ប្រាសាទអង្គរវត្តក្នុងក្រុងសៀមរាបបានជាប់ចំណាត់ថ្នាក់កំពូលនៅក្នុងការស្ទង់មតិទេសចរណ៍មួយទៀតនៅសប្ដាហ៍នេះ ដោយជាប់ឈ្មោះជាតំបន់ទេសចរណ៍លេខ១របស់ពិភពលោកក្រោយពីទទួលបានពានរង្វាន់ជម្រើសទេសចរណ៍របស់គេហទំព័រ TripAvisorកាលពីថ្ងៃអង្គារ។ ប៉ុន្តែប្រាសាទដ៏ធំស្កឹមស្កៃមួយដែលកំពុងស្ថិតក្រោមការសាងសង់នៅក្នុងប្រទេសឥណ្ឌា កំពុងបង្កឲ្យមានការព្រួយបារម្ភជាថ្មីម្ដងទៀតថា តម្លៃប្រាសាទជានិមិត្តរូបរបស់កម្ពុជានឹងធ្លាក់ចុះ។
ពីរថ្ងៃមុនទទួលបានពានរង្វាន់កិត្តិយសរបស់គេហទំព័រ TripAvisor លោក ហ៊ុន ហាន ឯកអគ្គរាជទូតកម្ពុជាប្រចាំប្រទេសឥណ្ឌា បានទៅពិនិត្យមើលការដ្ឋានសាងសង់ប្រាសាទនៅក្នុងខេត្តប៊ីហា (Bihar) ហើយបានមានប្រសាសន៍ថា រដ្ឋាភិបាលរបស់លោកមានការព្រួយបារម្ភចំពោះគម្រោងសាងសង់ប្រាសាទដែលចម្លងតាមរចនាបថស្ទើរតែដូចទាំងស្រុងទៅនឹងប្រាសាទអង្គរវត្តដែលទទួលតំណែងជាសំណង់សាសនាធំបំផុតរបស់ពិភពលោក។
យោងតាមគេហទំព័រព័ត៌មាន India Today បានឲ្យដឹងថា លោក ហ៊ុន ហាន បានថ្លែងប្រាប់ក្រុមអ្នកយកព័ត៌មានថា “នេះគឺជាបញ្ហាដ៏រសើបសម្រាប់កម្ពុជា ហើយរដ្ឋាភិបាលរបស់យើងយកចិត្តទុកដាក់ណាស់ចំពោះការចុះផ្សាយរបស់ប្រព័ន្ធផ្សព្វផ្សាយអំពីការចម្លងរចនាបថអង្គរវត្ត”។
នៅពេលក្រុមហ៊ុនឯកជនមួយក្នុងខេត្តប៊ីហា ប្រកាសថា ខ្លួនមានបំណងសាងសង់ប្រាសាទមួយដែលចម្លងតាមរចនាបថដូចប្រាសាទអង្គវត្តទាំងស្រុងកាលពីឆ្នាំ២០១២ រដ្ឋាភិបាលកម្ពុជាបានបញ្ចេញប្រតិកម្មយ៉ាងខ្លាំងបណ្ដាលឲ្យឥណ្ឌា បង្ខំក្រុមស្ថាបត្យករឲ្យកែប្រែរចនាបថរបស់ពួកគេចេញ។
ប្លង់ដែលត្រូវបានកែប្រែ បង្ហាញពីប្រាសាទមួយដែលដូចគ្នានឹងប្រាសាទអង្គរវត្ត ប៉ុន្តែមានកម្ពស់១២០ម៉ែត្រ និងមានទីធ្លាធំទូលាយនៅខាងក្នុងដែលអាចផ្ទុកភ្ញៀវទេសចរបាន២០.០០០នាក់។
យោងតាមគេហទំព័រ India Today បានឲ្យដឹងទៀតថា លោក ហ៊ុន ហាន បានមានប្រសាសន៍ថា ប្លង់ថ្មីរបស់ប្រាសាទដែលការសាងសង់មិនទាន់បានចាប់ផ្ដើមនៅឡើយនេះ នៅតែដូចប្រាសាទរបស់កម្ពុជាពី៦០ទៅ៦៥ភាគរយ ដែលលោកមានប្រសាសន៍ថា “មិនអាចទទួលយកបាន”។
លោកបានមានប្រសាសន៍ទៀតថា “យើងនឹងលើកយកបញ្ហានេះទៅពិភាក្សាជាមួយក្រសួងកិច្ចការផ្ទៃក្នុងនៅក្នុងប្រទេសឥណ្ឌា”។
លោក ឌីណេស ប៉ាតណាអុីក (Dinesh Patnaik) បានមានប្រសាសន៍កាលពីម្សិលមិញថា រដ្ឋាភិបាលរបស់លោកនឹងពិនិត្យមើលការព្រួយបារម្ភរបស់កម្ពុជា។ លោកមានប្រសាសន៍ទៀតថា “យើងយល់ថា កម្ពុជារសើបណាស់ចំពោះបញ្ហានេះ ហើយយើងនឹងមិនអនុញ្ញាតអ្វីដែលបង្កឲ្យមានការមិនគោរពឡើយ។ យើងនឹងរង់ចាំមើលថា តើក្រុមហ៊ុនកំពុងសាងសង់អ្វី ប៉ុន្តែប្រសិនបើពួកគេនៅតែចម្លងរចនាបថ យើងនឹងបញ្ឈប់”៕ សុខុម