កាលពីម្សិលមិញសាច់ញាតិ និងអ្នកជិតខាង បានស្រែកច្រៀងស្រែកយំនិងស្រែកអង្វរនៅខាងក្រៅរបងក្រសួងយុត្តិធម៌ដើម្បីសំុឲ្យដោះលែងស្ត្រីចំនួន១៤នាក់និងបុរសម្នាក់ដែលត្រូវបានចាប់ខ្លួនកាលពីសប្តាហ៍មុនដោយសារការតវ៉ាប្រឆាំងនឹងគម្រោងអភិវឌ្ឍន៍អចលនទ្រព្យដ៏ចម្រូងចម្រាសមួយរបស់លោកឡៅម៉េងឃិនសមាជិកព្រឹទ្ធសភាមកពីគណបក្សប្រជាជនកម្ពុជា។
អង្គការក្រៅរដ្ឋាភិបាល បានអំពាវនាវឲ្យធនាគារពិភពលោករក្សាបង្កកសាច់ប្រាក់សម្រាប់គម្រោងក្នុងប្រទេសកម្ពុជាដោយមានការព្រួយបារម្ភ ចំពោះរបាយការណ៍ដែលផ្សព្វផ្សាយថាធនាគារពិភពលោកកំពុងតែរៀបចំឲ្យលើកលែងការបង្កកកាលពីឆ្នាំមុនដើម្បីប្រឆាំងនឹងការបណ្តេញប្រជាពលរដ្ឋរាប់ពាន់គ្រួសារ ចេញពីតំបន់បឹងកក់ដើម្បីបើកផ្លូវឲ្យគម្រោងអចលនទ្រព្យនេះ។
ស្ត្រី១៣នាក់ក្នុងចំណោមស្ត្រី ដែលជាប់ឃំុឃាំងនោះត្រូវបានតុលាការផ្តន្ទាទោសកាលពីថ្ងៃទី២៤ខែឧសភា ឲ្យជាប់ពន្ធនាគាររយៈពេលពីរឆ្នាំកន្លះពីបទចោទប្រកាន់មួយ ដែលក្រុមការពារសិទ្ធិមនុស្សហៅថា“ជាបទចោទប្រកាន់ប្រឌិត”ពាក់ព័ន្ធនឹងការតវ៉ាអហិង្សារបស់ពួកគេ ប្រឆាំងនឹងគម្រោងរបស់សមាជិកព្រឹទ្ធសភារូបនេះ។បុរសម្នាក់ និងស្ត្រីម្នាក់ទៀតត្រូវបានចាប់ខ្លួនដោយមិនបានកាត់ទោស ហើយកំពុងត្រូវឃំុបណ្តោះអាសន្ន។
ការចាប់ខ្លួននិងការផ្តន្ទាទោសទាំងនេះ បានធ្វើឲ្យមានការខឹងសម្បាពីសំណាក់ក្រុមអង្គការការពារសិទ្ធិមនុស្សជាតិនិងអន្តរជាតិក៏ដូចជាការតវ៉ាស្ទើរតែរាល់ថ្ងៃដោយលើកបដានិងអំពាវនាវឲ្យរដ្ឋាភិបាលដោះលែង “មនុស្ស១៥នាក់”មកវិញ។
កាលពីម្សិលមិញនៅខាងក្រៅក្រសួងយុត្តិធម៌ កូនប្រុស កូនស្រីរបស់ស្ត្រីជាប់ពន្ធនាគារ បានបិទរូបថតម្តាយរបស់ពួកគេនៅលើថ្ងាសហើយកាន់ផ្កាឈូកនៅក្នុងដៃទាំងសងខាង ព្រមទាំងស្រែកសុំឲ្យមានការដោះលែង។
កុមារពោសុគន្ធកញ្ញាអាយុ១១ឆ្នាំដែលម្តាយរបស់នាង គឺអ្នកស្រី តុលស្រីពៅក្នុងចំណោមស្ត្រីទាំង១៣នាក់ ដែលត្រូវបានតុលាការផ្ដន្ទាទោសឲ្យជាប់ពន្ធនាគារនោះបាននិយាយថា“ម៉ាក់របស់ខ្ញុំ គ្រាន់តែការពារផ្ទះរបស់យើងប៉ុណ្ណោះ។គាត់មិនបានលួច ឬប្លន់អ្នកណាម្នាក់ទេ គាត់គ្រាន់តែការពារផ្ទះឲ្យខ្ញុំរស់នៅប៉ុណ្ណោះ”។
នាងបន្តទៀតថា“ខ្ញុំសុំឲ្យតុលាការដោះលែងម៉ាក់របស់ខ្ញុំ។ខ្ញុំមិនចង់ឲ្យបងប្អូនខ្ញុំកំព្រាទេពីព្រោះគេនៅក្មេងណាស់។ខ្ញុំអាចទ្រាំបានតែបង ប្អូនខ្ញុំ ទ្រាំ មិនបានទេ”។ ស្វាមី និងឪពុកម្តាយស្ត្រីជាប់ពន្ធនាគារទាំងនោះ ក៏បានចូលរួមក្នុងការតវ៉ានេះដែរ។
អ្នកស្រីគិនទូចលុតជង្គង់លើថ្នល់កៅស៊ូដ៏ក្តៅ នៅខាងក្រៅរបងក្រសួងយុត្តិធម៌ ដោយមិនចេញស្តីអ្វីទាំងអស់ខណៈដែលមិត្តភក្តិពីរនាក់បានយកកន្ត្រៃកាត់សក់វែងពណ៌ខ្មៅរបស់គាត់មុនពេលកោរសក់របស់គាត់ដើម្បីជាសញ្ញានៃការបូជា ចំពោះកូនស្រីរបស់គាត់ គឺអ្នកស្រីទូចដាវីដែលកំពុងជាប់ពន្ធនាគារ។ អ្នកស្រី ទូច បាននិយាយ បន្ទាប់ពីកោរសក់ ថា“កូនពីរនាក់នៅផ្ទះយំរកម្ដាយខ្លួន។តើខ្ញុំត្រូវរងទុក្ខយូរប៉ុណ្ណាទៀត?”។
អ្នកស្រីបាននិយាយទៀតថា ដោយសារតែម្ដាយខ្លួនជាប់ពន្ធនាគារ ឪពុកត្រូវតស៊ូចិញ្ចឹមកូនដោយពឹងលើប្រាក់បន្តិចបន្តួច បានមកពីការរត់ម៉ូតូឌុប។ អ្នកស្រីបានបន្តថា“ខ្ញុំពុំមានប្រាក់គ្រប់គ្រាន់ ដើម្បីផ្គត់ផ្គង់ពួកគេទេហើយពេលនេះពួកគេមិនអាចទៅរៀនបានទេពួកគេឈឺ និងនឹកម្ដាយពេក”។
បន្ទាប់ពីប្រគល់សំណើជាផ្លូវការមួយឲ្យទៅបុគ្គលិកក្រសួង ដើម្បីសុំឲ្យមានការដោះលែងអ្នកជាប់ពន្ធនាគារទាំង១៥នាក់រួចមក ក្រុមអ្នកតវ៉ាទាំង១០០នាក់នោះបានដើរដង្ហែក្បួនឆ្ពោះទៅទីសក្ការបូជានៅមាត់ទន្លេដែលស្ថិតនៅតាមបណ្ដោយមហាវិថីព្រះសុធារសមុនពេលបំបែកគ្នាដោយសន្ដិវិធី។ជាច្រើនលើកច្រើនសារួចមកហើយ ដែលកម្លាំងនគរបាលបានប្រើកម្លាំងបំបែកក្រុមអ្នកតវ៉ាមកពីភូមិបឹងកក់កាលពីលើកមុនៗ ប៉ុន្តែកាលពីម្សិលមិញ ពួកគេបាននៅឆ្ងាយពីក្រុមអ្នកតវ៉ា។ កាលពីម្សិលមិញអង្គការសិទ្ធិមនុស្សក្នុងស្រុកបានចេញលិខិតចំហមួយផ្ញើទៅឲ្យលោក