លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍ថា អាជ្ញាធរបានឆ្មក់ចូលក្រុមហ៊ុនចម្ការកៅស៊ូមួយទៀតកាលពីម្សិលមិញ ជាផ្នែកមួយនៃប្រតិបត្តិការថ្មីដើម្បីចាប់អ្នកកាប់ឈើខុសច្បាប់នៅក្នុងប្រទេសកម្ពុជាភាគបូពា៌។
វាជាប្រតិបត្តិការថ្មីបំផុតរបស់ក្រុមការងារពិសេសដែលទទួលបានបញ្ជាពីលោកនាយករដ្ឋមន្ត្រី ហ៊ុន សែន កាលពីសប្ដាហ៍មុនឲ្យទប់ស្កាត់ការជួញដូរឈើខុសច្បាប់ដ៏រាលដាលនៅក្នុងខេត្តភាគបូពា៌ដែលមានព្រំប្រទល់ជាប់ប្រទេសវៀតណាម។
លោក អេង ហ៊ី បានមានប្រសាសន៍ថា សមាជិកក្រុមការងារពិសេសបានមកដល់ក្រុមហ៊ុនចម្ការកៅស៊ូតុងមីង (Tong Ming) ដែលគ្រប់គ្រងដោយជនជាតិចិនក្នុងខេត្តក្រចេះកាលពីម្សិលមិញ ហើយបានចាប់ផ្ដើមពិនិត្យមើលឃ្លាំងរបស់ក្រុមហ៊ុននេះ។
លោកបានថ្លែងថា “យើងបានរកឃើញឈើរាប់រយដុំគរទុកនៅក្នុងឃ្លាំង ប៉ុន្តែយើងមិនទាន់ដឹងថាតើមានឈើប៉ុន្មាននៅក្នុងឃ្លាំង ”ឬថាតើឈើណាជាឈើខុសច្បាប់ឡើយ។
ក្រុមហ៊ុនដែលគ្រប់គ្រងចម្ការកៅស៊ូ ឬមានដីសម្បទានសេដ្ឋកិច្ចផ្សេងទៀតត្រូវបានអនុញ្ញាតឲ្យកាប់ឈើនៅលើដីរបស់ខ្លួន ប៉ុន្តែត្រូវគេដឹងថា បានកាប់ឈើហួសពីព្រំដែនរបស់ខ្លួន ឬទិញឈើពីប្រភពគួរឲ្យសង្ស័យ។
ការឆ្មក់ចូលកាលពីម្សិលមិញធ្វើឡើងស្រដៀងគ្នាទៅនឹងការចុះទៅពិនិត្យមើលដីសម្បទានសេដ្ឋកិច្ច ឬឃ្លាំងមួយចំនួនទៀតកាលពីថ្ងៃអាទិត្យ រួមទាំងចម្ការកៅស៊ូ China Dynamic ដែលស្ថិតក្នុងខេត្តក្រចេះ និងដេប៉ូមួយកន្លែងទៀតរបស់លោក លឹម ប៊ុណ្ណា ពាណិជ្ជករមានទ្រព្យស្តុកស្តម្ភនៅក្នុងខេត្តត្បូងឃ្មុំជាប់គ្នាដែរ។
លោក អេង ហ៊ី បានថ្លែងថា ក្រុមការងារពិសេសនេះក៏បានចុះទៅពិនិត្យមើលឈើមួយ គំនរធំដែលគេរកឃើញក្នុងព្រៃក្នុងដែនជម្រក សត្វព្រៃភ្នំព្រិចក្នុងខេត្តមណ្ឌលគិរីផងដែរ។
អ្នកនាំពាក្យរូបនេះបានមានប្រសាសន៍ថា លោកមិនដឹងថាតើឈើនេះស្ថិតនៅលើដីរបស់ក្រុមហ៊ុនណាមួយដែលទទួលបានដីសម្បទានសេដ្ឋកិច្ចនៅក្នុងដែនជម្រកសត្វព្រៃនេះឡើយ។ ដីសម្បទានរបស់ក្រុមហ៊ុន Dai Thanh គឺស្ថិតនៅក្នុងដែនជម្រកសត្វព្រៃនេះ។ ក្រុមហ៊ុននេះកាន់កាប់ដោយលោក សឹង សំអុល ដែលលោកជាមួយនឹងលោក លឹម ប៊ុណ្ណាសុទ្ធតែជាគោលដៅដ៏សំខាន់របស់ក្រុមការងារពិសេសនេះ។
លោកទាំងពីរក៏មានងារជាឧកញ៉ាផងដែរ ជាងារផ្លូវការដែលទទួលបានបន្ទាប់ពីបរិច្ចាគប្រាក់យ៉ាងតិច១០០.០០០ដុល្លារដល់រដ្ឋាភិបាល។
លោក អេង ហ៊ី បានមានប្រសាសន៍ថា ក្រុមការងារពិសេសមិនទាន់ដឹងថា តើឈើដែលខ្លួនបានរកឃើញមកទល់ពេលនេះជាឈើខុសច្បាប់ឬយ៉ាងណានោះឡើយ ប៉ុន្តែថា វាអាចមានចម្លើយខ្លះត្រឹមថ្ងៃនេះ។
លោកបានថ្លែងថា “យើងនឹងចងក្រងរបាយការណ៍លម្អិតអំពីឈើដែលរកឃើញនៅក្នុងខេត្តទាំងបីនេះ ហើយបន្ទាប់មកយើងនឹងបញ្ជូនរបាយការណ៍នេះទៅសម្ដេចនាយករដ្ឋមន្ត្រី ហ៊ុន សែន”។
លោក សឹង សំអុល បានបដិសេធការចោទប្រកាន់ដែលថា មានការកាប់ឈើខុសច្បាប់។ លោក លឹម បុ៊ណ្ណា មិនអាចទាក់ទងសុំអត្ថាធិប្បាយបានទេ។
ទោះយ៉ាងណា ក្រុមការងារពិសេសមិនបានលើកឡើងពីលោកឧកញ៉ា ទ្រី ភាព ទេ ដែលរងការចោទប្រកាន់ថាបានលាងឈើខុសច្បាប់តាមរយៈដីសម្បទានសេដ្ឋកិច្ចរបស់លោកជាច្រើនកន្លែងជាងឧកញ៉ាផ្សេងៗទៀត។
នៅពេលសួរអំពីការជ្រើសរើសគោលដៅ លោក អេង ហ៊ី បានថ្លែងថា លោក ទ្រី ភាព នឹងជាផ្នែកមួយនៃការចាប់អារម្មណ៍របស់ក្រុមការងារពិសេសនេះ។ លោកបានថ្លែងថា “ក្រុមការងារពិសេសនឹងធ្វើការត្រួតពិនិត្យមិនត្រឹមតែឃ្លាំងរបស់លោក ទ្រី ភាព ប៉ុណ្ណោះទេ ប៉ុន្តែយើងនឹងពិនិត្យមើលក្រុមហ៊ុនទាំងអស់ដែលទទួលបានដីសម្បទាន។
អំឡុងកិច្ចប្រជុំលើកដំបូងរបស់ក្រុមការងារពិសេសក្នុងរាជធានីភ្នំពេញកាលពីថ្ងៃច័ន្ទ លោក អេង ប៊ុនហៀង អភិបាលខេត្តមណ្ឌល គិរីបានអះអាងថា លោក ទ្រី ភាព និងលោក លឹម ប៊ុណ្ណា ទទួលបានអាជ្ញាប័ណ្ណថ្មីៗសម្រាប់ដីសម្បទានសេដ្ឋកិច្ចនៅក្នុងដែនជម្រកសត្វព្រៃភ្នំព្រិចពីក្រសួងបរិស្ថាន។
អាជ្ញាប័ណ្ណនេះនឹងរំលោភលើបទបញ្ជាឲ្យមានការផ្អាកការផ្តល់អាជ្ញាប័ណ្ណដីសម្បទានសេដ្ឋកិច្ចថ្មី ដែលលោក ហ៊ុន សែន បានចេញកាលពីឆ្នាំ២០១២។
កាលពីម្សិលមិញ លោក សៅ សុភាព អ្នកនាំពាក្យក្រសួងបរិស្ថានបានបដិសេធការអះអាងរបស់អភិបាលខេត្តរូបនេះ។ លោកបានថ្លែងថា លោកឧកញ៉ាទំាងពីរត្រូវបានផ្ដល់ការអនុញ្ញាតឲ្យប្រមូលឈើដែលកាប់រួចនៅលើដីសម្បទានសេដ្ឋកិច្ចពីរដែលក្រសួងបានលុបចោលកាលពីឆ្នាំមុនប៉ុណ្ណោះ។
លោក សៅ សុភាព បានថ្លែងថា “មិនមានការផ្ដល់អាជ្ញាប័ណ្ណថ្មីសម្រាប់ដីសម្បទានសេដ្ឋកិច្ចឡើយ។ នេះគឺជាការទទួលបានការអនុញ្ញាតឲ្យប្រមូលឈើដែលកាប់រួចនៅលើដីសម្បទានចាស់តែប៉ុណ្ណោះ។ ពួកគាត់មិនត្រូវបានផ្ដល់ការអនុញ្ញាតឲ្យកាប់ឈើឡើយ”។
លោក សៅ សុភាព បានថ្លែងថា លោកមិនដឹងថាតើឈើប៉ុន្មានដែលពួកគាត់ទទួលបានការអនុញ្ញាតឲ្យប្រមូល ឬថាតើពួកគាត់បង់ប្រាក់ប៉ុន្មានដើម្បីទទួលបានសិទ្ធិនេះឡើយ។
ជាផ្នែកមួយនៃការបង្ក្រាបទៅលើការកាប់ឈើខុសច្បាប់ ក្រុមការងារពិសេសនេះក៏បានបញ្ជាឲ្យបញ្ឈប់ជាបណ្ដោះអាសន្នចំពោះការដឹកឈើទាំងអស់ពីប្រទេសកម្ពុជា ទៅប្រទេសវៀតណាម ដែលមានប្រសិទ្ធភាពភ្លាមៗ។ ភាគច្រើននៃការជួញដូរនោះត្រូវគេជឿថាខុសច្បាប់។
លោក អេង ហ៊ី បានមានប្រសាសន៍ថា “យើងបានបញ្ឈប់ការនាំចេញទាំងស្របច្បាប់ និងខុសច្បាប់ទៅក្រៅប្រទេសចាប់ពីពេលនេះទៅ ពីព្រោះក្រុមការងារពិសេសរបស់យើងចង់ស្វែងរកការពិត”។
រដ្ឋាភិបាលបានធ្វើប្រតិបត្តិការដ៏លេចធ្លោប្រឆាំងការជួញដូរឈើខុសច្បាប់ដ៏រាលដាលច្រើនលើកច្រើនសាមកហើយពីមុនមក។ ប៉ុន្តែការខិតខំប្រឹងប្រែងទាំងនេះបានស្ងប់ស្ងាត់ទៅវិញបន្ទាប់ពីធ្វើបានពីរបីខែ ហើយបានធ្វើឲ្យអង្គការសិទ្ធិបរិស្ថានមានការឃ្លាំមើលយ៉ាងយកចិត្តទុកដាក់អំពីការប្ដេជ្ញាចិត្តរបស់រដ្ឋាភិបាល។
របាយការណ៍ និងការស៊ើបអង្កេតក្នុងរយៈពេលប៉ុន្មានឆ្នាំកន្លងមកនេះបានភ្ជាប់រដ្ឋាភិបាលក្នុងការជួញដូរឈើខុសច្បាប់ក្នុងកម្រិតខ្ពស់បំផុត។ លោក សៅ សុខា មេបញ្ជាការ កងរាជអាវុធហត្ថលើផ្ទៃប្រទេសដែលលោក នាយករដ្ឋមន្ត្រីបានចាត់តាំងឲ្យទទួលបន្ទុកក្រុមការងារពិសេសថ្មីនេះ ត្រូវបានចោទប្រកាន់ ពីសំណាក់អង្គការក្លូបលវីតណេសជាអង្គការឃ្លាំមើលបរិស្ថានថា បានដើរតួនាទីសំខាន់ក្នុងការជួញដូរនេះដោយខ្លួនឯង៕ សារុន (រាយការណ៍បន្ថែមដោយ Zsombor Peter)