កាលពីថ្ងៃអាទិត្យ ទី២៤ មេសា ប្រទេសបារាំងបង្កើតបាននូវព្រឹត្តិការណ៍ជាប្រវត្តិសាស្ត្រថ្មីទៀត គឺការបោះឆ្នោតប្រធានាធិបតី ដែលជាការបោះឆ្នោតជុំផ្ដាច់ព្រ័ត្ររវាងបេក្ខជន ២រូប គឺលោក Emmanuel Macron ដែលជាបេក្ខជនប្រធានាធិបតីកំពុងកាន់តំណែង និងអ្នកស្រី Marine Le Pen។
លទ្ធផលដែលបានបង្ហាញថា លោក ម៉ាក្រុង អាចកាន់កាប់អាណត្តិទីពីររបស់ខ្លួនបាន គឺលោក ម៉ាក្រុង បានឈ្នះឆ្នោតដោយគិតជាភាគរយ គឺជាង ៥៨% ហើយចំណែកអ្នកស្រី Marine Le Pen ដែលមកពីបក្សស្ដាំនិយម បានសន្លឹកឆ្នោតជាង ៤១%។ ជ័យជម្នះរបស់លោក ម៉ាក្រុង បាននាំឱ្យមេដឹកនាំពិភពលោកជាច្រើនបញ្ជូនលិខិតអបអរសាទរ។
ប៉ុន្តែអ្វីដែលជាការភ្ញាក់ផ្អើល គឺប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) ក៏បានបញ្ជូនសារចូលរួមអបអរលោក ម៉ាក្រុង ឈ្នះឆ្នោតផងដែរ ហើយធ្វើឲ្យមានការកត់សម្គាល់អំពីសាររបស់លោក ពូទីន ដែលបានផ្ញើឲ្យមេដឹកនាំម្នាក់ដែលកំពុងផ្ដល់សព្វាវុធធុនធ្ងន់ទៅឲ្យកងទ័ពអ៊ុយក្រែនយកទៅច្បាំងនឹងកងទ័ពរុស្ស៊ី។
សារព័ត៌មាន AP មើលឃើញចរិតមេដឹកនាំផ្ដាច់ការនៃទីក្រុងមូស្គូម្នាក់នេះដែលកោងកាច គឺមិនសមនឹងទន់ភ្លន់ដាក់មេដឹកនាំបស្ចិមប្រទេសមួយនេះទេ ព្រោះរបបលោក ពូទីន ក៏កំពុងរងទណ្ឌកម្មសេដ្ឋកិច្ចពីរដ្ឋាភិបាលលោក ម៉ាក្រុង ផងដែរ។ អ្វីជាការកត់សម្គាល់ទៀតនោះ គឺនៅមុនការបោះឆ្នោតតែប៉ុន្មានថ្ងៃប៉ុណ្ណោះ លោក ម៉ាក្រុង បានបញ្ជាឱ្យរដ្ឋការរបស់លោកបញ្ជូនអាវុធធុនធ្ងន់ឲ្យកងទ័ពអ៊ុយក្រែន ដើម្បីច្បាំងការពារទឹកដីពីការឈ្លានពាននៃសង្គ្រាមរបស់លោក ពូទីន។ អាវុធធុនធ្ងន់មួយចំនួនដែលជាអាវុធដ៏ទំនើប និងមានប្រសិទ្ធភាពបំផុតដែលលោក ម៉ាក្រុង បញ្ជូនឱ្យអ៊ុយក្រែន គឺកាំភ្លើងធំ Caesar និងមីស៊ីលប្រឆាំងរថពាសដែក Milan ព្រមទាំងអាវុធជាច្រើនប្រភេទផ្សេងទៀត។
អាវុធ Caesar ជាកាំភ្លើងធំបំពាក់លើឡានកាមីញ៉ុងមានកាណុងរង្វង់ ១៥៥មិល្លីម៉ែត្រ អាចបាញ់បានដល់ ៤០គីឡូម៉ែត្រ ឬ ២៥ម៉ាយ។
កាំភ្លើងត្បាល់នេះធ្លាប់បានយកធ្វើចម្បាំងនៅអាហ្វហ្គានីស្ថាន និងវាយប្រហារទៅលើក្រុមរដ្ឋភេរវកម្មនៅក្នុងប្រទេសអ៊ីរ៉ាក់ កាលពីឆ្នាំ២០១៧។ តាមដំណឹងមកថា កងទ័ពអ៊ុយក្រែនជាង ៤០នាក់បានមកហ្វឹកហាត់ប្រើអាវុធនេះនៅក្នុងប្រទេសបារាំង មុននឹងបញ្ជូនទៅឲ្យកងទ័ពអ៊ុយក្រែន។ កាំភ្លើងធំនេះអាចបាញ់បាន ៦ដងក្នុងមួយនាទី ចំណែកមីស៊ីលមីឡង់ ជាអាវុធមានវ័យចំណាស់បន្តិច ហើយអ៊ុយក្រែនធ្លាប់បានទទួលខ្លះមកហើយ។ អាវុធទាំងនេះបានបញ្ជូនទៅអ៊ុយក្រែនជាបណ្តើរៗហើយ។
ក្នុងយុទ្ធនាការរកសំឡេងឆ្នោតដ៏ក្ដៅគគុក បេក្ខជន ១០រូបនៃតំណែងប្រធានាធិបតីបារាំង សុទ្ធតែបានផ្ដោតលើសង្គ្រាមនៅអ៊ុយក្រែន។ គ្មានបេក្ខជនណាមួយមិនមានរបៀបវារៈអំពីរឿងនេះទេ។
សម្រាប់លោក ម៉ាក្រុង រងការរិះគន់ជាខ្លាំងព្រោះលោកព្យាយាមទូរស័ព្ទទៅលោក ពូទីន ឱ្យបើកចរចាជាមួយប្រធានាធិបតីអ៊ុយក្រែន ហើយបានទទូចឱ្យជនផ្ដាច់ការរុស្ស៊ីម្នាក់នេះបញ្ចប់សង្គ្រាមលើទឹកដីអ៊ុយក្រែន តែលោក ពូទីន មិនបានស្ដាប់លោកឡើយ។
ដោយសារតែដូចនេះហើយ មេដឹកនាំប៉ូឡូញបានចំអកឱ្យលោក ម៉ាក្រុង ថា ព្យាយាមបញ្ចុះបញ្ចូលលោក ពូទីន ដោយឥតប្រយោជន៍ ហើយមេដឹកនាំប៉ូឡូញ ស្នើឱ្យលោក ម៉ាក្រុង ចាត់ទុកលោក ពូទីន ជាអតីតមេដឹកនាំអាល្លឺម៉ង់ អាឌុល អ៊ីត្លែរ ឬក៏ ប៉ុល ពត អតីតនាយករដ្ឋមន្ត្រីកម្ពុជានៃរបបខ្មែរក្រហម។
ចាប់តាំងពីនោះមក គេសង្កេតឃើញលោក ម៉ាក្រុង ដកថយក្រោយមួយជំហានវិញ ហើយក៏សម្រេចចូលរួមជាមួយប្រទេសផ្សេងៗទៀតផ្ដល់អាវុធទៅឱ្យកងទ័ពអ៊ុយក្រែន។
សម្រាប់អ្នកវិភាគម្នាក់ គឺលោក François Heisbourg ដែលជំនាញរបស់លោកអំពីកិច្ចការសន្តិសុខមកពីវិទ្យាស្ថានអន្តរជាតិសិក្សាអំពីយុទ្ធសាស្ត្រសង្គ្រាម មើលឃើញថា លោក ម៉ាក្រុង ដែលសម្រេចបញ្ជូនអាវុធទៅឱ្យកងទ័ពអ៊ុយក្រែនពិតជារបៀបវារៈដ៏គន្លឹះរបស់លោក ហើយដែលជាជ្រុងមួយនាំឲ្យលោក ម៉ាក្រុង ឈ្នះការបោះឆ្នោតបន្តអាណត្តិទី២ របស់លោកជាប្រធានាធិបតីបារាំង។
អ្នកវិភាគរូបនេះថា ប្រទេសដែលមានសក្ដានុពលផ្នែកកងទ័ពដូចជាសហរដ្ឋអាមេរិក អង់គ្លេស អាល្លឺម៉ង់ កាណាដា អូស្ត្រាលី កំពុងបន្ថែមជំនួយសព្វាវុធទៅឱ្យកងទ័ពអ៊ុយក្រែន ដែលនេះហើយធ្វើឱ្យលោក ម៉ាក្រុង មានការអៀនខ្មាស។ តែលោកថា ចិត្តសាស្ត្ររបស់មេដឹកនាំមានច្រើនសណ្ឋាន ដែលពេលខ្លះទន់ភ្លន់ តែពេលខ្លះប្រកាន់ជំហរអត្តនោម័តិ។
អ្នកវិភាគរូបនេះថា ដោយសារតែអ៊ុយក្រែនមានអាវុធទំនើបរបស់ពួកបស្ចិមប្រទេសនេះហើយដែលនាំឱ្យរុស្ស៊ី វាយចូលរដ្ឋធានីគៀវ មិនបាន ហើយក៏ធ្វើឲ្យរបបលោក ពូទីន គិតអំពីបរាជ័យរបស់ខ្លួនខ្លះដែរ។
តាមដំណឹងពីប្រទេសអាល្លឺម៉ង់ គឺសមាជិកសភាម្នាក់និយាយនៅថ្ងៃអង្គារនេះថា សភាបានអនុម័តជាផ្លូវការឱ្យរដ្ឋាភិបាលបញ្ជូនប្រព័ន្ធអាវុធប្រឆាំងយន្តហោះចម្បាំងទៅឱ្យអ៊ុយក្រែន ខណៈសហរដ្ឋអាមេរិកចាប់ផ្ដើមបើកកិច្ចប្រជុំបន្ទាន់ជាមួយសម្ព័ន្ធមិត្ត ដើម្បីពិភាក្សាគ្នាពីការបង្កើនការផ្ដល់ជំនួយយោធាដល់អ៊ុយក្រែន។ សមាជិកសភា Johannes Vogel បានបង្ហើបដូចនេះប្រាប់ប្រព័ន្ធផ្សព្វផ្សាយអាល្លឺម៉ង់។ ចំណែករដ្ឋមន្ត្រីការពារជាតិអាល្លឺម៉ង់ អ្នកស្រី Christine Lambrecht ថានឹងប្រកាសពីការសម្រេចចិត្តជាមួយសម្ព័ន្ធមិត្ត ដើម្បីបង្កើនការផ្ដល់សព្វាវុធទៅឱ្យប្រទេសអ៊ុយក្រែន៕