កាលពីថ្ងៃសុក្រ អង្គការក្រៅរដ្ឋាភិបាលមួយក្រុមបានស្នើឲ្យប្រទេសអូស្ត្រាលី និងធនាគារអភិវឌ្ឍន៍អាស៊ី ហៅកាត់ថា ADB ផ្អាកការងារ និងការផ្តល់មូលនិធិសម្រាប់គម្រោងជួសជុលប្រព័ន្ធផ្លូវដែកកម្ពុជា ដែលដឹកនាំដោយរដ្ឋាភិបាល ប្រសិនបើអាជ្ញាធរក្រុងប៉ោយប៉ែត អនុវត្តតាមសេចក្តីជូនដំណឹងអំពីផែនការបណ្តេញប្រជាពលរដ្ឋចំនួន២២ គ្រួសារ កាលពីសប្តាហ៍មុន។
សេចក្តីថ្លែងការណ៍មួយចុះហត្ថលេខាដោយអង្គការស្ពានទៅកាន់សន្តិភាពកម្ពុជាអង្គការក្រុមការងារពិសេសសិទ្ធិលំនៅដ្ឋាន សមាគមធាងត្នោត និងអង្គការលីកាដូ ក៏បានជំរុញឲ្យម្ចាស់ជំនួយទាំងពីរនេះ ស្នើសុំឲ្យរដ្ឋាភិបាលស៊ើបអង្កេតលើករណីប្រើអំពើហិង្សាកាលពីថ្ងៃសុក្រ ទៅលើប្រជាពលរដ្ឋដែលត្រូវបានបណ្តេញចេញរួចហើយដោយសារគម្រោងនេះ ហើយពេលនេះកំពុងរស់នៅកន្លែងតាំងលំនៅថ្មីមួយកន្លែងក្នុងរាជធានីភ្នំពេញ។ស្របពេលជាមួយគ្នានេះដែរ ប្រជាពលរដ្ឋនៅកន្លែងតាំងលំនៅថ្មីនោះ ក៏បានស្នើសុំឲ្យអាជ្ញាធរចាប់ខ្លួនអ្នកទទួលខុសត្រូវផងដែរ។
ធនាគារ ADB និងអង្គការ AusAid ដែលជាដៃគូផ្តល់ជំនួយបរទេសរបស់រដ្ឋាភិបាលនៃប្រទេសអូស្ត្រាលី ផ្តល់ប្រាក់ចំនួន១៤២លានដុល្លារដល់គម្រោងនេះ ហើយបានរងការរិះគន់យ៉ាងខ្លាំងពីបណ្តាអង្គការសិទ្ធិមនុស្ស។
អង្គការទាំងនេះបានលើកឡើងថា គម្រោងនេះបានធ្វើឲ្យប្រជាពលរដ្ឋដែលត្រូវបានបណ្តេញចេញ មានស្ថានភាពកាន់តែធ្ងន់ធ្ងរទៅៗនៅកន្លែងតាំងលំនៅថ្មីដែលគ្មានហេដ្ឋារចនាសម្ព័ន្ធត្រឹមត្រូវហើយនេះជាការរំលោភគោលនយោបាយគាំពារសុវត្ថិភាពរបស់ម្ចាស់ជំនួយទាំងពីរនេះ។
មន្ត្រីនៅស្ថានទូតអូស្ត្រាលី និងធនាគារ ADB មិនអាចទាក់ទងបានទេ កាលពីម្សិលមិញ។ អង្គការក្រៅរដ្ឋាភិបាលទាំងនេះបាននិយាយថា ប្រសិនបើរដ្ឋាភិបាលបណ្តេញប្រជាពលរដ្ឋនៅប៉ោយប៉ែត ម្ចាស់ជំនួយទាំងពីរនេះគួរតែ“ ផ្អាកការងារនេះជាបណ្តោះអាសន្ននិងផ្អាកការផ្ទេរមូលនិធិទៅឲ្យគម្រោងនេះ រហូតទាល់តែមានកិច្ចព្រមព្រៀងជាមួយរដ្ឋាភិបាលទាក់ទិននឹងការអនុវត្តតឹងរ៉ឹងចំពោះការគាំពារសុវត្ថិភាពដល់អ្នកតាំងលំនៅថ្មី និងសិទ្ធិមនុស្សជាមូលដ្ឋានសិន”។
អង្គការទាំងនេះបានស្នើឲ្យមានការលើកលែងចំពោះតែកិច្ចការ ឬមូលនិធិណាដែលបានជួយដោយផ្ទាល់ដល់ប្រជាពលរដ្ឋទាំងប៉ុន្មានគ្រួសារនេះប៉ុណ្ណោះ។ប្រជាពលរដ្ឋទាំងប៉ុន្មានគ្រួសារនេះបាននិយាយថា ខ្លួនបានទទួលសេចក្តីជូនដំណឹងអំពីការបណ្តេញចេញនេះមួយថ្ងៃមុនឱសានវាទថ្ងៃសុក្រសប្តាហ៍មុនប៉ុណ្ណោះ ហើយថាពាក្យបណ្តឹងរបស់ខ្លួនសុំឲ្យមានការផ្តល់សំណងនោះ មិនទាន់មានដំណោះស្រាយនៅឡើយទេ។អាជ្ញាធរមូលដ្ឋានបានច្រានចោលការអះអាងទាំងពីរនេះ។
កាលពីម្សិលមិញ លោក ង៉ោម៉េង ជ្រួនអភិបាលក្រុងប៉ោយប៉ែត បានប្រកាន់ជំហរតាមសេចក្តីជូនដំណឹងអំពីការបណ្តេញចេញនេះ។ លោកបានមានប្រសាសន៍ថា “ប្រសិនបើអ្នកភូមិទាំងនេះមិនគោរពតាមសេចក្តីជូនដំណឹងនេះទេ គណ:កម្មាធិការអន្តរក្រសួងទទួលបន្ទុកតាំងលំនៅថ្មីនឹងចាត់វិធានការតាមផ្លូវច្បាប់ដើម្បីរុះរើផ្ទះសម្បែងរបស់ពួកគេ”។
កាលពីម្សិលមិញនេះដែរ គ្រួសារនៅកន្លែងតាំងលំនៅថ្មី ក្នុងខណ្ឌពោធិ៍សែនជ័យ រាជធានីភ្នំពេញ បាននិយាយថា ពួកគាត់នឹងធ្វើញត្តិទៅធនាគារ ADB នៅថ្ងៃនេះ ដើម្បីសុំឲ្យជួយចេញថ្លៃព្យាបាលប្រជាពលរដ្ឋបីនាក់ ដែលតាមការចោទប្រកាន់ថា បានរងការវាយដំពីសំណាក់អ្នកភូមិមួយក្រុមតាមបញ្ជាពីលោកចាន់ស៊ីណារ៉ា មេភូមិត្រពាំងអញ្ចាញ៤កាលពីថ្ងៃសុក្រ។
ស្ត្រីម្នាក់ឈ្មោះ រស់បុប្ផា បាននិយាយជួសមុខឲ្យប្រជាពលរដ្ឋប្រហែល១៦០គ្រួសារនៅកន្លែងតាំងលំនៅថ្មីនេះថា
“យើងនឹងដាក់ពាក្យបណ្តឹងទៅធនាគារ ADB ដើម្បីស្នើសុំឲ្យធនាគារនេះទទួលខុសត្រូវចំពោះគម្រោងរបស់ខ្លួន ដែលពួកគេបានអះអាងថា នឹងធ្វើឲ្យស្ថានភាពរស់នៅរបស់អ្នកភូមិនៅកន្លែងតាំងលំនៅថ្មីនេះប្រសើរឡើង និងដើម្បីការពារសិទ្ធិរបស់យើង ដែលកំពុងរងការគាបសង្កត់ពីអាជ្ញាធរ និងមេភូមិរូបនេះ”៕ប្រែសម្រួលដោយ តែមសុខុម