កាលពីម្សិលមិញ បន្ទាប់ពីជំនួបជាមួយអ្នកការទូតអាមេរិកដែលកំពុងបំពេញទស្សនកិច្ច លោក អ៊ុច បូរិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍ថា សហរដ្ឋអាមេរិកមានកង្វល់ដូចគ្នានឹងប្រទេសកម្ពុជាអំពីទំនប់វារីអគ្គិសនីដ៏ចម្រូងចម្រាស ដែលប្រទេសឡាវមានផែនការសង់តាមដងទន្លេមេគង្គ។
ទាំងប្រទេសកម្ពុជា ទាំងប្រទេសវៀតណាម បារម្ភថា ទំនប់វារីអគ្គិសនីដនសាហុង កម្លាំង២៥៦មេហ្គាវ៉ាត់ នៅប្រទេសឡាវភាគខាងត្បូង នឹងបំផ្លាញធនធានត្រីដ៏មានសារៈសំខាន់ នៅទន្លេមេគង្គក្រោម និងដៃទន្លេនានា។
លោក អ៊ុច បូរិទ្ធ បានមានប្រសាសន៍ថា លោក ស្កត់ ម៉ាសៀល [Scot Marciel] ឧបការីរងរដ្ឋមន្ត្រីការបរទេសសហរដ្ឋអាមេរិក ទទួលបន្ទុកកិច្ចការអាស៊ីបូព៌ានិងប៉ាស៊ីហ្វិក បានបង្ហាញកង្វល់រួមរបស់ប្រទេសទាំងពីរ។
លោក បូរិទ្ធ បានប្រាប់អ្នកយកព័ត៌មានបន្ទាប់ពីជំនួបនោះថា “យើងមានកង្វល់់ថា ទំនប់ដ៏ធំនេះ ដែលប្រទេសឡាវចង់សាងសង់ នឹងមានផលប៉ះពាល់ដល់ទន្លេមេគង្គ។ លោក ស្កត់ បានប្រាប់ថា លោក ចន ឃើរី [រដ្ឋមន្ត្រីក្រសួងការបរទេសអាមេរិក] ក៏បានពិភាក្សារឿងទំនប់វារីអគ្គីសនីនេះ និងបានជំរុញភាគីឡាវ ឲ្យរៀបចំជំនួបកំពូលមួយនៅប្រទេសឡាវ នៅត្រឹមចុងឆ្នាំនេះដែរ”។
កាលពីខែមិថុនា ឡាវបានយល់ព្រមផ្អាកការសាងសង់ទំនប់នេះរហូតដល់ខ្លួនពិគ្រោះយោបល់ជាមួយប្រទេសជិតខាងរបស់ខ្លួនជាមុនសិន។
លោករដ្ឋលេខាធិការបានមានប្រសាសន៍ថា លោក ម៉ាសៀល ក៏បានសួរលោកអំពីការវិវត្តនៃសេចក្តីព្រាងអនុស្សរណៈនៃការយោគយល់គ្នា រវាងប្រទេសកម្ពុជានិងប្រទេសអូស្ត្រាលី ដែលនឹងឃើញជនភៀសខ្លួនដែលជាប់ឃុំពេលព្យាយាមទៅប្រទេសអូស្ត្រាលី បានតាំងទីលំនៅថ្មីក្នុងប្រទេសកម្ពុជាដែរ។
កិច្ចព្រមព្រៀងនេះបានរងការរិះគន់ជាច្រើនពីសមាជិកសភាគណបក្សប្រឆាំង និងក្រុមអង្គការសិទ្ធិមនុស្ស ទាំងនៅប្រទេសកម្ពុជាទាំងនៅប្រទេសអូស្ត្រាលី ពីព្រោះវានឹងបញ្ជូនជនភៀសខ្លួនទៅកាន់ប្រទេសមួយក្នុងចំណោមប្រទេសក្រីក្របំផុតនិងពុករលួយបំផុតនៅលើពិភពលោក។
លោក អ៊ុច បូរិទ្ធ បានមានប្រសាសន៍ថា លោកបានប្រាប់អ្នកការទូតអាមេរិករូបនេះថា សំណើកំពុងត្រូវពិនិត្យនៅឡើយ ប៉ុន្តែបានបដិសេធមិននិយាយអ្វីផ្សេងអំពីកិច្ចព្រមព្រៀងដែលមិនទាន់ដាច់ស្រេចនេះ ដែលទាំងប្រទេសកម្ពុជា ទាំងប្រទេសអូស្ត្រាលី បានទុកជាសម្ងាត់។ លោកបានមានប្រសាសន៍ថា “គ្មានការពិភាក្សាទេ គាត់គ្រាន់តែចង់ដឹងអំពីស្ថានការណ៍ដល់ណាប៉ុណ្ណោះ”។
លោកបានបន្ថែមថា លោក ម៉ាសៀល ក៏បានស្វាគមន៍ដំណោះស្រាយនយោបាយនាពេលថ្មីៗនេះ ហើយគណបក្សសង្គ្រោះជាតិបានបញ្ចប់ការធ្វើពហិការមិនចូលសភារយៈពេលមួយឆ្នាំរបស់ខ្លួន បន្ទាប់ពីការបោះឆ្នោតជាតិឆ្នាំ២០១៣ ដែលគណបក្សប្រឆាំងនេះចោទគណបក្សប្រជាជនកម្ពុជាថា បានលួចបន្លំសន្លឹកឆ្នោត។
លោក ម៉ាសៀល មិនបានឈប់ដើម្បីនិយាយទៅកាន់អ្នកយកព័ត៌មានបន្ទាប់ពីកិច្ចប្រជុំនោះទេ ហើយស្ថានទូតអាមេរិកមិនបានឆ្លើយតបភ្លាមៗទៅនឹងសំណើសុំការអធិប្បាយឡើយ៕មានិត