 បាននិយាយនៅថ្ងៃទី១៥ ខែធ្នូ ឆ្នាំ២០២៥ នេះថា កិច្ចប្រជុំពិសេសថ្នាក់រដ្ឋមន្ត្រីការបរទេសអាស៊ាន ជុំវិញសង្គ្រាមថៃ-កម្ពុជា ដែលត្រូវធ្វើឡើងនៅថ្ងៃទី១៦ ធ្នូ នេះ ត្រូវបានលើកពេល ខណៈលោកបារម្ភកាន់តែខ្លាំងថាជម្លោះព្រំដែនកម្ពុជា-ថៃ អាចនឹងកាន់តែធ្ងន់ធ្ងរថែមទៀត។){kind=link}
នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បាននិយាយនៅថ្ងៃទី១៥ ខែធ្នូ ឆ្នាំ២០២៥ នេះថា កិច្ចប្រជុំពិសេសថ្នាក់រដ្ឋមន្ត្រីការបរទេសអាស៊ាន ជុំវិញសង្គ្រាមថៃ-កម្ពុជា ដែលត្រូវធ្វើឡើងនៅថ្ងៃទី១៦ ធ្នូ នេះ ត្រូវបានលើកពេល ខណៈលោកបារម្ភកាន់តែខ្លាំងថាជម្លោះព្រំដែនកម្ពុជា-ថៃ អាចនឹងកាន់តែធ្ងន់ធ្ងរថែមទៀត។
តាមសារព័ត៌មាន Malay Mail ឱ្យដឹងថា ជំនួបថ្នាក់រដ្ឋមន្ត្រីការបរទេសអាស៊ានទាំង ១១ប្រទេស ត្រូវជួបគ្នានៅទីក្រុងកូឡាឡាំពួរ។ តាមលោក អាន់វ៉ា អ៊ីប្រាហ៊ីម ការលើកពេលប្រជុំធ្វើឡើងតាមសំណើរបស់ប្រទេសថៃ និងកម្ពុជា ដោយស្នើពន្យារពេលបន្តិច។
យ៉ាងណា លោក អាន់វ៉ា អ៊ីប្រាហ៊ីម នៅតែសន្យាថានឹងសម្របសម្រួលឱ្យមានជំនួបថ្នាក់រដ្ឋមន្ត្រីការបរទេសអាស៊ានឱ្យបាន ធ្វើឡើងឆាប់ៗនេះ ហើយព្យាយាមធ្វើអ្វីគ្រប់យ៉ាងដើម្បីឱ្យភាគីទាំងពីរ (កម្ពុជា-ថៃ) ត្រឡប់ទៅរកការបញ្ឈប់ប្រយុទ្ធគ្នា។
លោក អាន់វ៉ា អ៊ីប្រាហ៊ីម ក៏បានអំពាវនាវសុំឱ្យភាគីទាំងពីរនេះ ត្រូវរកពេលបញ្ឈប់ការប្រយុទ្ធគ្នាឱ្យឆាប់បំផុត ដោយមិនត្រូវបង្កផលវិបាកដល់ប្រជាជននៃប្រទេសទាំងពីរនេះទេ។ លោកក៏បានសន្យាថា រៀបចំឱ្យមានក្រុមឃ្លាំមើលបទឈប់បាញ់គ្នាទៅកាន់តំបន់ជម្លោះ ក្រោយពីភាគីទាំងពីរព្រមបញ្ឈប់ការប្រយុទ្ធគ្នា ដែលលោកថា សន្តិភាពកើតមានម្ដង តែត្រូវបានភាគីបំពានដោយភាគីទាំងពីរបានចោទដាក់គ្នាទៅវិញទៅមក គឺបំពានសេចក្ដីថ្លែងការណ៍រួមនៅថ្ងៃទី២៦ តុលា ដែលលោកប្រធានាធិបតីសហរដ្ឋអាមេរិក លោក ដូណាល់ ត្រាំ ក៏ជាភាគីហត្ថលេខីមួយដែរ។
ការប្រយុទ្ធគ្នាចាប់ផ្ដើមពីថ្ងៃទី៧ ធ្នូ ដែលបង្កឱ្យប្រជាជននៃប្រទេសទាំងពីររស់នៅតាមព្រំដែនរួមគ្នាជាង ៥០ម៉ឺននាក់ រត់ភៀសខ្លួន ហើយមកដល់ពេលនេះ ភាគីទាំងពីរនេះនៅតែបន្តបាញ់ផ្លោងដាក់គ្នា តែភាគីថៃ ឈានដល់ការបាញ់ប្រហារដោយយន្តហោះចម្បាំងទៅលើទីប្រជុំជនស៊ីវិល និងប្រាង្គប្រាសាទប្រទេសកម្ពុជា។
ឥឡូវនេះ ប្រទេសថៃ ព្រមានពីការហ៊ុមព័ទ្ធលំហសមុទ្រក្នុងឈូងសមុទ្រថៃ ដែលជាការរាំងខ្ទប់ការធ្វើនាវាចរដឹកនាំចេញ និងចូលប្រទេសកម្ពុជា។
លោក អាន់វ៉ា អ៊ីប្រាហ៊ីម ព្រមានថា ការហ៊ុមព័ទ្ធលំហសមុទ្រ នឹងនាំឱ្យស្ថានភាពកាន់តែអាក្រក់ ដែលចាំបាច់ត្រូវតែមានជំនួប ទោះជាទ្វេភាគី ឬពហុភាគីក៏ដោយ។
បើតាមក្រសួងការបរទេសម៉ាឡេស៊ី ថៃជាអ្នកស្នើសុំពន្យារពេលកិច្ចប្រជុំ ដោយកាលបរិច្ឆេទថ្មីគឺនៅថ្ងៃទី២២ ខែធ្នូ។ ជាមួយគ្នានេះ ប្រទេសចិន ក៏បានទាមទារថា កម្ពុជា និងថៃ គួរតែអនុវត្តការអត់ធ្មត់ជាអតិបរមា ហើយចាត់វិធានការទាំងអស់ដែលនាំទៅដល់ការបញ្ឈប់ការប្រយុទ្ធគ្នា ដោយបន្ថយភាពតានតឹងឱ្យបានឆាប់តាមដែលអាចធ្វើទៅបាន។ នេះបើយោងតាមអ្នកនាំពាក្យក្រសួងការបរទេសចិន លោក Guo Jiakun នៅថ្ងៃចន្ទ ទី១៥ ខែធ្នូ ឆ្នាំ២០២៥។
លោក Guo Jiakun បានបន្ថែមថា ចិននឹងបន្តតាមដាន និងព្យាយាមឱ្យអស់ពីសមត្ថភាព ដើម្បីជំរុញការចរចាដើម្បីសន្តិភាព និងដើរតួនាទីស្ថាបនាតាមរបៀបរបស់ចិន ដើម្បីនាំមកនូវបទឈប់បាញ់ និងការស្ដារសន្តិភាពរវាងប្រទេសទាំងពីរ។
នេះគឺជាលើកទីពីរហើយដែលប្រទេសចិន បានអំពាវនាវឲ្យកម្ពុជា និងថៃ អនុវត្តការអត់ធ្មត់ និងការពារការកើនឡើងនៃជម្លោះបន្ថែមទៀត។
ខណៈការប្រយុទ្ធគ្នាកំពុងផ្ទុះឡើងនៅតាមព្រំដែនកម្ពុជា-ថៃ ទីភ្នាក់ងារសារព័ត៌មាន Reuters ឲ្យដឹងនៅថ្ងៃទី១៥ ធ្នូ ថា ប្រទេសថៃ នឹងរៀបចំការបោះឆ្នោតនៅថ្ងៃទី៨ ខែកុម្ភៈ ឆ្នាំ២០២៦។ លោក អនុធីន ឆានវីរៈគុល នឹងបន្តដឹកនាំរដ្ឋបាលបណ្ដោះអាសន្នរហូតដល់រដ្ឋាភិបាលថ្មីត្រូវបានបង្កើតឡើង។
មុននេះដែរ លោក Narong Klanwarin ប្រធានគណៈកម្មការបោះឆ្នោតជាតិថៃ បានឲ្យដឹងថា ស្ថាប័នរបស់លោកបានត្រៀមខ្លួនរួចរាល់ហើយក្នុងការរៀបចំការបោះឆ្នោតជាតិឲ្យបានឆាប់តាមដែលអាចធ្វើទៅបាន តែលោកប្រកាសច្រានចោលនូវក្តីព្រួយបារម្ភដែលថា គណៈកម្មការបោះឆ្នោតជាតិថៃ មួយនេះ អាចមានភាពលម្អៀងទៅរកបក្សនយោបាយណាមួយនៅក្នុងកាលៈទេសៈប្រទេសថៃ ស្ថិតក្នុងស្ថានភាពនៃការផ្ទុះជម្លោះប្រដាប់អាវុធនៃជម្លោះព្រំដែនជាមួយនឹងកម្ពុជា៕
© 2025, ឌឹ ខេមបូឌា ដេលី. All rights reserved.