ក្រុមហ៊ុនធានារ៉ាប់រងអាយុជីវិតកម្ពុជា ដែលជាក្រុមហ៊ុនស្ថិតនៅក្រោមការគ្រប់គ្រងរបស់រដ្ឋ បានបើកទ្វាររបស់ខ្លួនដើម្បីបម្រើអតិថិជន កាលពីម្សិលមិញ ហើយបានក្លាយជាក្រុមហ៊ុនធានារ៉ាប់រងដំបូងគេនៅកម្ពុជា ដែលផ្តល់គោលនយោបាយធានារ៉ាប់រងអាយុជីវិត។
លោក អិុន មាត្រា អគ្គនាយកក្រុមហ៊ុនធានារ៉ាប់រងអាយុជីវិតកម្ពុជា បានមានប្រសាសន៍ថា ក្រុមហ៊ុននេះនឹងផ្តល់គោលនយោបាយធានារ៉ាប់រងអាយុជីវិតក្នុងរយៈពេលកំណត់ និងរយៈពេលពេញមួយជីវិត ក្នុងតម្លៃចាប់ពី៥.០០០ដុល្លារឡើងទៅ។
លោកថ្លែងថា “ការបង្កើតក្រុមហ៊ុនផ្តល់គោលនយោបាយធានារ៉ាប់រងអាយុជីវិតនៅកម្ពុជាគឺជាការចូលរួមចំណែកក្នុងការអភិវឌ្ឍសេវាកម្មហិរញ្ញវត្ថុ ពោលគឺធ្វើយ៉ាងណាឲ្យមានភាពសម្បូរបែប តាមរយៈការបង្កើតគម្រោងវិនិយោគថ្មីៗ និងផែនការហិរញ្ញវត្ថុគ្រួសាររយៈពេលវែង ដើម្បីគ្រប់គ្រងហានិភ័យក្នុងពេលអនាគតរបស់គ្រួសារ”។
លោក ទី អាទិត្យ ជំនួយការប្រធានសមាគមធានារ៉ាប់រងទូទៅកម្ពុជា បានសម្តែងនូវការអបអរសាទរ ចំពោះគោលនយោបាយធានារ៉ាប់រងថ្មីនេះ ដែលជាដំណើរវិវឌ្ឍថ្មីមួយ សម្រាប់វិស័យធានារ៉ាប់រង ប៉ុន្តែលោកថ្លែងថា គោលនយោបាយធានារ៉ាប់រងនេះ អាចនឹងត្រូវការពេលវេលាខ្លះ ដើម្បីឲ្យប្រជាជនកម្ពុជាភាគច្រើនមានលទ្ធភាពចំណាយលើគោលនយោបាយធានារ៉ាប់រងបែបនេះ។ លោកថ្លែងថា “សេវាកម្មនេះ មានតែគ្រួសារមានប្រាក់ច្រើនប៉ុណ្ណោះទើបអាចប្រើប្រាស់បាន ព្រោះវាជាសេវាកម្មទំនើប ហើយពួកគេយល់ពីផលប្រយោជន៍របស់វា”។
ក្រុមហ៊ុនធានារ៉ាប់រងអាយុជីវិតកម្ពុជា មានភាគហ៊ុន៥១ភាគរយ ជារបស់រដ្ឋាភិបាល ចំណែកឯ៤៩ភាគរយទៀតជារបស់ក្រុមហ៊ុនឯកជននៅឥណ្ឌូណេស៊ី ថៃ និងហុងកុង៕
ប្រែសម្រួលដោយ កង សុធា