យោងតាមអង្គការសិទ្ធិមនុស្សមួយក្រុម ដែលបានលើកឡើងថា ខ្លួនបានទទួលព័ត៌មានពីសំណុំឯកសាររបស់រដ្ឋាភិបាលនោះ បានឲ្យដឹងថា កាលពីខែមុន រដ្ឋាភិបាលបានផ្តល់ដីសម្បទានទំហំសរុប២៣.០០០ហិកតាទៅឲ្យក្រុមហ៊ុនចំនួន៤ សម្រាប់ គម្រោងកសិឧស្សាហកម្មនិងតំបន់សេដ្ឋកិច្ចពិសេស។
ដីទំហំ៥០០ហិកតាបន្ថែមទៀត ដែលស្ថិតនៅក្នុងដែនជម្រកសត្វព្រៃមួយកន្លែងក៏ត្រូវបានប្រគល់ឲ្យក្រុមហ៊ុនសម្រាប់គម្រោងអេកូទេសចរណ៍ផងដែរ។
ការធ្វើសម្បទានទាំងនេះ គឺជាផ្នែកនៃការលក់ដីនិងព្រៃឈើរបស់ជាតិពីសំណាក់រដ្ឋាភិបាល ដែលបានធ្វើឲ្យដីប្រមាណ២,១លានហិកតាឥឡូវនេះស្ថិតក្រោមការគ្រប់គ្រងរបស់ក្រុមហ៊ុនកសិឧស្សហកម្មជាច្រើន ហើយក្រុមសកម្មជននិយាយថា ការផ្តល់ដីសម្បទាននេះធ្វើឲ្យកើតមានជម្លោះដីធ្លីរាប់រយករណី និងធ្វើឲ្យមានការកាប់បំផ្លាញព្រៃឈើកាន់តែខ្លាំងឡើងៗ។
លោក អូ៊ច ឡេង អ្នកសម្របសម្រួលគម្រោងកំណែទម្រង់ដីធ្លីនៅមជ្ឈមណ្ឌលសិទ្ធិមនុស្សកម្ពុជា បានថ្លែងថាអនុក្រឹត្យដែលបានចេញផ្សាយក្នុងសៀវភៅរាជកិច្ចកាលពីសប្តាហ៍មុន បានបង្ហាញឲ្យឃើញថាក្រុមហ៊ុន China Freight Costs Cambodia Investment បានទទួលដីសម្បទានទំហំ៦.០០០ហិកតា ក្នុងស្រុករវៀង ខេត្តព្រះវិហារសម្រាប់ធ្វើចម្ការកៅស៊ូខណៈដែលក្រុមហ៊ុន Imperl Focus Cambodia ទទួលបានដីសម្បទានចម្ការកៅស៊ូទំហំ ៨.០០០ហិកតាក្នុងស្រុកសង្គមថ្មី។
លោកអ៊ូចឡេង បានមានប្រសាសន៍បន្ត
ថា ដីសម្បទានដែលបានអនុម័តផ្សេងទៀតរួមទាំងដីសម្បទានសម្រាប់ដាំអំពៅទំហំ៨.៧២៥ហិកតាដែលត្រូវបានផ្តល់ឲ្យក្រុមហ៊ុនស្ករស Taining Sugar Co. Ltd. ក្នុងស្រុកសម្បូរខេត្តក្រចេះ និងការប្រែក្លាយដីទំហំ៥០០ហិកតានៃដែនជម្រកសត្វព្រៃទំហំ៤៧.០០០ហិកតានៅភ្នំណាំលៀក្នុងខេត្តមណ្ឌលគីរីឲ្យទៅជាតំបន់អេកូទេសចរណ៍។
លោកបានលើកឡើងទៀតថា ក្រុមហ៊ុន Attwood Investment Group Co. Ltd. ក៏បានទទួលអាជ្ញាប័ណ្ណដើម្បីបង្កើតតំបន់សេដ្ឋកិច្ចពិសេសមួយទំហំ១៧២ហិកតា នៅក្នុងស្រុកស្ទឹងហាវ ខេត្តព្រះសីហនុផងដែរ។
យោងតាមគេហទំព័ររបស់ក្រុមហ៊ុននេះបង្ហាញថាក្រុមហ៊ុនកំពុងសាងសង់កំពង់ផែសមុទ្រអន្តរជាតិនិងតំបន់សេដ្ឋកិច្ចពិសេសមួយទំហំ១.០០០ហិកតា នៅចម្ងាយប្រមាណ៨គីឡូម៉ែត្រពីកំពង់ផែខេត្តព្រះសីហនុ
ហើយទន្ទឹមនឹងនេះក្រុមហ៊ុននេះក៏មានសិទ្ធិដំណើរការរោងចក្រថាមពលមួយកម្លាំង៩០មេហ្គាវ៉ាត់ នៅក្នុងតំបន់នេះផងដែរ។
យោងតាមគេហទំព័ររបស់ក្រុមហ៊ុននេះបានឲ្យដឹងថា ក្រុមហ៊ុននេះគឺជាក្រុមហ៊ុនមួយក្នុងចំណោមក្រុមហ៊ុននានារបស់
លោកស្រីលឹមឈីវហូ និងជាក្រុមហ៊ុនលក់និងចែកចាយស្រានិងស្រាបៀរមួយធំបំផុតនៅក្នុងប្រទេសកម្ពុជាមានដូចជាស្រា Hennessy ស្រា Johnnie Walker និងស្រាបៀរ Heineken ជាដើម។
មន្ត្រីថ្នាក់ខេត្តបានស្វាគមន៍ចំពោះការផ្តល់ដីសម្បទានថ្មីនេះ នៅក្នុងខេត្តរបស់ខ្លួនដោយចាត់ទុកការផ្តល់ដីសម្បទានទាំងនេះថាជាការជួយធ្វើឲ្យសេដ្ឋកិច្ចនៅក្នុងខេត្តនេះរីកចម្រើន ហើយបាននិយាយសម្រាលដល់ផលប៉ះពាល់ដែលអាចមានទៅលើបរិស្ថាននិងសង្គម។
លោក ស ចំរុងអភិបាលរងខេត្តក្រចេះបានមានប្រសាសន៍ថា “យើងមិនព្រួយបារម្ភពីការបាត់បង់ព្រៃឈើនោះទេពីព្រោះដីសម្បទានដែលបានផ្តល់ទៅឲ្យក្រុមហ៊ុនឯកជន ធ្វើឲ្យសេដ្ឋកិច្ចរីកចម្រើន និងបង្កើតការងារជាច្រើនទៀតសម្រាប់ប្រជាជនមូលដ្ឋាន”។
ក្រុមការងារសិទ្ធិមនុស្សបាននិយាយជាយូរមកហើយថារដ្ឋាភិបាល បានធ្វើការសិក្សាតិចតួចណាស់ពីផលប៉ះពាល់នៃដីសម្បទានទៅលើព្រៃឈើនិងដីកសិកម្មរបស់សហគមន៍ជនបទ ដែលជារឿយៗត្រួតលើគ្នាជាមួយដីសម្បទានរបស់ក្រុមហ៊ុន។
កាលពីឆ្នាំមុនរដ្ឋាភិបាលបានអនុម័តដីសម្បទានជាច្រើន ហើយបានផ្តល់ដីប្រមាណ៣៥០.000ហិកតានៅក្នុងព្រៃការពារ៕
ប្រែសម្រួលដោយស៊ាស៊ុយឈាង