កាលពីម្សិលមិញ សាលាឧទ្ធរណ៍បានបន្ថយទោសជាប់ពន្ធនាគាររបស់អតីតអគ្គនាយករងក្រុមហ៊ុនអានកូគ្រុបនិងភរិយារបស់លោកមកត្រឹមបីឆ្នាំប៉ុណ្ណោះក្នុងម្នាក់។កាលពីខែធ្នូ សាលាដំបូងរាជធានីភ្នំពេញបានកាត់ទោសប្តីប្រពន្ធពីរនាក់នេះឲ្យជាប់ពន្ធនាគារក្នុងម្នាក់បួនឆ្នាំកន្លះពីបទលួចបន្លំប្រាក់ក្រុមហ៊ុនជិត៦០លានដុល្លារពីក្រុមហ៊ុនរបស់លោកកុកអានជាពាណិជ្ជករនិងជាសមាជិកព្រឹទ្ធសភាមកពីគណបក្សប្រជាជនកម្ពុជា។
ក្នុងពេលប្រកាសសាលក្រមលោក ប្លង់ សំណាង ចៅក្រមជំនុំជម្រះ បានមានប្រសាសន៍ថាលោកបានកាត់ទោសប្តីប្រពន្ធពីរនាក់េនះពីបទរំលោភលើសេចក្តីទុកចិត្តរវាងបុគ្គលនិងបុគ្គលដែលអាចឲ្យលោកចេញសាលដីកាផ្តន្ទាទោសជាប់ពន្ធនាគារដែលមានរយៈពេលខ្លីជាងទោសដែលសម្រេចដោយសាលាដំបូងរាជធានីភ្នំពេញបាន។
សាលាដំបូងរាជធានីភ្នំពេញបានកាត់ទោសអ្នកទាំងពីរពីបទរំលោភលើសេចក្តីទុកចិត្តដោយបុគ្គលម្នាក់ដែលជាអ្នកដឹកនាំស្ថាប័នស្របច្បាប់ណាមួយ ដូចជាសាជីវកម្មជាដើម។
លោកចៅក្រម សំណាងបានមានប្រសាសន៍ថា“តុលាការសម្រេចផ្តន្ទាទោសឈ្មោះ ហេងឈាងអាយុ៤២ឆ្នាំនិងឈ្មោះ ទេពកូលាបអាយុ៣៦ឆ្នាំ ឲ្យជាប់ពន្ធនាគារក្នុងម្នាក់បីឆ្នាំពីបទរំលោភលើសេចក្តីទុកចិត្ត…តុលាការបង្គាប់ឲ្យអ្នកទាំងពីរបង់ប្រាក់៥៨,៣៤លានដុល្លារ ហើយក៏បង្គាប់ឲ្យពួកគេសងជំងឺចិត្តចំនួន៥០.០០០ដុល្លារដល់លោក កុកអានដែលជាដើមចោទផងដែរ”។
លោកឈាងបានបដិសេធថាខ្លួនមិនបានលួចបន្លំប្រាក់នោះទេ ប៉ុន្តែបានសារភាពថា គណនេយ្យរបស់ក្រុមហ៊ុនពិតជាបាត់ប្រាក់ចំនួន៦៣០.០០០ដុល្លារមែន ពីព្រោះប្រពន្ធរបស់លោកកុកអានឈ្មោះសុខអុីមបានប្រាប់លោកឲ្យដកប្រាក់ទាំងនោះយកទៅសាងសង់ផ្ទះមួយខ្នងនៅក្នុងខណ្ឌទួលគោក។ លោកបានថ្លែងថា ការចោទប្រកាន់ពីការលួចបន្លំប្រាក់នេះគឺផ្អែកលើរបាយការណ៍សវនកម្មមិនសុក្រិដ្ធអំពីរបាយការណ៍ហិរញ្ញវត្ថុរបស់ក្រុមហ៊ុន អានកូគ្រុប។
លោកចៅក្រមសំណាង បានច្រានចោលការឆ្លើយការពារខ្លួនរបស់លោកឈាងថា “គ្រាន់តែជាការដោះសារ”ដោយបានមានប្រសាសន៍បន្ថែមថាអ្នកទាំងពីរ“មានកំហុសល្មមនឹង [ទទួលបានការផ្តន្ទាទោស] ពីបទរំលោភលើសេចក្តីទុកចិត្ត”។
ខណៈដែលតុលារការប្រកាសសាលក្រមសមាជិកគ្រួសារព្រមទាំងសិស្សានុសិស្ស និងសហសេវិកដែលមានចំនួនប្រមាណ២០០នាក់មកពីសាកលវិទ្យាល័យភ្នំពេញអន្តរជាតិដែលមានលោក ឈាងជាប្រធាននិងលោកស្រី កូលាប ជានាយិកាសាកលវិទ្យាល័យបាននាំគ្នាស្រែកសម្តែងការមិនពេញចិត្ត ហើយខ្លះថែមទាំងបានស្រែកថាការកាត់ក្តីនោះ គឺ“អយុត្តិធម៌ខ្លាំងណាស់”ទៀតផង។
លោកឈាងនិងលោកស្រីកូលាប បានមានប្រសាសន៍ទៅកាន់អ្នកយកពត៌មាន ខណៈពេលដែលពួកគាត់កំពុងត្រូវគេក្រៀកទៅកាន់រថយន្តនគរបាលដែលរង់ចាំនៅក្រៅតុលាការជាស្រេច។ លោកឈាងបានមានប្រសាសន៍ថា“ខ្ញុំបានដាក់ភស្តុតាងជូនតុលាការអស់ហើយប៉ុន្តែពួកគេប្រើល្បិចបង្ខូចអំណះអំណាងរបស់ខ្ញុំ ខ្ញុំមិនអាចទទួលយកបានទេ”។
លោកបានស្រែកឮៗថាខ្ញុំសូមអំពាវនាវទៅសម្តេច ហ៊ុនសែននិងលោកជំទាវ ប៊ុនរ៉ានីហ៊ុនសែន ព្រមទាំងព្រះមហាក្សត្រ សូមមេត្តារកយុត្តិធម៌ឲ្យខ្ញុំផង…ឧកញ៉ាកុកអានបានរួមគំនិតជាមួយមន្ត្រីតុលាការ ហើយសូមមេត្តាជួយស៊ើបអង្កេតរឿងនេះឡើងវិញផង”។ លោកឡុង តារាមេធាវីរបស់លោក កុក អានបានបដិសេធមិនធ្វើអត្ថាធិប្បាយទេ៕
ប្រែសម្រួលដោយហមសុផាណ្ណា