ក្រសួងការពារជាតិកម្ពុជា អះអាងថា នៅថ្ងៃទី១៥ ធ្នូ នេះ យោធាថៃ បានវាយប្រហារលើទឹកដីកម្ពុជា ចំនួន ១៥ដង ក្នុងរយៈពេល ១០ម៉ោង គិតចាប់ពីម៉ោង ៤ និង ៣០នាទី ដល់ម៉ោង ២ និង ៤២នាទី ក្នុងនោះ ទាហានថៃ ក៏បានទម្លាក់គ្រាប់បែកពីយន្តហោះ F-16 ចូលជ្រៅក្នុងទឹកដីកម្ពុជា ចម្ងាយ ៧០គីឡូម៉ែត្រក្បែរជំរំជនភៀសសឹកផងដែរ។
ក្រៅពីនោះ ចាប់តាំងពីម៉ោង ៤ និង ៣០នាទីទៀបភ្លឺ ដល់ម៉ោង ២ និង ៤២នាទី នៅថ្ងៃទី១៥ ធ្នូ នេះ កងកម្លាំងយោធាថៃ បានបន្តការបាញ់ប្រហារមកលើកងកម្លាំងខ្មែរចំនួន ១៥លើក នៅភូមិសាស្ត្រអូរស្មាច់ ប្រាសាទខ្នារ ជប់អង្គញ់ ប្រាសាទតាមាន់ធំ ថ្មដូន ប្រាសាទតាក្របី ប្រាសាទព្រះវិហារ ក្នុងខេត្តព្រះវិហារ និងក្រុងសំរោង ដែលជាតំបន់ប្រជាពលរដ្ឋស៊ីវិលក្នុងខេត្តឧត្ដរមានជ័យ ផងដែរ។
ជាងនេះទៀត យោធាថៃ ក៏បានវាយប្រហារមកលើតំបន់ជាច្រើនផ្សេងទៀតដែរ ដូចជា ភូមិព្រៃចាន់ ភូមិជោគជ័យ ច្រកបឹងត្រកួន និងស្រុកព្រះនេត្រព្រះ ខេត្តបន្ទាយមានជ័យ រួមទាំងឃុំថ្មដា ស្រុកវាលវែង ខេត្តពោធិ៍សាត់ ថែមទៀត។
ក្រសួងការពារជាតិ បញ្ជាក់ថា ចំពោះស្ថានការណ៍នៅក្នុងភូមិសាស្ត្រផ្សេងទៀតមានសភាពស្ងប់ស្ងាត់ ប៉ុន្តែកងកម្លាំងកម្ពុជា បន្តតាមដានយ៉ាងយកចិត្តទុកដាក់ និងប្រុងប្រយ័ត្នខ្ពស់ជានិច្ច ក្នុងស្មារតីតស៊ូប្រយុទ្ធយ៉ាងស្វិតស្វាញតតាំងជាមួយសត្រូវឈ្លានពាននៅគ្រប់សមរភូមិទាំងអស់ ដើម្បីការពារបូរណភាពទឹកដីរបស់កម្ពុជា។
នៅថ្ងៃដដែល សារព័ត៌មានថៃ បានផ្សព្វផ្សាយថាកងទ័ពជើងគោកថៃ បានរឹបអូសគ្រាប់មីស៊ីលកម្ទេចរថក្រោះប្រភេទ GAM-102LR ជាច្រើនគ្រាប់ បោះបង់ចោលក្នុងសមរភូមិអានសេះ ឬភ្នំ៥០០។ គ្រាប់ប្រភេទនេះ បាញ់បានចម្ងាយប្រមាណ ១០គីឡូម៉ែត្រ អាចទាញតម្រង់សំដៅរថក្រោះ ផលិតដោយក្រុមហ៊ុនចិន Poly Tech ទើបនឹងចេញដាក់ផ្សាយលក់នៅឯពិព័រណ៍តាំងអាវុធយុទ្ធភណ្ឌនៅទីក្រុងគែរ៍ ប្រទេសអេហ្ស៊ីបកាលពីដើមខែធ្នូ នេះ មួយគ្រាប់ថ្លៃ ១សែន ១ម៉ឺន ២ពាន់ដុល្លារ។
ក្រុមស៊ើបការណ៍ថៃ កំពុងស្រាវជ្រាវចង់ដឹងថា ហេតុអ្វីអាវុធទំនើបនេះធ្លាក់ដល់ដៃកងទ័ពខ្មែរលឿនម្ល៉េះ។
ការអះអាងនេះ ធ្វើឡើងស្របពេលដែលសង្គ្រាមកម្ពុជា-ថៃ បានឈានចូលដល់ថ្ងៃទី៩ ហើយ គិតត្រឹមថ្ងៃទី១៥ ធ្នូ នេះ ខណៈអន្តរជាតិជំរុញឱ្យប្រទេសទាំងពីរវិលទៅរកតុចរចាដើម្បីបញ្ចប់ជម្លោះនេះ។
អ្នកនាំពាក្យក្រសួងការបរទេសចិន លោក Guo Jiakun បានសរសេរលើបណ្ដាញទំនាក់ទំនងសង្គមហ្វេសប៊ុករបស់ខ្លួននៅថ្ងៃទី១៥ ខែធ្នូ នេះថា ប្រទេសចិន សង្ឃឹមថាកម្ពុជា និងថៃ នឹងអនុវត្តការអត់ធ្មត់ជាអតិបរមា ដោយចាត់វិធានការទាំងអស់ដែលអំណោយផលដល់ការបញ្ឈប់ការប្រយុទ្ធគ្នា និងកាត់បន្ថយភាពតានតឹងឱ្យបានឆាប់តាមដែលអាចធ្វើទៅបាន។
លោក Guo Jiakun បញ្ជាក់ថា ប្រទេសចិន នឹងបន្តធ្វើឱ្យអស់ពីសមត្ថភាពដើម្បីនាំមកនូវបទឈប់បាញ់ និងការស្ដារសន្តិភាពរវាងប្រទេសទាំងពីរឡើងវិញ។
ជុំវិញបញ្ហានេះ កាលពីថ្ងៃទី១៣ ខែធ្នូ ឆ្នាំ២០២៥ សារព័ត៌មាន Wall Street Journal បានស្រង់សម្ដីប្រធានាធិបតីសហរដ្ឋអាមរិក លោក ដូណាល់ ត្រាំ ថា សហរដ្ឋអាមេរិកនឹងដំឡើងពន្ធគយសាជាថ្មីលើថៃ និងកម្ពុជា ប្រសិនបើប្រទេសទាំងពីរមិនព្រមបញ្ឈប់សង្គ្រាមទេនោះ។
លោក ដូណាល់ ត្រាំ អះអាងថា លោកបានប្រាប់មេដឹកនាំប្រទេសទាំងពីរហើយថា ប្រសិនបើពួកគេបន្តធ្វើសង្គ្រាម នោះអាមេរិកនឹងមិនត្រឹមតែបញ្ឈប់កិច្ចព្រមព្រៀងពាណិជ្ជកម្មដែលប្រទេសទាំងពីរមានជាមួយសហរដ្ឋអាមរិកប៉ុណ្ណោះទេ ថែមទាំងត្រូវដំឡើងពន្ធគយថែមទៀត។
យ៉ាងណាក៏ដោយ ប្រព័ន្ធផ្សព្វផ្សាយ Thai PBS បានស្រង់សម្ដីនាយសេនាធិការកងទ័ពជើងគោកថៃ លោក Chaiyapruek Duangpraphat កាលពីថ្ងៃទី១៤ ខែធ្នូ នេះថា គោលដៅបញ្ចប់របស់កងទ័ពថៃ គឺធានាឱ្យបានថា កម្ពុជានឹងលែងបង្កការគំរាមកំហែងដល់សន្តិសុខជាតិរបស់ថៃ ក្នុងរយៈពេលយូរតទៅមុខទៀត។
លោក Chaiyapruek Duangprapat បញ្ជាក់ថា ដើម្បីសម្រេចគោលដៅនេះ ប្រទេសថៃ ចាំបាច់ត្រូវបន្សាបសមត្ថភាពយោធារបស់កម្ពុជា ដូច្នេះថៃ ចាំបាច់ត្រូវតែបំផ្លាញសមត្ថភាពយោធារបស់កម្ពុជា ដោយកំណត់គោលដៅលើបរិក្ខារ និងហេដ្ឋារចនាសម្ព័ន្ធយោធារបស់កម្ពុជា ទាំងអស់៕
© 2025, ឌឹ ខេមបូឌា ដេលី. All rights reserved.