ស្ថាប័នស្ទង់មតិមួយនៅទីក្រុងគៀវ បានប្រកាសថា ប្រជាជនអ៊ុយក្រែន ៣ភាគ៤ បានបង្ហាញការជំទាស់ចំពោះការសម្បទានធំៗនៅក្នុងកិច្ចព្រមព្រៀងសន្តិភាពណាមួយជាមួយរុស្ស៊ី ខណៈលោក ត្រាំ សង្ឃឹមថាសង្គ្រាមរុស្ស៊ី-អ៊ុយក្រែន នឹងដល់កិច្ចព្រមព្រៀងឆាប់ៗនេះហើយ។
លទ្ធផលនេះបង្ហាញពីការគាំទ្រជំហររបស់លោកប្រធានាធិបតី វូឡូឌីមៀ ហ្សេឡេនស្គី។
ទីភ្នាក់ងារសារព័ត៌មាន Reuters បានចុះផ្សាយអំពីការស្ទង់មតិរបស់វិទ្យាស្ថានសង្គមវិទ្យាអន្តរជាតិគៀវ ដែលរកឃើញថា ៧២% នៃប្រជាជន ត្រៀមខ្លួនទទួលយកកិច្ចព្រមព្រៀងដែលព្យួរការប្រយុទ្ធនៅជួរមុខ តែ ៧៥% ចាត់ទុកផែនការដែលតម្រូវឱ្យកាត់ទឹកដី ឬកម្រិតទំហំកងទ័ពដោយគ្មានការធានាសន្តិសុខច្បាស់លាស់ ថាជាបញ្ហាមិនអាចទទួលយកបានឡើយ។
ជាមួយគ្នានេះ ការស្ទង់មតិបានបង្ហាញចំពោះការបន្តគាំទ្រការដឹកនាំរបស់លោក ហ្សេឡេនស្គី នៅតែមានកម្រិតខ្ពស់ គឺ ៦១% ប៉ុន្តែបានបង្ហាញពីការធ្លាក់ចុះនៃទំនុកចិត្តលើសម្ពន្ធមិត្ត ជាពិសេសទៅលើសហរដ្ឋអាមេរិក ដោយបានធ្លាក់ចុះមកនៅត្រឹម ២១% ដែលកាលពីឆ្នាំមុនមាន ៤១% និងលើអង្គការណាតូធ្លាក់មកត្រឹម ៣៤%។
ទាក់ទងនឹងការបោះឆ្នោត មានតែ ៩% ប៉ុណ្ណោះនៃប្រជាជនអ៊ុយក្រែន ដែលចង់ឱ្យមានការបោះឆ្នោតមុនពេលសង្គ្រាមបញ្ចប់ ទោះបីជាលោក ត្រាំ ជំរុញឱ្យមានក៏ដោយ។ ផ្ទុយទៅវិញ ៦៣% នៃប្រជាជន អះអាងថា ពួកគេត្រៀមខ្លួនរួចរាល់ដើម្បីបន្តការប្រយុទ្ធ។
លោក ហ្សេឡេនស្គី និយាយថា លោកនឹងស្នើឱ្យមានការរៀបចំការបោះឆ្នោតសភា និងប្រធានាធិបតី ក្រោយពីប្រទេសស្ថិតក្នុងសន្តិភាពនៃការអនុវត្តបានពេញលេញនៃបទឈប់បាញ់នៅទូទាំងប្រទេស។
ការបោះឆ្នោតប្រធានាធិបតី ក៏មាននៅក្នុងផែនការសន្តិភាពរបស់លោកប្រធានាធិបតីអាមេរិក ដូណាល់ ត្រាំ ដែរ។ ចំពោះការចូលជាសមាជិកណាតូវិញ លោក ហ្សេឡេនស្គី បានប្រកាសថា អ៊ុយក្រែន បានសម្រេចចិត្តលះបង់មហិច្ឆតាក្នុងការចូលជាសមាជិកសម្ពន្ធយោធាណាតូ ដើម្បីប្តូរយកការធានាសន្តិសុខពីលោកខាងលិច ដែលជាការសម្របសម្រួលមួយដើម្បីបញ្ចប់សង្គ្រាមជាមួយរុស្ស៊ី។
លោក ហ្សេឡេនស្គី ឱ្យដឹងថា បញ្ហាញនេះ ដោយសារប្រទេសមួយចំនួននៅអឺរ៉ុបមិនគាំទ្រសមាជិកភាពរបស់អ៊ុយក្រែន ប៉ុន្តែលោកថាការធានាសន្តិសុខទ្វេភាគីពីអាមេរិក អឺរ៉ុប កាណាដា អូស្ត្រាលី និងជប៉ុន ដូចនឹង «មាត្រា៥» របស់ណាតូ គឺជាជម្រើសដ៏ល្អបំផុតដើម្បីការពារការឈ្លានពានរបស់រុស្ស៊ី ជាថ្មីម្ដងទៀត។
ការប្រកាសនេះ ធ្វើឡើងមុនកិច្ចប្រជុំកំពូលនៅទីក្រុងប៊ែរឡាំង ដែលមានការចូលរួមពីប្រេសិតអាមេរិក លោក ស្ទីវ វីតកុហ្វ ដើម្បីពិភាក្សាលើផែនការសន្តិភាព ២០ចំណុចរបស់សហរដ្ឋអាមេរិក។
ជាមួយនឹងក្ដីសង្ឃឹមពីសន្តិភាព លោក ដូណាល់ ត្រាំ ថាកិច្ចព្រមព្រៀងរវាងអ៊ុយក្រែន និងរុស្ស៊ី ជិតសម្រេចបានហើយ។
លោក ត្រាំ ថាកិច្ចព្រមព្រៀងមួយដើម្បីបញ្ចប់សង្គ្រាមរុស្ស៊ី នៅអ៊ុយក្រែន កាន់តែខិតជិតមកដល់ហើយ ខណៈបណ្តាមេដឹកនាំអឺរ៉ុប បានលើកសំណើឱ្យមានការដាក់ពង្រាយ «កម្លាំងពហុជាតិសាសន៍» ដើម្បីតាមដានការអនុវត្ត ទោះបីក្រៅប្រទេសអឺរ៉ុបក៏ដោយ។
លោក ត្រាំ បានប្រាប់អ្នកសារព័ត៌មានថា លោកបានពិភាក្សាល្អណាស់ជាមួយប្រធានាធិបតីអ៊ុយក្រែន ហ្សេឡេនស្គី រួមទាំងមេដឹកនាំអង់គ្លេស បារាំង អាល្លឺម៉ង់ និងណាតូ។
ក្នុងសេចក្តីថ្លែងការណ៍រួមនៅឯការចរចាក្នុងទីក្រុងប៊ែរឡាំង ប្រទេសអាល្លឺម៉ង់ មេដឹកនាំអឺរ៉ុប បានស្នើឱ្យមានកងកម្លាំងជាផ្នែកមួយនៃ «ការធានាសន្តិសុខរឹងមាំ» គាំទ្រដោយសហរដ្ឋអាមេរិក ដែលមានបំណងធានាថា រុស្ស៊ីនឹងមិនអាចរំលោភលើកិច្ចព្រមព្រៀងបញ្ចប់សង្គ្រាមបានឡើយ។
នេះជាការកត់សម្គាល់ដ៏វិជ្ជមាននៅពេលដែលប្រទេសមហាអំណាចធំៗនៅអឺរ៉ុប បានជួបជួបប្រជុំគ្នានៅទីក្រុងប៊ែរឡាំង កាលពីថ្ងៃទី១៥ ខែធ្នូ ឆ្នាំ២០២៥ នេះ ជាមួយលោក ហ្សេឡេនស្គី ដើម្បីជំរុញកិច្ចខិតខំប្រឹងប្រែងបញ្ចប់សង្គ្រាម។
នៅក្នុងផែនការសន្តិភាព ២០ចំណុចរបស់លោក ត្រាំ មានបញ្ជាក់ពីការទុកតំបន់ដុនបាស់ ដែលរុស្ស៊ី កំពុងវាយកាន់កាប់ ជាតំបន់គ្មានកងទ័ព និងជាដែនដីរដ្ឋបាលស្វយ័តពីរុស្ស៊ី និងអ៊ុយក្រែន។ មានន័យថា ទាំងរុស្ស៊ី និងអ៊ុយក្រែន ពុំមានកងទ័ព កងសន្តិសុខរបស់ខ្លួនឡើយ។ តែយ៉ាងណា អ្នកសង្កេតការណ៍យល់ថា ទីក្រុងមូស្គូ អាចមិនយល់ព្រមចំពោះការឱ្យរុស្ស៊ី ដកទ័ពចេញពីតំបន់ដុនបាស់។
តំបន់ដុនបាស់ មានខេត្តចំណុះពីរ គឺខេត្តដូណែត និងខេត្តលូហ្គាន់ ស្ថិតនៅភាគខាងកើតនៃប្រទេសអ៊ុយក្រែន។ តំបន់នេះមានផ្ទៃដីជាង ៥ម៉ឺន ៣ពាន់គីឡូម៉ែត្រការ៉េ ដែលរុស្ស៊ី បង្កសង្គ្រាម ដោយបង្កើតកម្លាំងឧទ្ទាមវាយយកជាតំបន់អបគមន៍ពីរដ្ឋាភិបាលអ៊ុយក្រែន តាំងពីឆ្នាំ២០១៤៕
© 2025, ឌឹ ខេមបូឌា ដេលី. All rights reserved.