មន្ត្រីគណបក្សមួយរូបបាននិយាយកាលពីថ្ងៃសុក្រថា ទោះបីជាខ្វះមូលនិធិចាំបាច់ជាង២លានដុល្លារក៏ដោយ ក៏គណបក្សសង្គ្រោះជាតិនៅតែមានសុទិដ្ឋិនិយមថា ស្ថានីយទូរទស្សន៍ថ្មីរបស់ខ្លួននឹងអាចចាប់ផ្តើមផ្សាយនៅពេលណាមួយនៅពាក់កណ្ដាលឆ្នាំ២០១៦។
គណបក្សសង្គ្រោះជាតិបានទទួលការអនុញ្ញាតឲ្យបើកស្ថានីយទូរទស្សន៍គណបក្សប្រឆាំងដំបូងបង្អស់កាលពីឆ្នាំមុន ជាផ្នែកនៃកិច្ចព្រមព្រៀងជាមួយគណបក្សប្រជាជនកម្ពុជាសម្រាប់គណបក្សប្រឆាំង ដើម្បីបញ្ចប់ការធ្វើពហិការមិនចូលសភារយៈពេលជិតមួយឆ្នាំរបស់ខ្លួន។ គោលបំណងដំបូងរបស់ខ្លួនត្រូវចាប់ផ្តើមផ្សាយត្រឹមដំណាច់ឆ្នាំនេះ ប៉ុន្តែទូរទស្សន៍ព្រះអាទិត្យបានជួបបញ្ហាជាច្រើន រួមមានការចាប់ខ្លួន និងការដាក់គុកកាលពីខែសីហា ទៅលើលោក ហុង សុខហួរ សមាជិកព្រឹទ្ធសភា ដែលបានដឹកនាំការប្រឹងប្រែងដើម្បីបង្កើតទូរទស្សន៍នេះ។
យោងតាមលោក យ៉ែម បុញាឫទ្ធិ អ្នកនាំពាក្យគណបក្សសង្គ្រោះជាតិឲ្យដឹងថា រហូតមកដល់ពេលនេះ គណបក្សសង្គ្រោះជាតិបានរៃអង្គាសថវិកាបានប្រហែល៨០០.០០០ដុល្លារនៃ៣លានដុល្លារដែលខ្លួនគ្រោងទុកនឹងត្រូវការចាំបាច់សម្រាប់ការបើកស្ថានីយនេះ។ លោក យ៉ែម បុញាឫទ្ធិ បានមានប្រសាសន៍ថា ប្រាក់ដែលមាននៅក្នុងដៃគឺល្មមទិញដីមួយឡូត៍នៅក្នុងក្រុងតាខ្មៅ ខេត្តកណ្តាល និងដំឡើងអង់តែនផ្សាយ ព្រមទាំងឧបករណ៍ផ្សេងទៀតនៅទីនោះ។ ទោះជាយ៉ាងនេះក្តី ស្ថានីយនៅតែត្រូវទទួលការយល់ព្រមពីរដ្ឋាភិបាលបន្ថែមទៀតជាច្រើន មុននឹងខ្លួនអាចដំណើរការទៅមុខ ហើយគណបក្សត្រូវតែរៃអង្គាសឲ្យបានយ៉ាងហោចណាស់ទឹកប្រាក់បន្ថែមទៀតចំនួន២,២លានដុល្លារ។
លោក បុញាឫទ្ធិ បានមានប្រសាសន៍ថា “បច្ចុប្បន្ននេះ យើងមានបញ្ហាបីត្រូវដោះស្រាយសម្រាប់ទូរទស្សន៍គណបក្សសង្គ្រោះជាតិ។ ដំបូងយើងទើបតែបានដាក់ស្នើលិខិតសុំបន្តពេលអាជ្ញាប័ណ្ណផ្សាយរបស់យើង ប៉ុន្តែ យើងមិនទាន់បានទទួលដំណឹងពីក្រសួងព័ត៌មាននៅឡើយទេ។ បញ្ហាទី២ គឺបញ្ហាដែលគណបក្សសង្គ្រោះជាតិកំពុងរៀបចំឯកសារដើម្បីដាក់ទៅក្រសួងរៀបចំដែនដី ដើម្បីសុំការអនុញ្ញាតដំឡើងអង់តែនទូរទស្សន៍ ហើយចុងក្រោយដំណើរការនៃការរត់ការឯកសារជាមួយក្រសួងប្រៃសណីយ៍ និងទូរគមនាគមន៍ទាក់ទងនឹងហ្វ្រេកង់ស៍ទូរទស្សន៍របស់យើង”។
លោក បុញាឫទ្ធិ បានប៉ាន់ប្រមាណថា ចំណាយចាំបាច់ដើម្បីបង្កើតទូរទស្សន៍ គឺត្រូវការទឹកប្រាក់ប្រហែល១,៥លានដុល្លារ ហើយប្រតិបត្តិការនឹងត្រូវការ១,៥លានដុល្លារទៀតសម្រាប់ចំណាយលើការផ្សាយដំបូង។ អ្នកនាំពាក្យគណបក្សសង្គ្រោះជាតិរូបនេះបានមានប្រសាសន៍ថា គណបក្សបានឈប់រៃអង្គាសបន្ទាប់ពីមានការចាប់ខ្លួនលោក ហុង សុខហួរ និងព្រឹត្តិការណ៍នយោបាយជាបន្តបន្ទាប់បានកើតឡើង រួមមានការចេញដីកាចាប់ខ្លួនមេដឹកនាំគណបក្សប្រឆាំងគឺលោក សម រង្ស៊ី និងការបណ្តេញលោក រង្ស៊ី ចេញពីសភា និងការដកតំណែងអនុប្រធានគណបក្សសង្គ្រោះជាតិ គឺលោក កឹម សុខា ចេញពីអនុប្រធានសភាជាតិ ប៉ុន្តែ នឹងចាប់ផ្តើមឡើងវិញនៅក្នុងពេលឆាប់ៗនេះ។
លោក បុញាឫទ្ធិ បានមានប្រសាសន៍ថា “ការចាប់ខ្លួន [លោក សុខហួរ ] ….មិនអាចបញ្ឈប់យើងពីការបើកទូរទស្សន៍គណបក្សសង្គ្រោះជាតិបានទេ ពីព្រោះយើងនៅមានអ្នកជំនាញផ្សេងទៀតដែលធ្វើការងារនេះ”៕រើន