ក្រុមយុវជនខ្មែរថាវរៈចំនួន ៦នាក់ និងកញ្ញា សេង ធារី ដែលកំពុងជាប់ឃុំនៅឯពន្ធនាគារខេត្តព្រះវិហារ រួមគ្នាធ្វើយុទ្ធនាការពហិការបង្អត់អាហារខ្លួនឯងរយៈពេលមួយសប្ដាហ៍ ចាប់ពីថ្ងៃទី៧ ដល់ថ្ងៃទី១៤ ខែវិច្ឆិកា ឆ្នាំ២០២២ ដើម្បីទាមទារឱ្យតុលាការដោះលែងកញ្ញា សេង ធារី ឱ្យមានសេរីភាពវិញ។
ក្រុមយុវជនទាំងនោះបានបង្ហោះព័ត៌មានអំពីយុទ្ធនាការបង្អត់អាហារខ្លួនឯងលើបណ្ដាញសង្គមកាលពីថ្ងៃទី២ ខែវិច្ឆិកា ឆ្នាំ២០២២ ដោយសរសេរថា ពួកគេទាំង ៦នាក់នឹងបង្អត់អាហារខ្លួនឯងរយៈពេល «៧ថ្ងៃ ៧យប់» ចាប់ពីថ្ងៃទី៧ ដល់ថ្ងៃទី១៤ ខែវិច្ឆិកា ឆ្នាំ២០២២។
លោក ស្វាយ សំណាង យុវជនម្នាក់ក្នុងចំណោម ៦នាក់ បានឲ្យដឹងថា ក្នុងរយៈពេល ៧ថ្ងៃនេះ ក្រុមយុវជននឹងមិនទទួលទានអាហាររឹង ដូចជាបាយ និងផ្លែឈើឡើយ ដោយគ្រាន់តែផឹកទឹក និងភេសជ្ជៈផ្សេងៗប៉ុណ្ណោះ។
សមាជិកខ្មែរថាវរៈមួយរូបទៀត គឺកញ្ញា ឈឿន ដារ៉ាវី បានបង្ហោះសារ និងរូបភាពដោយសរសេរថា ការតស៊ូមតិរបស់ពួកគេនេះដោយបារម្ភពីសុខភាព និងសុវត្ថិភាពរបស់កញ្ញា សេង ធារី ដែលកំពុងជាប់ពន្ធនាគារក្នុងខេត្តព្រះវិហារ ជាប់ព្រំប្រទល់ប្រទេសថៃ។
កញ្ញា ដារ៉ាវី អះអាងថា ក្រុមរបស់កញ្ញាទាំងអស់គ្នានឹងចាប់ផ្ដើមយុទ្ធនាការបង្អត់អាហារជាមួយកញ្ញា សេង ធារី រយៈពេលមួយសប្តាហ៍ ដើម្បីស្នើទៅតុលាការដោះលែងរូបគាត់។ ក្រុមកញ្ញាទាំងអស់គ្នាមានការបារម្ភពីសុខភាព និងសុវត្ថិភាពរបស់កញ្ញា សេង ធារី ក្រោយពីជាប់ពន្ធនាគាររយៈពេល ១៥២ថ្ងៃមកនេះ។
លោក ជូង ជូងី មេធាវីការពារក្តីឱ្យកញ្ញា សេង ធារី បានលើកឡើងថា កូនក្ដីរបស់លោកពិតជាបង្អត់អាហារដើម្បីទាមទារយុត្តិធម៌សម្រាប់ខ្លួនគាត់ពិតមែន។ លោកថា ដើមចមដែលនាំឱ្យកូនក្ដីរបស់លោកបង្អត់អាហារ ដោយសារតែគាត់មានអារម្មណ៍ប៉ះពាល់ផ្លូវចិត្តដោយសារតែការចោទប្រកាន់ និងការឃុំខ្លួនគាត់ដោយពុំមានកំហុស។
លោក ជូង ជូងី បន្តទៀតថា លោកស្នើទៅតុលាការទម្លាក់ការចោទប្រកាន់ និងដោះលែងកូនក្ដីរបស់គាត់ឱ្យមានសេរីភាពវិញ ដោយថាកូនក្ដីមិនបានធ្វើខុសដូចការចោទប្រកាន់នោះទេ។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន ផ្តល់យោបល់ដល់ក្រុមយុវជនថាវរៈថា មានតែស្វែងរកភស្តុតាងដោះបន្ទុក និងចូលរួមតាមនីតិវិធីរបស់តុលាការទេ ទើបអាចជួយការពារកញ្ញា សេង ធារី បាន។ លោកបន្តថា ការធ្វើពហិការបង្អត់អាហារខ្លួនឯងបែបនេះ មិនអាចជួយតាមផ្លូវច្បាប់បានឡើយ។
មន្ត្រីជាន់ខ្ពស់នៃក្រសួងយុត្តិធម៌រូបនេះថ្លែងថា យុទ្ធនាការបង្អត់អាហារនេះគ្រាន់តែជាវិធីសាស្ត្រដើម្បីទាមទារការចាប់អារម្មណ៍ និងបិទបាំងនូវកំហុសដែលខ្លួនបានប្រព្រឹត្ត តែអត់មានឥទ្ធិពលអីលើតុលាការដែលជាស្ថាប័នអនុវត្តច្បាប់ទេ។
កញ្ញា សេង ធារី ដែលមានសញ្ជាតិអាមេរិកាំង និងជាមេធាវីអន្តរជាតិ ត្រូវបានលោក រស់ ពិសិដ្ឋ ចៅក្រមជំនុំជម្រះនៃសាលាដំបូងរាជធានីភ្នំពេញកាលពីថ្ងៃទី១៤ ខែមិថុនា ឆ្នាំ២០២២ ផ្ដន្ទាទោសដាក់ពន្ធនាគាររយៈពេល ៦ឆ្នាំ ពីបទ «ញុះញង់ និងរួមគំនិតក្បត់»។
ក្រៅពីកញ្ញា សេង ធារី ចៅក្រមជំនុំជម្រះក៏បានផ្ដន្ទាទោសថ្នាក់ដឹកនាំ និងអ្នកគាំទ្រគណបក្សសង្គ្រោះជាតិដែលត្រូវបានតុលាការរំលាយចំនួន ៥០នាក់ផ្សេងទៀតដាក់ពន្ធនាគារចន្លោះពី ៥ ទៅ ៨ឆ្នាំ ក្រោមបទចោទដូចគ្នានេះជុំវិញការប្រកាសជំហរគាំទ្រការធ្វើមាតុភូមិនិវត្តន៍ថ្ងៃទី៩ វិច្ឆិកា របស់លោក សម រង្ស៊ី។
ក្រោយការប្រកាសសាលក្រមមួយថ្ងៃ នៅថ្ងៃទី១៥ ខែមិថុនា ឆ្នាំ២០២២ សមត្ថកិច្ចរាជធានីភ្នំពេញបានបញ្ជូនកញ្ញា សេង ធារី ចេញពីពន្ធនាគារព្រៃស រាជធានីភ្នំពេញ ទៅឃុំខ្លួននៅពន្ធនាគារខេត្តព្រះវិហារ ក្រោមហេតុផលថា ដោយសារបារម្ភពីការប៉ះពាល់ដល់សន្តិសុខក្នុងពន្ធនាគារ៕