ក្រសែភ្នែករបស់អ្នកប្រជាធិបតេយ្យនៃប្រទេសលោកខាងលិច កំពុងសម្លឹងទៅរកចិន ដែលប្រទេសកុម្មុយនីស្តដ៏ធំមួយនេះកំពុងប្រើសក្ដានុពលសេដ្ឋកិច្ច និងកម្លាំងយោធាទៅលើប្រទេសមួយចំនួនជាកូនបំណុលពាន់លានដុល្លារ ឱ្យស្ថិតនៅក្រោមឥទ្ធិពលរបស់ក្រុងប៉េកាំង។
រុស្ស៊ី ជាមហាអំណាចដ៏ខ្លាំងមួយនៅលើពិភពលោកដែលមិនមានឈ្មោះក្នុងចំណោម ២០ប្រទេសជាប្រទេសជំពាក់បំណុលចិន គរដូចភ្នំនោះទេ តែទីក្រុងមូស្គូ ធ្លាក់ក្នុងរបបផ្ដាច់ការជាង ២០ឆ្នាំមកហើយ ចាប់តាំងពីលោក វ៉្លាឌីមៀរ ពូទីន ឡើងកាន់តំណែងជាប្រធានាធិបតីនៅឆ្នាំ២០០០ មកនោះ។
នៅក្នុងរយៈពេល ១០ឆ្នាំចុងក្រោយនេះ គេសង្កេតឃើញរបបនៅក្រុងប៉េកាំង និងក្រុងមូស្គូ ចាប់ដៃគ្នាយ៉ាងស្អិតល្មួតក្នុងការកៀរគរប្រទេសដែលកំពុងដើរលើផ្លូវផ្ដាច់ការ ឱ្យស្ថិតនៅក្រោមឥទ្ធិពលរបស់ខ្លួន។ គេថាក្រុងប៉េកាំង ប្រើប្រាក់កម្ចីរបស់ខ្លួនលើកទឹកចិត្តប្រទេសដែលកំពុងទៅរកប្រព័ន្ធផ្ដាច់ការ ឱ្យកាន់តែងាកចេញពីគន្លងប្រជាធិបតេយ្យពហុភាពសេរីនិយម ហើយបង្កើតខ្សែអំណាចចាក់ស្រេះក្នុងសង្គមដែលគេថារបបនៃការដឹកនាំសង្គមផ្ដាច់ការ និងគ្រួសារនិយម។
ចំណែកមហាអំណាចរុស្ស៊ី ជាប្រភពនៃការជួយពង្រឹងប្រទេសប្រជាធិបតេយ្យក្លែងក្លាយទាំងនោះ ឱ្យមានកម្លាំងយោធារឹងមាំ ជាមួយនឹងការផ្ដល់ ឬលក់អាវុធទៅឱ្យប្រទេសទាំងនោះ។
រយៈពេលជាង ១០ឆ្នាំចុងក្រោយនេះ ពិភពលោកធ្លាក់ក្នុងប្រព័ន្ធអំណាចផ្ដាច់ការកាន់តែកើនឡើង។
គេថា ប្រទេសទាំងនោះមិនអនុវត្តប្រព័ន្ធកុម្មុយនីស្តនោះទេ តែមេដឹកនាំដែលក្ដោបអំណាចកងទ័ព និងប្រព័ន្ធតុលាការណែនក្នុងដៃ បានចាប់យកប្រព័ន្ធដឹកនាំប្រជាធិបតេយ្យធ្វើជាឧបករណ៍ពង្រឹងអំណាចសម្រាប់ខ្លួនឯង និងបក្ខពួករបស់ខ្លួន តាមរយៈការបោះឆ្នោតដែលបំបិទសំឡេងប្រឆាំង។ ប្រទេសទាំងអស់នោះច្រើនមាននៅក្នុងទ្វីបអាហ្វ្រិក តំបន់អាស៊ីអាគ្នេយ៍ តំបន់អាស៊ីខាងត្បូង និងប្រទេសខ្លះនៅមជ្ឈិមបូព៌ា។ ប្រទេសទាំងនោះភាគច្រើនជាកូនបំណុលចិនវ័ណ្ឌក និងក្រោមឥទ្ធិពលរបបផ្ដាច់ការនៅក្រុងមូស្គូ។
ទាំងអស់នេះហើយមើលទៅបានជាអគ្គលេខាធិការយោធាណាតូ Jens Stoltenberg នៅក្នុងបទសម្ភាសន៍ជាមួយបណ្ដាញផ្សាយព័ត៌មានអង់គ្លេស BBC កាលពីពេលថ្មីៗនេះ លោកបានថ្លែងថា សម្ព័ន្ធភាពនៃក្រុមប្រទេសផ្ដាច់ការ បានកំពុងរួមកម្លាំងគ្នាប្រឆាំងប្រជាធិបតេយ្យលោកខាងលិច។
តាមលោកអគ្គលេខាធិការយោធាណាតូ ប្រទេសផ្ដាច់ការខ្លាំងក្លាចំនួន ៤ មានចិន រុស្ស៊ី អ៊ីរ៉ង់ និងកូរ៉េខាងជើង គឺជាមេខ្លោងនៃការទាញប្រទេសដែលមានមេដឹកនាំក្រាញអំណាច និងផ្ដាច់ការ ឱ្យកាន់តែងាកចេញពីប្រព័ន្ធប្រជាធិបតេយ្យ ហើយរួមគ្នាប្រឆាំងនឹងលោកខាងលិច។
លោក Jens Stoltenberg សង្កត់ធ្ងន់ថា ដើម្បីបំបាក់ប្រព័ន្ធអំណាចផ្ដាច់ការ គេត្រូវធ្វើឱ្យរុស្ស៊ី ចាញ់សង្គ្រាមឈ្លានពានអ៊ុយក្រែន ហើយសម្ព័ន្ធណាតូ ដែលការពារប្រជាធិបតេយ្យ ត្រូវរួមគ្នាខ្លាំងថែមទៀតជួយអ៊ុយក្រែន ឱ្យមានប្រៀបឡើងវិញ វាយបកសង្គ្រាមរបស់រុស្ស៊ី។
លោក Jens Stoltenberg សង្ឃឹមថា ជំនួបកំពូលនៃមេដឹកនាំណាតូនៅសហរដ្ឋអាមេរិកនៅខែកក្កដា ខាងមុខនេះ នឹងមានការប្ដេជ្ញាចិត្តរឹងមាំជួយពង្រឹងកម្លាំងយោធារបស់អ៊ុយក្រែន និងរួមគ្នាទប់ស្កាត់កម្លាំងអំណាចផ្ដាច់ការដែលចិន រុស្ស៊ី អ៊ីរ៉ង់ និងកូរ៉េខាងជើង ជាមេខ្លោង។
តាមអគ្គលេខាធិការយោធាណាតូ ប្រទេសចិនជាកម្លាំងមួយដែលជួយសេដ្ឋកិច្ចរុស្ស៊ី ឱ្យដកដង្ហើមបានមកដល់ពេលនេះ ហើយជាប្រភពលើកទឹកចិត្តឱ្យរបបផ្ដាច់ការនៅក្រុងមូស្គូ មានកម្លាំងប្រយុទ្ធនឹងកម្លាំងរួមរបស់លោកខាងលិចដែលជួយអ៊ុយក្រែន។
ឥឡូវឃើញហើយថា ប្រធានាធិបតីចិន លោក ស៊ី ជីនពីង (Xi Jinping) ដែលបានជួបជាមួយរដ្ឋមន្ត្រីការបរទេសរុស្ស៊ី លោក Sergey Lavrov កាលពីថ្ងៃអង្គារ ទី៩ ខែមេសា នៅទីក្រុងប៉េកាំង គឺពិតណាស់ជាការបង្ហាញការគាំទ្រគ្នាទៅវិញទៅមកប្រឆាំងនឹងពួកប្រទេសលោកខាងលិចកាន់លទ្ធិប្រជាធិបតេយ្យ នៅពេលរដ្ឋាភិបាលក្រុងមូស្គូ បន្តលុកលុយប្រទេសអ៊ុយក្រែន។
លោក Lavrov បាននិយាយថា រុស្ស៊ីពេញចិត្តនឹងការបន្តជួយរបស់ចិន ដែលនាំឱ្យរុស្ស៊ីបន្តជោគជ័យមកដល់ពេលនេះ។
ប្រទេសចិន ជាអតីតគូប្រជែងរបស់រុស្ស៊ី ដើម្បីដឹកនាំប្លុកកុម្មុយនីស្តក្នុងសម័យកាលនៃសង្គ្រាមត្រជាក់ ប៉ុន្តែក្នុងប៉ុន្មានទសវត្សមកនេះ ប្រទេសទាំងពីរនេះមានគោលនយោបាយការបរទេសស្របគ្នា ហើយតែងតែធ្វើសមយុទ្ធយោធារួមគ្នា និងស្វះស្វែងប្រមែប្រមូលបណ្ដាប្រទេសដែលងាកចេញពីប្រជាធិបតេយ្យ ឱ្យនៅជាមួយនឹងខ្លួន តាមរយៈការផ្ដល់វិភាគទានសេដ្ឋកិច្ចដ៏មហិមា និងបច្ចេកវិទ្យាសព្វាវុធ។
ចិន និងរុស្ស៊ី ជាដៃគូខាងការទូតសំខាន់បំផុត ព្រោះប្រទេសទាំងពីរនេះកាន់កាប់អាសនៈអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ហើយធ្វើការជាមួយគ្នាដើម្បីរាំងខ្ទប់ការផ្តើមគំនិតរបស់សហរដ្ឋអាមេរិក និងសម្ពន្ធមិត្តអាមេរិក ក្នុងការផ្សព្វផ្សាយគុណតម្លៃប្រជាធិបតេយ្យ និងសិទ្ធិមនុស្សនៅលើពិភពលោក។
លោករដ្ឋមន្ត្រីការបរទេសរុស្ស៊ី Sergey Lavrov បានទៅដល់ប្រទេសចិន កាលពីថ្ងៃចន្ទ ទី៨ ខែមេសា។ ចំណែកឯលោក Wang Yi រដ្ឋមន្ត្រីការបរទេសចិន បានធ្វើទស្សនកិច្ចនៅរុស្ស៊ី កាលពីពេលថ្មីៗនេះ ហើយចិន បានគាំទ្រទស្សនៈរុស្ស៊ី អំពីបុព្វហេតុនៃសង្គ្រាមនៅអ៊ុយក្រែន។
ការធ្វើសមយុទ្ធយោធារួមគ្នាជាញឹកញាប់រវាងចិន និងរុស្ស៊ី ត្រូវបានគេមើលឃើញថា មហាអំណាចទាំងពីរនេះប្រឹងប្រែងដាក់ឱ្យមានការកាន់អំណាចផ្ដាច់ការជំនួសលទ្ធិប្រជាធិបតេយ្យក្នុងតំបន់ដែលពួកគេមានឥទ្ធិពល៕