រដ្ឋមន្ត្រីក្រសួងការពារជាតិកម្ពុជា លោក ទៀ សីហា ទាត់ចោលសេចក្តីរាយការណ៍ក្នុងប្រព័ន្ធផ្សព្វផ្សាយមួយចំនួនដែលបានរាយការណ៍ថា ប្រទេសកម្ពុជា សុំចរចាឱ្យមានបទឈប់បាញ់គ្នាជាមួយភាគីថៃ នៅក្នុងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី២៤ ធ្នូ នោះ។
លោកបញ្ជាក់ថា សំណើពីប្រទេសកម្ពុជា ទៅកាន់រដ្ឋមន្ត្រីការពារជាតិថៃ គឺធ្វើទៅតាមសេចក្តីថ្លែងការណ៍ពីប្រធានអាស៊ាន ក្នុងកិច្ចប្រជុំរដ្ឋមន្ត្រីការបរទេសអាស៊ានពិសេសស្តីអំពីស្ថានការណ៍បច្ចុប្បន្នរវាងប្រទេសកម្ពុជា និងប្រទេសថៃ ដែលបានធ្វើឡើងនៅថ្ងៃទី២២ ខែធ្នូ ឆ្នាំ២០២៥ នៅទីក្រុងកូឡាឡាំពួរ ប៉ុណ្ណោះ មិនមែនជាការសុំចរចាជាមួយថៃ ឱ្យមានបទឈប់បាញ់គ្នាឡើយ។
រដ្ឋមន្ត្រីក្រសួងការពារជាតិកម្ពុជា លោក ទៀ សីហា បានសរសេរលើទំព័រហ្វេសប៊ុករបស់ខ្លួនទាំងយប់ថ្ងៃទី២៤ ខែធ្នូ ឆ្នាំ២០២៥ នេះថា សារព័ត៌មានថៃ មួយចំនួន ទាំងផ្លូវការ និងមិនផ្លូវការ បានយកលិខិតផ្លូវការរបស់ក្រសួងការពារជាតិកម្ពុជា ដែលផ្ញើជូនរដ្ឋមន្ត្រីការពារជាតិថៃ ទៅផ្សព្វផ្សាយក្នុងចេតនាបំភាន់ធ្វើដូចជាលិខិតបែកធ្លាយ។
លោក ទៀ សីហា លើកឡើងថា សម័យបច្ចុប្បន្ននេះ មានទាំងកម្មវិធីបកប្រែ Google Translate មានទាំងកម្មវិធីបកប្រែ ChatGPT និងកម្មវិធីបកប្រែ Gemini ជាដើម ដែលអាចបកប្រែភាសាអង់គ្លេសបានដូចអត្ថន័យដើមជិត ១០០% ប៉ុន្តែសារព័ត៌មានថៃ បែរជាយកលិខិតនោះទៅផ្សាយខុសពីខ្លឹមសារពិតដែលបញ្ជាក់ក្នុងលិខិតនោះទៅវិញ។
រដ្ឋមន្ត្រីការពារជាតិកម្ពុជា រូបនេះបញ្ជាក់ថា ខ្លឹមសារក្នុងលិខិតចុះថ្ងៃទី២២ ធ្នូ ដែលកម្ពុជា បានផ្ញើជូនរដ្ឋមន្ត្រីការពារជាតិថៃ ជុំវិញកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) ក្រោយកិច្ចប្រជុំរដ្ឋមន្ត្រីការបរទេសអាស៊ានពិសេសស្ដីពីស្ថានការណ៍បច្ចុប្បន្នរវាងកម្ពុជា និងថៃ នោះ គឺខុសពីការចុះផ្សាយរបស់ប្រព័ន្ធផ្សព្វផ្សាយថៃ មួយចំនួនទាំងស្រុង។
ការចេញមុខបដិសេធនេះ ធ្វើឡើងបន្ទាប់ពីសារព័ត៌មានថៃ បានផ្សព្វផ្សាយលិខិតក្រសួងការពារជាតិកម្ពុជា ជុំវិញសំណើសម្រាប់កិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃពុធ។
កាលពីថ្ងៃទី២៤ ខែធ្នូ កាសែត Thai Enquirer បានរាយការណ៍ថា លិខិតរបស់រដ្ឋមន្ត្រីការពារជាតិកម្ពុជា ផ្ញើជូនរដ្ឋមន្ត្រីការពារជាតិថៃ គឺជាការបង្ហាញនូវឆន្ទៈរបស់ខ្លួនក្នុងការចូលរួមចរចាបទឈប់បាញ់ជាមួយប្រទេសថៃ ដែលជាជំហានដ៏សំខាន់មួយស្ថិតក្នុងក្របខ័ណ្ឌលក្ខខណ្ឌដែលប្រទេសថៃ បានកំណត់។
ជាមួយគ្នានេះ សារព័ត៌មានដទៃទៀតផ្សាយថា កងទ័ពខ្មែរកាលពីថ្ងៃពុធ ទី២៤ ធ្នូ បានបាញ់រ៉ុក្កែត BM-21 នៅម៉ោង ៥:៣០នាទីព្រឹក ប្រមាណ ៧០០គ្រាប់ ធ្លាក់តាមភូមិ-ស្រុកថៃ ៩៨កន្លែង បណ្តាលឲ្យខូចខាតវត្ត សាលារៀន និងមន្ទីរពេទ្យ ក្នុងខេត្តអ៊ុប៊ុនរាជធានី សុរិន្ទ និងស៊ីសាកេត។
ប្រភពមន្ត្រីថៃ ដដែល រាយការណ៍ថា ប្រទេសថៃ បញ្ជាក់ឡើងវិញនូវលក្ខខណ្ឌស្នូលចំនួន ៣ សម្រាប់ការចរចាឱ្យមានបទឈប់បាញ់គ្នា ដោយកំណត់ឱ្យកម្ពុជា ត្រូវតែប្រកាសបញ្ឈប់ការវាយប្រហារលើថៃ ជាមុន និងត្រូវតែបញ្ឈប់ការប្រើកម្លាំងយោធាជាបន្តបន្ទាប់ រួមទាំងសហការជាក់ស្តែងលើការដោះមីនមនុស្សធម៌ផងដែរ។
យ៉ាងណាក៏ដោយ កាលពីថ្ងៃទី២២ ខែធ្នូ ឆ្នាំ២០២៥ រដ្ឋមន្ត្រីក្រសួងការពារជាតិកម្ពុជា លោក ទៀ សីហា បានផ្ញើលិខិតមួយច្បាប់ទៅកាន់លោក ណាថាផន ណាក់ផានីត រដ្ឋមន្ត្រីក្រសួងការពារជាតិថៃ ដោយលើកសំណើចំនួន ៣ ថា៖
- ទី១ កិច្ចប្រជុំ GBC សម្រាប់ថ្ងៃទី២៤ ធ្នូ គួររៀបចំក្នុងទម្រង់ដូចគ្នានឹង កិច្ចប្រជុំ GBC ពិសេស ដែលបានធ្វើឡើងនៅថ្ងៃទី៧ ខែសីហា ឆ្នាំ២០២៥ នៅទីក្រុងកូឡាឡាំពួរ ដូចមានចែងក្នុងកថាខណ្ឌទី១៣ នៃកំណត់ហេតុការព្រមព្រៀងគ្នា។
- ទី២ ដោយហេតុផលសន្តិសុខ អំពីការប្រយុទ្ធកំពុងកើតមានតាមបណ្តោយព្រំដែន កិច្ចប្រជុំនេះគួរត្រូវបានធ្វើឡើងនៅទីតាំងដែលមានសុវត្ថិភាព និងអព្យាក្រឹត ព្រោះក្នុងបរិបទនេះ ប្រទេសម៉ាឡេស៊ី បានយល់ព្រមរៀបចំទទួលកិច្ចប្រជុំនៅទីក្រុងកូឡាឡាំពួរ ដែរ។
- ទី៣ ចំពោះរបៀបវារៈ កិច្ចប្រជុំគួរពិភាក្សាលើចំណុចសំខាន់ ៤ គឺទី១ ការបញ្ឈប់អំពើប្រយុទ្ធទាំងស្រុងភ្លាមៗ គោរព និងអនុវត្តយ៉ាងពេញលេញនូវកិច្ចព្រមព្រៀងឈប់បាញ់ ថ្ងៃទី២៨ ខែកក្កដា ឆ្នាំ២០២៥ និងសេចក្តីថ្លែងការណ៍រួមកូឡាឡាំពួរ ថ្ងៃទី២៦ ខែតុលា ឆ្នាំ២០២៥ រួមទាំងកិច្ចព្រមព្រៀងផ្សេងៗក្រោមក្របខ័ណ្ឌនេះ។ ទី២ ការត្រឡប់មកវិញដោយសុវត្ថិភាព និងមានកិត្តិយស ដោយគ្មានការរាំងស្ទះរបស់ប្រជាពលរដ្ឋរស់នៅតំបន់ព្រំដែនដែលរងផលប៉ះពាល់ឲ្យទៅកាន់លំនៅឋាន និងជីវភាពធម្មតារបស់ពួកគេដូចមុនពេលផ្ទុះការប្រយុទ្ធគ្នា។ ទី៣ គឺការដោះស្រាយជម្លោះដោយសន្តិវិធី តាមរយៈការបន្តអនុវត្តពេញលេញភ្លាមៗនូវសេចក្តីថ្លែងការណ៍រួមកូឡាឡាំពួរ ថ្ងៃទី២៦ ខែតុលា ឆ្នាំ២០២៥ និងការធ្វើឱ្យសកម្មឡើងវិញជាបន្ទាន់នូវយន្តការដែលមានស្រាប់ក្រោមក្របខ័ណ្ឌនេះ រួមទាំងការកំណត់ព្រំដែន និងសកម្មភាពដោះមីនមនុស្សធម៌។ ចំណែកទី៤ គឺការពង្រឹងតួនាទីរបស់ក្រុមអ្នកសង្កេតការណ៍អាស៊ាន (ASEAN Observer Team – AOT) ក្នុងការធានាការអនុវត្ត និងការផ្ទៀងផ្ទាត់បទឈប់បាញ់ និងកិច្ចព្រមព្រៀងផ្សេងៗក្រោមសេចក្តីថ្លែងការណ៍រួមទីក្រុងកូឡាឡាំពួរ ផងដែរ។
កិច្ចប្រជុំ GBC នឹងត្រូវប្រព្រឹត្តទៅរយៈពេល ៣ថ្ងៃ គឺចាប់ពីថ្ងៃទី២៤ ដល់ថ្ងៃទី២៦ ខែធ្នូ ឆ្នាំ២០២៥។ បើរយៈពេល ៣ថ្ងៃនេះ ដំណើរការដោយរលូន នៅកិច្ចប្រជុំបន្ទាប់ នឹងត្រូវធ្វើឡើងនៅថ្ងៃទី២៧ ខែធ្នូ បន្តទៀត៕
© 2025, ឌឹ ខេមបូឌា ដេលី. All rights reserved.