ដែលបានកើតឡើងតាំងពីដំបូងមកម្ល៉េះ។
លោក វ៉ាង វិនពីន លើកឡើងថា កម្ពុជានិងថៃ គឺជាអ្នកជិតខាងល្អ ហើយមិនមានឧបសគ្គ ឬបញ្ហាណាដែលមិនអាចដោះស្រាយបានរវាងប្រទេសទាំងពីរនោះទេ ចំណែកចិន សង្ឃឹមថាភាគីទាំងពីរនឹងចាប់យកឱកាសនេះ ដើម្បីពន្លឿនដំណើរការផ្សះផ្សាគ្នាបញ្ចប់បញ្ហា។
ជុំវិញបញ្ហានេះ ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី១៦ កញ្ញា នេះថា ការប្រកាសសមយុទ្ធយោធារវាងចិន និងថៃ នាពេលនេះ ក៏ទំនងជាធ្វើឱ្យភាគីកម្ពុជា ខកចិត្តចំពោះមិត្តដែកថែបចិន ដែរ។
ចំណែកប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា បានលើកឡើងកាលពីថ្ងៃទី១៦ កញ្ញា ថា មិត្តភាពដែកថែបរវាងកម្ពុជា និងចិន មិនមែនជាមិត្តចងដៃចងជើងមិនឱ្យពង្រឹងទំនាក់ទំនងជាមួយប្រទេសដទៃនោះទេ ត្បិតទំនាក់ទំនងអន្តរជាតិគ្មានមិត្ត គ្មានសត្រូវឡើយ គឺមានតែផលប្រយោជន៍ប៉ុណ្ណោះ៕
© 2025, ឌឹ ខេមបូឌា ដេលី. All rights reserved.