រយ:ពេលប្រាំបួនខែ បន្ទាប់ពីក្រុមហ៊ុនស៊ូកាគូ ដែលគាំទ្រដោយក្រុមហ៊ុនចិន របស់លោកឡៅម៉េងឃិន សមាជិកព្រឹទ្ធសភាមកពីគណបក្សប្រជាជនកម្ពុជា បានបញ្ចុះបឋមសិលាសាងសង់គម្រោងអចលនទ្រព្យដ៏ចម្រូងចម្រាសរបស់លោកនៅលើដីអតីតបឹងកក់ក្នុងរាជធានីភ្នំពេញមក គម្រោងសាងសង់របស់ការដ្ឋាននេះទំនងជាបានផ្អាកទៅហើយ។
នៅទីបំផុតក្រុមហ៊ុនស៊ូកាគូ បានបញ្ចប់ការបូមខ្សាច់ជាច្រើនលានតោនចាក់ដើម្បីបំពេញបឹងនេះ កាលពីសប្តាហ៍មុន គឺប្រហែលបីឆ្នាំកន្លះ ក្រោយពីបានចាប់ផ្តើម និងក្រោយពីការបណ្តេញប្រជាពលរដ្ឋប្រមាណ៣.០០០គ្រួសារចេញ ដោយរំលោភច្បាប់ភូមិបាល។
នៅក្នុងការឆ្លើយតបដូចសព្វមួយដងមន្ត្រីក្នុងរាជធានីភ្នំពេញបាននិយាយកាលពីសប្តាហ៍មុនថាខ្លួនមិនដឹងអ្វីទេ អំពីជោគវាសនារបស់ដីបឹងដែលត្រូវបានចាក់បំពេញនេះឬក៏បដិសេធមិនព្រមនិយាយតែម្តង។
នៅលើវាលខ្សាច់ដ៏ធំល្វឹងល្វើយ មានតែត្រាក់ទ័រចតទុកចោលពីរគ្រឿងប៉ុណ្ណោះដោយគ្មានបន្សល់ទុកអ្វីទាំងអស់ ក្រៅតែការិយាល័យធ្វើការមួយកន្លែងរបស់ក្រុមហ៊ុននេះ ដែលគេទុកចោល អំឡុងពេលចុះទៅពិនិត្យមើលដល់ការដ្ឋានរបស់ក្រុមហ៊ុនស៊ូកាគូ កាលពីសប្តាហ៍មុន។
ពីមុន ធ្លាប់មានសកម្មភាពមមាញឹកខ្លាំងណាស់នៅពេលលោកឡៅម៉េងឃិន ចាប់ផ្តើមដាក់ម៉ាស៊ីនបុកគ្រឹះដ៏ធំមួយឲ្យដំណើរការនៅក្នុងការដ្ឋាននេះ កាលពីខែកក្កដាឆ្នាំមុន។នាពេលនោះ លោកកែបជុតិមា អភិបាលរាជធានីភ្នំពេញ និងភ្ញៀវរាប់សិបនាក់ទៀតបានត្រៀមខ្លួន ដើម្បីបង្ហាញផ្ទាំងប៉ាណូមួយបង្ហាញពីទស្សនវិស័យរបស់ខ្លួនសម្រាប់បឹងនេះនៅពេលអនាគត ដោយមានអគារកញ្ចក់ខ្ពស់ៗនិងភូមិគ្រឹះលម្អដោយដើមឈើដ៏ស្រស់ស្អាត និងប្រព័ន្ធលូទឹកខ្វាត់ខ្វែង។ព្រះសង្ឃក៏ត្រៀមប្រោះព្រំដល់គម្រោងអភិវឌ្ឍន៍តំបន់នេះដែរ។
តែទោះជាយ៉ាងណា ម៉ាស៊ីនបុកគ្រឹះដ៏ធំ ដែលលោក ឡៅម៉េងឃិន បានដាក់ឲ្យដំណើរការកាលពីឆ្នាំមុននោះ ត្រូវបានដកចេញបាត់ស្រមោលកាលពីសប្តាហ៍មុន។សន្តិសុខម្នាក់ ដែលកំពុងតែយាមតែម្នាក់ឯង បាននិយាយថាក្រុមមេការជនជាតិចិន បានដកកម្មកររបស់ខ្លួនចេញទាំងអស់ទៅហើយប្រហែលពីរខែមុនដោយលើកឡើងថា មានជម្លោះ។
យោងតាមអតីតនិយោជិតម្នាក់បាននិយាយថាប្រហែលពីរខែមុននេះដែរ ក្រុមហ៊ុនស៊ូកាគូ អឺដូស (Shukaku Erdos) ដែលជាដៃគូផ្លូវការក្នុងគម្រោងនេះ ជាមួយក្រុមហ៊ុនសាជីវកម្មវិនិយោគទុន អឺដូសហុងជុន (ErdosHongjun Investment Corperation) របស់ប្រទេសចិន បានបិទការិយាល័យលក់នៅក្នុងរាជធានីភ្នំពេញរបស់ខ្លួន។
អ្នកស្រីឆាយ ស៊ីណា អតីតនាយិកាផ្នែកលក់របស់ក្រុមហ៊ុននេះ បាននិយាយកាលពីសប្តាហ៍មុនថា“បុគ្គលិកទាំងអស់នៅផ្នែកលក់ឈប់អស់បាត់ទៅហើយ។ក្រុមហ៊ុនប្រាប់ពួកគេឲ្យលាឈប់ធ្វើការ”។ស្ត្រីរូបនេះបាននិយាយទៀតថា ថៅកែរបស់ខ្លួនមិនបានប្រាប់ពីមូលហេតុនាំឲ្យបិទការិយាល័យផ្នែកលក់នេះទេ។
លោកឡៅ វ៉ានកូនប្រុសរបស់លោកឡៅម៉េងឃិន និងជាអតីតអគ្គនាយកគម្រោងនេះ បានលើកឡើងកាលពីម្សិលមិញថាលោកបានចេញពីក្រុមហ៊ុននេះ កាលពីឆ្នាំទៅហើយ ពេលនេះលោកកំពុងតែបម្រើការងារឲ្យក្រុមហ៊ុនមួយផ្សេងទៀត។ពេលទាក់ទង ដើម្បីសុំការបំភ្លឺទាក់ទិននឹងរឿងនេះ មន្ត្រីខណ្ឌ និងសាលារាជធានី ក៏បានបដិសេធមិននិយាយអំពីជោគវាសនារបស់បឹងដែលទើបចាក់ខ្សាច់បំពេញរួចនេះដែរ។
លោកស្រី ចឺឆេងឡឹ (Ze Zhengle) នាយិកាផ្នែកកិច្ចការសេដ្ឋកិច្្ចរបស់ស្ថានទូតចិន បានមានប្រសាសន៍ថា លោកស្រីគ្មានព័ត៌មានស្តីពីស្ថានភាពបច្ចុប្បន្នរបស់ក្រុមហ៊ុនស៊ូកាគូអឺដូសឬថាតើប្រតិបត្តិការមួយចំនួនរបស់ក្រុមហ៊ុននេះបានបិទ ឬយ៉ាងណានោះទេ។
ក្រុមហ៊ុនអឺដូសនិងក្រុមហ៊ុនស៊ូកាគូបានចូលហ៊ុនគ្នាកាលពីចុងឆ្នាំ២០១០ ដោយក្រុមហ៊ុនចិនមួយនេះកាន់កាប់ភាគហ៊ុន៤៩ភាគរយនៅក្នុងក្រុមហ៊ុនសាជីវកម្មវិនិយោគទុនអឺដូសហុងជុនដែលទើបតែបង្កើតឡើងថ្មីនេះ។
ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងបឹងកក់នេះនៅរយ:ពេលពីរបីខែក្រោយពីនោះដោយចុះបញ្ជីទ្រព្យសកម្មរួមរបស់ក្រុមក្រុមហ៊ុនទាំងពីរនេះមានតម្លៃជិត២,២ពាន់លានដុល្លារ៕
ប្រែសម្រួលដោយ តែម សុខុម