នៅប៉ុន្មានថ្ងៃទៀតនេះ អាចនឹងមានជំនួបត្រីភាគីរវាងប្រធានាធិបតីសហរដ្ឋអាមេរិក លោក ដូណាល់ ត្រាំ ប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីអ៊ុយក្រែន លោក វូឡូឌីមៀ ហ្សេឡេនស្គី។
លោក ត្រាំ បាននិយាយថា ការចរចាត្រីភាគីត្រូវតែនិយាយអំពីការធ្វើសម្បទានទឹកដីណាមួយទៅឱ្យរុស្ស៊ី តែលោក ត្រាំ មិនបានបង្ហើបពីដែនដីតំបន់ Donbas នៅភាគខាងកើតអ៊ុយក្រែន ទេ។
កាលពីជំនួបជាមួយលោក ហ្សេឡេនស្គី នៅសេតវិមាន លោក ត្រាំ បានលើកឡើងពីដែនដីគ្រីមៀរ ដែលធ្លាក់ក្នុងដៃរុស្ស៊ី តាំងពី ១២ឆ្នាំមុន តាមរយៈប្រធានាធិបតីអ៊ុយក្រែន មានឈ្មោះថា វ៉ិចទ័រយ៉ានុក កូវីច ដែលចុះហត្ថលេខាឱ្យដែនដីទៅរុស្ស៊ី ជាថ្នូរនឹងសន្តិភាព និងមិនឈ្លានពានអ៊ុយក្រែន។
លោក ត្រាំ ទទូចថា អ៊ុយក្រែន ត្រូវតែបោះបង់ចោលទៅដែនដីគ្រីមៀរ ព្រោះអ៊ុយក្រែន ខកខានមិនធ្វើសង្គ្រាមភ្លាមៗវាយយកដែនដីនេះពីរុស្ស៊ី នោះទេ ប៉ុន្តែលោក ពូទីន មិនបានលើកឡើងជាសាធារណៈអំពីដែនដីគ្រីមៀរ ទេ។ លោក ពូទីន និងក្រុមអ្នកនយោបាយវិមានក្រឹមឡាំង បានលើកឡើងតែតំបន់ Donbas ដោយទាមទារថា Donbas ត្រូវតែធ្លាក់ក្នុងដៃរុស្ស៊ី បើអ៊ុយក្រែន ចង់ឱ្យរុស្ស៊ី បញ្ចប់សង្គ្រាមប្រគល់សន្តិភាពវិញទៅឱ្យអ៊ុយក្រែន។
សម្រាប់ប្រជាជនអ៊ុយក្រែន ការលើកឡើងបែបនេះរបស់លោក ត្រាំ និងលោក ពូទីន កំពុងច្របូកច្របល់យ៉ាងខ្លាំងក្នុងអារម្មណ៍របស់អ្នកនយោបាយអ៊ុយក្រែន និងអ្នកធ្វើសេចក្ដីសម្រេចលើជោគវាសនានៃប្រទេសអ៊ុយក្រែន ជាពិសេសលោក ហ្សេឡេនស្គី ជាមេដឹកនាំតែមួយគត់ដែលប្រជាជនអ៊ុយក្រែន ចាត់ទុកជាមេដឹកនាំមិនសន្តិភាពនិយមជ្រុលរហូតកាត់ទឹកដីឱ្យរុស្ស៊ី ដូចនឹងអតីតប្រធានាធិបតីអ៊ុយក្រែន លោក វ៉ិចទ័រយ៉ានុក កូវីច នោះទេ។
នេះជាប្រធានបទក្ដៅគគុកនៅក្នុងជួររដ្ឋាភិបាលលោក ហ្សេឡេនស្គី និងសមាជិកសភាអ៊ុយក្រែន ដែលពួកគាត់សុទ្ធតែជាអ្នកកំណត់ជោគវាសនាលើដែនដី Donbas និងតំបន់គ្រីមៀរ ជាពិសេសដែនដីតំបន់ Donbas។
មានការចោទជាសំណួរថា តើទឹកដីណានឹងត្រូវបានដោះដូរ? តើមានន័យថាអ៊ុយក្រែន ត្រូវយល់ព្រមប្រគល់ឱ្យរុស្ស៊ី នូវផ្នែកមួយនៃទឹកដីរបស់ខ្លួនថែមទៀត ជាថ្នូរនឹងសន្តិភាពមែនឬ?
ប្រភពព័ត៌មានខ្លះថាលោក ត្រាំ បានដាក់សម្ពាធលើលោក ហ្សេឡេនស្គី ច្រើនលើកហើយឲ្យព្រមទទួលស្គាល់ការបាត់បង់តំបន់ភាគខាងកើតអ៊ុយក្រែន ទាំងមូល រួមទាំងតំបន់ Donetsk និង Luhansk ជាផ្នែកមួយនៃការដោះដូរទៅឱ្យរុស្ស៊ី ដែលនឹងធ្វើឲ្យខ្សែបន្ទាត់សមរភូមិដែលនៅសល់ត្រូវបានបញ្ឈប់។
សំណើនេះត្រូវបានគេបញ្ជាក់ថា មានការចូលរួមជំរុញពីលោក ពូទីន ប្រធានាធិបតីរុស្ស៊ី នៅកិច្ចប្រជុំកំពូលក្នុងរដ្ឋអាឡាស្កា កាលពីថ្ងៃទី១៥ សីហា។
តំបន់ Donbas ដែលស្ថិតនៅភាគខាងកើតអ៊ុយក្រែន មានខេត្តចំនួន២ ចំណុះឱ្យដែនដីដ៏ធំមួយនេះ មានផ្ទៃដី ៥ម៉ឺន ៣ពាន់គីឡូម៉ែត្រក្រឡា។ តំបន់ Donbas ត្រូវបានគេទទួលស្គាល់ថាសម្បូរទៅដោយរ៉ែ និងឧស្សាហកម្មធនធានរ៉ែ។
ខេត្ត Luhansk ស្ថិតនៅក្រោមការគ្រប់គ្រងរបស់រុស្ស៊ី ស្ទើរតែទាំងស្រុង ខណៈដែលអ៊ុយក្រែន ត្រូវបានគេប៉ាន់ប្រមាណថាបានកាន់កាប់ប្រហែល ៣០% នៃតំបន់ Donetsk រួមទាំងទីក្រុងសំខាន់ៗ និងបន្ទាយជាច្រើនដែលត្រូវបានការពារយ៉ាងស្វិតស្វាញដោយកងទ័ពអ៊ុយក្រែន។
អ្នកប្រវត្តិសាស្ត្រអ៊ុយក្រែន លោក Yaroslav Hrytsak បានព្រមានថា ការប្រគល់តំបន់ទាំងពីរ គឺតំបន់គ្រីមៀរ និងតំបន់ដុនបាស ទៅឲ្យរុស្ស៊ី នឹងក្លាយជាសោកនាដកម្មដ៏ធំជាលើកទីពីរសម្រាប់ប្រជាជនអ៊ុយក្រែន ជាពិសេសតំបន់ Donbas។
លោក Yaroslav Hrytsak បានបញ្ជាក់ថា នេះជាទឹកដីអ៊ុយក្រែន ហើយប្រជាជននៅតំបន់ Donbas មានជំនាញខ្លាំងក្នុងការជីករករ៉ែ ព្រោះ Donbas សម្បូរទៅដោយរ៉ែសំខាន់។ ប្រជាជនមានតួនាទីយ៉ាងសំខាន់ក្នុងការបង្កើត និងពង្រឹងអត្តសញ្ញាណជាតិរបស់អ៊ុយក្រែន តាមរយៈតំបន់ Donbas។
តំបន់នេះក៏បានបង្កើតអ្នកនយោបាយ កវី និងអ្នកប្រឆាំងល្បីៗផងដែរ។ អ្នកប្រវត្តិសាស្ត្រអ៊ុយក្រែន រូបនេះថែមទាំងព្រមានថា ជនភៀសខ្លួនរាប់លាននាក់ នឹងមិនអាចត្រឡប់ទៅផ្ទះវិញបាន ប្រសិនបើតំបន់ Donbas ត្រូវបានបញ្ចូលទៅក្នុងដែនដីរបស់រុស្ស៊ី។
តាំងពីឆ្នាំ២០១៤ មក Donbas មានប្រជាជនអ៊ុយក្រែន ជាង ១លាន ៥សែននាក់បានភៀសខ្លួនចេញពីតំបន់ Donbas ខណៈដែលជាង ៣លាននាក់រស់នៅក្រោមការគ្រប់គ្រងដោយកងទ័ពរុស្ស៊ី និងប្រហែល ៣០ម៉ឺននាក់ រស់នៅក្នុងតំបន់ដែលកងទ័ពអ៊ុយក្រែន នៅតែបន្តកាន់កាប់។
នៅតំបន់ជិតសមរភូមិជួរមុខ ជីវិតប្រជាជនពោរពេញទៅដោយគ្រោះថ្នាក់។ Andriy Borylo បព្វជិតអាយុ ៥៥ឆ្នាំនៅទីក្រុង Sloviansk បាននិយាយថា គ្រាប់ផ្លោងបានធ្លាក់ក្បែរផ្ទះគាត់។ គាត់ប្រាប់ថា អារម្មណ៍របស់មនុស្សនៅទីនោះពោរពេញដោយការខកចិត្ត និងអស់ក្តីសង្ឃឹម ហើយមិនដឹងថានរណានឹងការពារពួកគេទៀតនោះទេ បើស្រុកកំណើតរបស់ពួកគាត់ត្រូវធ្លាក់ក្នុងដៃរុស្ស៊ី។
លោក Borylo បន្ថែមថា លោកសូមថ្កោលទោសលោក ត្រាំ ជាងលោក ហ្សេឡេនស្គី ព្រោះការសម្រេចចិត្តនេះ វានឹងប៉ះពាល់ដល់ជីវិត និងទឹកដីអ៊ុយក្រែន។
ក្នុងនាមជាថ្នាក់ដឹកនាំ លោក ហ្សេឡេនស្គី បានលើកឡើងជារឿយៗថា អ៊ុយក្រែននឹងមិនប្រគល់តំបន់ Donbas ឬតំបន់ណាមួយជាថ្នូរនឹងសន្តិភាពឡើយ។
ក៏ប៉ុន្តែ គេជឿថាកិច្ចព្រមព្រៀងបែបនេះមានកម្រិតទាបបំផុតដែលថារុស្ស៊ី នឹងគោរព ព្រោះរុស្ស៊ី អាចយកដីដែលស្ថាបនាជាមូលដ្ឋានកងទ័ពឈរជើង ហើយនឹងចូលរួមបើកការវាយប្រហារជាថ្មីទៀត។ នេះហើយជាមូលហេតុដែលប្រជាជនអ៊ុយក្រែន ប្រហែល ៧៥% ជំទាស់នឹងការបោះបង់ដីជាផ្លូវការ។ នេះបើតាមការស្ទង់មតិ។
ទោះជាយ៉ាងណា អ៊ុយក្រែនក៏មានភាពនឿយហត់ខ្លាំងចំពោះសង្គ្រាម ដែលទាហាន និងប្រជាជនស៊ីវិលរាប់សែននាក់បានស្លាប់ និងរងរបួស ចាប់តាំងពីការឈ្លានពានពេញលេញរបស់រុស្ស៊ី។
អ្នកសង្គ្រោះបន្ទាន់ Yevhen Tkachov អាយុ ៥៦ឆ្នាំ រត់ចេញពីទីក្រុង Kramatorsk បាននិយាយថា គាត់មិនអាចវាស់សង្គ្រាមនេះដោយគីឡូម៉ែត្រទេ តែជីវិតមនុស្សអាចវាស់បានរៀងរាល់ថ្ងៃ។ គាត់មិនត្រៀមខ្លួនក្នុងការទទួលយកការបាត់បង់ជីវិតរាប់ម៉ឺនក្នុងទំហំដីរាប់ពាន់គីឡូម៉ែត្រការ៉េឡើយ ព្រោះសម្រាប់គាត់ ជីវិតមានតម្លៃជាងទឹកដី។
សមាជិកសភាលោក Volodymyr Ariev មកពីគណបក្សសាមគ្គីភាពអឺរ៉ុប បាននិយាយថា ប្រធានាធិបតី ហ្សេឡេនស្គី កំពុងដើរនៅក្នុងផ្លូវបំបែកដែលគ្មានជម្រើសល្អណាមួយនៅពីមុខលោកសម្រាប់ការជ្រើសរើសបានទៀតនោះទេ។
លោក Ariev បាននិយាយថា អ៊ុយក្រែនមិនមានកម្លាំងគ្រប់គ្រាន់ដើម្បីបន្តសង្គ្រាមក្នុងរយៈពេលដែលគ្មានកំណត់។ ទោះយ៉ាងណា ប្រសិនបើប្រធានាធិបតី ហ្សេឡេនស្គី យល់ព្រមប្រគល់តំបន់ Donbas ទៅឱ្យរុស្ស៊ី វាមិនត្រឹមតែជាការបំពានលើរដ្ឋធម្មនុញ្ញអ៊ុយក្រែន ប៉ុណ្ណោះទេ ប៉ុន្តែក្លាយជាជនក្បត់ជាតិដ៏ធ្ងន់ធ្ងរ៕
© 2025, ឌឹ ខេមបូឌា ដេលី. All rights reserved.