កម្មករប្រហែល៨០នាក់់ដែលតវ៉ាប្រឆាំងនឹងរោងចក្រជប៉ុនមួយដែលផលិតឡាំងក្រដាសក្នុងរាជធានីភ្នំពេញ បានបិទខ្លោងទ្វាររោងចក្រនេះកាលពីថ្ងៃសុក្រ បន្ទាប់ពីអ្នកគ្រប់គ្រងមិនព្រមរៀបចំកិច្ចប្រជុំជាមួយនិយោជិត។
កម្មករជាច្រើននាក់បានដុតកង់ឡាននៅមុខរោងចក្រ HartaPackaging ដែលពួកគេបាននិងកំពុងតែតវ៉ាតំាងពីខែកុម្ភៈមក ដើម្បីទាមទារប្រាក់អតីតភាពការងារគិតមកដល់ដើមឆ្នាំ២០១៤។ យោងតាមតំណាងសហជីព កូដកម្មរយៈពេលប្រាំមួយថ្ងៃកាលពីខែកុម្ភៈ ត្រូវបានបញ្ចប់ដោយសារតែមានបទបញ្ជារបស់តុលាការ បន្ទាប់ពីរោងចក្រនេះបានបណ្ដេញកម្មករចំនួន២៨៥នាក់ចេញ។
លោក យិន គា អនុប្រធានរដ្ឋបាលខណ្ឌពោធិ៍សែនជ័យ បានមានប្រសាសន៍ថា “ថ្ងៃនេះនៅឯកន្លែងតវ៉ា យើងបានឃើញកម្មករបិទខ្លោងទ្វាររោងចក្រ ប៉ុន្តែយើងមិនបានបង្ក្រាបទេ ពីព្រោះយើងកំពុងតែរង់ចាំមើល ថាតើរោងចក្រនេះអាចរកដំណោះស្រាយជាមួយកម្មករបានដែរឬយ៉ាងណា”។
យោងតាមលោក យិន គា បានឲ្យដឹងថា លោក កែវ សុជាតិ ព្រះរាជអាជ្ញាអមសាលាដំបូងរាជធានីភ្នំពេញ ទទួលបានពាក្យបណ្ដឹងមួយពីរោងចក្រនេះកាលពីព្រឹកថ្ងៃសុក្រ អំពីការតវ៉ាដែលរារាំងកម្មករមិនឲ្យចេញចូលរោងចក្រនេះ ហើយបានប្រាប់កម្មករថា លោកនឹងចោទប្រកាន់ក្រុមតំណាងសហជីពទាំងនេះ ប្រសិនបើពួកគេមិនព្រមចេញ។
លោក ពុធ សុវណ្ណ ប្រធានសហព័ន្ធសហជីពសេរីកម្មករ បានមានប្រសាសន៍ថា “ព្រះរាជអាជ្ញារូបនេះបន្ទោសកម្មករថា ធ្វើការតវ៉ាខុសច្បាប់ ប៉ុន្តែរោងចក្រមិនបានអនុវត្តតាមសេចក្ដីសម្រេចរបស់ក្រុមប្រឹក្សាអាជ្ញាកណ្ដាលទេ”។ យោងតាមលោក សុវណ្ណ បានឲ្យដឹងថា ក្រុមប្រឹក្សាអាជ្ញាកណ្ដាលបានចេញបទបញ្ជាមិនចងភ្ជាប់កាតព្វកិច្ច មួយកាលពីសប្ដាហ៍មុន ដោយលើកឡើងថា ត្រូវតែមានការបើកប្រាក់អតីតភាពការងារឲ្យកម្មករ។ លោកបានមានប្រសាសន៍ថា “ខ្ញុំគិតថា យើងគួរតែរំលាយក្រុមប្រឹក្សាអាជ្ញាកណ្ដាលនេះ ពីព្រោះរោងចក្រមិនគោរពសេចក្ដីសម្រេចឡើយ”។
អ្នកតវ៉ាម្នាក់ឈ្មោះ ហុង ណាង អាយុ២៨ឆ្នាំបានលើកឡើងថា ការគំរាមកំហែងពីព្រះរាជអាជ្ញារូបនេះធ្វើឲ្យអ្នកស្រីមានអារម្មណ៍ភ័យតិចតួច។ អ្នកស្រីបានមានប្រសាសន៍ថា “ខ្ញុំនឹងនៅតែតវ៉ារហូតដល់ខ្ញុំទទួលបានប្រាក់អតីតភាពការងាររបស់ខ្ញុំ បើទោះជាការតវ៉ានេះត្រូវបានអាជ្ញាធរបង្ក្រាបក៏ដោយ។ ម្ចាស់រោងចក្រឃើញយើងតវ៉ា ហើយយកពេលទៅប្ដឹងពួកយើងពីបទឃុំខ្លួន ប៉ុន្តែយើងមិនបានឃុំខ្លួននរណាម្នាក់ទេ យើងគ្រាន់តែមិនចង់ឲ្យរោងចក្រនេះដឹកជញ្ជូនសម្ភារ ឬទំនិញចេញពីរោងចក្រ រហូតទាល់តែគេបើកប្រាក់ឈ្នួលឲ្យពួកយើង”។
ទោះជាយ៉ាងណា លោក ស៊ីវ៉ា គូម៉ា អ្នកគ្រប់គ្រងរោងចក្រ Harta បានអះអាងថា ការបិទខ្លោងទ្វារនេះគឺជាសកម្មភាពខុសច្បាប់។ លោកបានមានប្រសាសន៍ថា “នេះជាការតវ៉ាខុសច្បាប់ ពីព្រោះគេមិនអាចចេញពីរោងចក្របានឡើយ”៕ ប៊ុននី