មន្ត្រីសង្គមស៊ីវិលក្នុងប្រទេសអូស្ត្រាលី ចាត់ទុកដីកាតុលាការសម្រេចរឹបអូសទ្រព្យសម្បត្តិទីប្រឹក្សាគណបក្សកម្លាំងជាតិ លោក រ៉ុង ឈុន លក់ដោយបង្ខំដើម្បីបង់សងលុយដល់គណៈកម្មាធិការចម្រុះកិច្ចការព្រំដែន ជាទង្វើអមនុស្សធម៌ និងអគុណធម៌។
ប្រធានអង្គការក្រៅរដ្ឋាភិបាលដែលមានមូលដ្ឋានក្នុងប្រទេសអូស្ត្រាលី លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី២៥ មេសា នេះថា ការអនុវត្តបែបហ្នឹងសុទ្ធតែត្រូវបានពលរដ្ឋខ្មែរដឹងយ៉ាងច្បាស់ថា កំពុងបម្រើឱ្យសកម្មភាពនយោបាយខាងបក្សកាន់អំណាច ជាជាងការប្រកាន់ជំហរមូលដ្ឋានយុត្តិធម៌របស់ខ្លួន។
លោកបន្ថែមថា រាល់ការសម្រេចលើសំណុំរឿងដែលពាក់ព័ន្ធនឹងរឿងនយោបាយ តុលាការតែងតែអនុវត្តច្បាប់ស្ថិតក្រោមអំណាចនយោបាយ និងតាមបំណងអ្នកកាន់អំណាចកំពូលរហូតមក។
លោក ស៊ឹង សែនករុណ លើកឡើងថា ការចូលរួមក្នុងកិច្ចការសង្គមរបស់លោក រ៉ុង ឈុន កន្លងមក រួមទាំងករណីដែលរងនូវបណ្តឹងពីគណៈកម្មាធិការព្រំដែនក្នុងពេលនេះផង គឺសុទ្ធសឹងតែជាកិច្ចការដែលគាត់បានធ្វើដើម្បីជាតិខ្មែរទាំងអស់ មិនមែនដើម្បីប្រយោជន៍ផ្ទាល់ខ្លួន ឬដើម្បីប្រយោជន៍ក្រុមណាមួយឡើយ។
លោកបន្តថា រាជរដ្ឋាភិបាលគប្បីលើកទឹកចិត្ត និងផ្តល់ការគាំពារដល់រូបលោកក្នុងកិច្ចការទាំងនោះ។ ផ្ទុយទៅវិញ ការប្រើច្បាប់ចាប់បង្ខំរឹបអូសទ្រព្យសម្បត្តិរបស់លោកបែបនេះ គឺជាការបំផ្លាញនូវឧត្ដមគតិកូនខ្មែរលែងឱ្យហ៊ានចូលរួមចំណែកក្នុងកិច្ចការកសាងសង្គមជាតិទៅវិញប៉ុណ្ណោះ។
មន្ត្រីសង្គមស៊ីវិលរូបនេះបញ្ជាក់ថា លោកគ្មានជំនឿលើតុលាការសព្វថ្ងៃនេះទេ ប្រសិនបើតុលាការនេះមិនត្រូវបានផ្ដាច់ចេញពីការគ្រប់គ្រងពីអ្នកមានអំណាច និងបក្សនយោបាយដែលកំពុងគ្រប់គ្រងប្រទេសនោះ ហើយពលរដ្ឋខ្មែរគ្រប់រូបក៏នឹងបន្តរងនូវភាពអយុត្តិធម៌រហូតដែរនៅពេលតុលាការមួយនេះមិនឯករាជ្យនោះ។
សាលាដំបូងរាជធានីភ្នំពេញ បានចេញដីកាសម្រេចចាប់ផ្តើមការលក់ដោយបង្ខំ កាលពីថ្ងៃទី២៧ ខែមីនា ឆ្នាំ២០២៥ ដែលទើបនឹងត្រូវបានផ្សព្វផ្សាយកាលពីថ្ងៃទី២៤ ខែមេសា ឆ្នាំ២០២៥ នេះ ដោយសម្រេចរឹបអូសដីធ្លីរបស់លោក រ៉ុង ឈុន នៅភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដើម្បីលក់យកលុយសងទៅគណៈកម្មាធិការចម្រុះកិច្ចការព្រំដែន។
ដីកាដដែលនេះ បញ្ជាក់ថា កូនបំណុលដែលត្រូវអនុវត្តតាមខ្លឹមសារដីកានេះ មានកញ្ញា ស កណិការ លោក តុន និមល និងលោក រ៉ុង ឈុន ដែលអ្នកទាំងបីត្រូវបានតម្រូវឱ្យបង់សងលុយទៅគណៈកម្មាធិការចម្រុះកិច្ចការព្រំដែនចំនួន ៤០០លានរៀល ដែលស្មើនឹង ១០ម៉ឺនដុល្លារសហរដ្ឋអាមេរិក។
លោក រ៉ុង ឈុន ធ្លាប់បានបង់ប្រាក់សងជំងឺចិត្តទៅឱ្យគណៈកម្មាធិការចម្រុះកិច្ចការព្រំដែនដែលជាដើមបណ្ដឹងជាង ២០លានរៀលដែរ និងស្នើសុំតុលាការបង់សងតាមលទ្ធភាពរហូតគ្រប់ចំនួនទឹកប្រាក់ ៤០០លានរៀល ដែលតុលាការបានបង្គាប់នោះ ប៉ុន្តែតុលាការពុំមានការឆ្លើយតបចំពោះសំណើនេះឡើយ។
លោក រ៉ុង ឈុន និងសកម្មជន ២នាក់ទៀត គឺកញ្ញា ស កណិការ និងលោក តុន និមល ត្រូវតុលាការចោទពីបទ «ញុះញង់» ពាក់ព័ន្ធនឹងការអត្ថាធិប្បាយកាលពីឆ្នាំ២០២០ អំពីការបោះបង្គោលព្រំដែនកម្ពុជា-វៀតណាម ចូលដីស្រែពលរដ្ឋខ្មែរច្រើនគ្រួសារនៅខេត្តត្បូងឃ្មុំ។
ជុំវិញបញ្ហានេះ តំណាងរាស្ត្រគណបក្សសង្គ្រោះជាតិ លោក អ៊ុំ សំអាន លើកឡើងថា លោក រ៉ុង ឈុន ចុះទៅពិនិត្យមើលព្រំដែនដែលវៀតណាម រំលោភចូលដីខ្មែរ បែរជាជាប់គុក និងត្រូវបង់លុយសងជំងឺចិត្ត ឯលោក ហ៊ុន សែន កាត់ទឹកដី និងកោះខ្មែរឱ្យវៀតណាម បែរជារួចខ្លួនទៅវិញ៕
© 2025, ឌឹ ខេមបូឌា ដេលី. All rights reserved.