កាលពីម្សិលមិញវាមានសញ្ញាតិចតួចណាស់ដែលថា អគារចំនួនពីរសាងសង់ក្បែរព្រះបរមរាជវាំងក្នុងរាជាធានីភ្នំពេញ ដែលរដ្ឋាភិបាលបានចេញបទបញ្ជាឲ្យកាត់បន្ថយកម្ពស់នឹងត្រូវកាត់បន្ថយកម្ពស់នោះ ទោះបីជាពេលកំណត់រយៈពេលមួយខែពីសាលារាជធានីភ្នំពេញជិតមកដល់ក្ដី។
មន្ត្រីសាលារាជធានីភ្នំពេញបានលើកឡើងកាលពីសប្ដាហ៍មុនថា អគារចំនួនពីរនេះត្រូវបានសាងសង់លើសកម្ពស់កំណត់ដែលមានចែងនៅក្នុងកិច្ចសន្យាសាងសង់។សេចក្ដីជូនដំណឹងត្រូវបានចេញទៅឲ្យម្ចាស់អគារទាំងពីរនេះកាលពីខែតុលា ដោយដាក់ពេលកំណត់ឲ្យកាត់បន្ថយកម្ពស់មិនឲ្យលើសពីថ្ងៃទី២១ ខែវិច្ឆិកាឡើយ។ សេចក្ដីជូនដំណឹងនេះបានណែនាំឲ្យម្ចាស់អគារកាត់បន្ថយកម្ពស់អគាររបស់ខ្លួន បើពុំដូច្នោះទេសាលារាជធានីនឹងធ្វើកិច្ចការនេះជំនួស។
លោក ឡុង ឌីម៉ង់ អ្នកនាំពាក្យសាលារាជធានី កាលពីម្សិលមិញបដិសេធមិននិយាយថា តើបទបញ្ជាឲ្យកាត់បន្ថយកម្ពស់នេះនឹងត្រូវអនុវត្តឬយ៉ាងណានោះទេ ប្រសិនបើម្ចាស់អគារមិនបានធ្វើតាមបទបញ្ជានោះ។ លោកបានមានប្រសាសន៍ថា “នេះគឺជាសេចក្ដីសម្រេចរបស់ថ្នាក់លើ” ។ អគារទាំងពីរនេះគឺស្ថិតនៅក្នុងប្លុកនៃបរិវេណព្រះបរមរាជវាំង។
អគារមួយដែលគ្រប់គ្រងដោយក្រុមហ៊ុនអចលនទ្រព្យវឌ្ឍនៈ គឺស្ថិតនៅតាមបណ្ដោយតីរវិថីស៊ីសុវត្ថិ ហើយអគារមួយផ្សេងទៀតជាអគារមានកម្ពស់ជាច្រើនជាន់ដែលគ្រប់គ្រងដោយម្ចាស់ឯកជនម្នាក់ គឺស្ថិតនៅតាមបណ្ដោយផ្លូវលេខ១៩ ខាងក្រោយសាកលវិទ្យាល័យភូមិន្ទវិចិត្រសិល្បៈ។ អគារវឌ្ឍនៈ ត្រូវបានអនុញ្ញាតឲ្យសាងសង់ត្រឹមកម្ពស់១៤ម៉ែត្រប៉ុណ្ណោះ ប៉ុន្តែឥឡូវនេះបានសាងសង់លើសដល់កម្ពស់២០ម៉ែត្រទៅទៀត ហើយអគារមួយផ្សេងទៀតដែលត្រូវសាងសង់ដើម្បីធ្វើជាសណ្ឋាគារ ត្រូវបានអនុញ្ញាតឲ្យសាងសង់ត្រឹមតែកម្ពស់២៤,៥ ម៉ែត្រប៉ុណ្ណោះ ប៉ុន្តែឥឡូវនេះបានសាងសង់លើសកម្ពស់ដល់ទៅជាង៣៤,៥ម៉ែត្រឯណោះ។
លោក ស៊ិន គឹមហេង ម្ចាស់អគារដែលនៅតាមបណ្ដោយផ្លូវលេខ១៩បានឲ្យដឹងកាលពីម្សិលមិញថា លោកមិនបានទទួលសេចក្ដីជូនដំណឹងណាមួយពីសាលារាជធានីឲ្យលោកកាត់បន្ថយកម្ពស់អគាររបស់លោកឡើយ ប៉ុន្តែទោះជាយ៉ាងណាលោកបានផ្អាកការសាងសង់នេះមួយរយៈរួចទៅហើយ។
លោកបាននិយាយថា “យើងបានផ្អាកការសាងសង់ជិតមួយខែមកហើយ ប៉ុន្តែឥឡូវនេះយើ់ងកំពុងតែតុបតែងនៅផ្នែកខាងក្នុងអគារ”។
នៅកន្លែងអគារនោះកាលពីម្សិលមិញគេឮសំឡេងស្វាន ហើយមានកម្មករប្រហែលជា១០នាក់បានដើរចេញចូលអគារនេះ។ រីឯនៅកន្លែងអគារវឌ្ឍនៈវិញ ជាទីដែលការសាងសង់ត្រូវបានផ្អាកតាំងពីថ្ងៃទី១ ខែតុលាមក តាមបទបញ្ជាលោក ប៉ា សុជាតិវង្ស អភិបាលរាជធានីភ្នំពេញ មានសំណាញ់ពណ៌បៃតងគ្របពីលើអគារនេះទាំងមូល។
ហើយគ្មានសញ្ញាណាមួយបង្ហាញថា អគារនេះនឹងត្រូវកាត់បន្ថយកម្ពស់ដែលលើសនោះឡើយ។ នៅពេលទាក់ទងកាលពីម្សិលមិញអ្នកស្រី ឈុន លៀង ជាម្ចាស់ក្រុមហ៊ុនអចលនទ្រព្យវឌ្ឍនៈ បានបដិសេធមិនធ្វើអត្ថាធិប្បាយឡើយ នៅពេលត្រូវបានសួរថា តើអ្នកស្រីមានបានទទួលសេចក្ដីជូនដំណឹងឲ្យកាត់បន្ថយអគារពីសាលារាជធាី ឬក៏អត់នោះ។ អ្នកស្រីបានមានប្រសាសន៍ថា “ខ្ញុំគ្មានចម្លើយសម្រាប់អ្នកឡើយ”៕ ស៊ុយឈាង