ក្រសួងការបរទេសបានចេញសេចក្តីថ្លែងការណ៍មួយ ពណ៌នាលម្អិតអំពីជំនួបរបស់លោកហោណាំហុង នៅទីក្រុងវ៉ាស៊ីនតោនកាលពីថ្ងៃអង្គារ ជាមួយលោកស្រី ហ៊ីលឡារី គ្លីនតុន រដ្ឋមន្ត្រីក្រសួងការបរទេសអាមេរិក ប៉ុន្តែមិនបានលើកឡើងថា មេដឹកនាំទាំងពីរពិភាក្សាអំពីលោកសមរង្ស៊ី ប្រធានគណបក្សសម រង្ស៊ីនោះទេ។
នៅឯសន្និសីទកាសែតនៅទីក្រុងវា៉ស៊ីនតោន មួយថ្ងៃបន្ទាប់ពីជំនួបនេះ លោកស្រីវីកតូរីយ៉ា នូឡិន (Victoria Nuland) អ្នកនាំពាក្យក្រសួងការបរទេស បានមានប្រសាសន៍ថា លោកស្រី គ្លីនតុន បានមានប្រសាសន៍ទៅកាន់លោក ហោ ណាំហុង អំពីអ្នកប្រឆាំងខាងនយោបាយជាយូរមកហើយរបស់លោកនាយករដ្ឋមន្ត្រីហ៊ុនសែនដែលរស់នៅក្នុងការនិរទេសខ្លួន ដើម្បីគេចពីការផ្តន្ទាទោសឲ្យជាប់ពន្ធនាគារជាង១០ឆ្នាំ ពីបទប្រមាថគណបក្សប្រជាជនកម្ពុជា។
លោកស្រី នូឡិន បានមានប្រសាសន៍ថា “ បញ្ហារបស់លោក សមរង្ស៊ីពិតជាបានលើកឡើងមែន ហើយរដ្ឋមន្ត្រីក្រសួងការបរទេសរូបនេះបានលើកឡើងអំពីសារៈសំខាន់នៃការបោះឆ្នោតដោយសេរី យុត្តិធម៌និងមានតម្លាភាពក្នុងឆ្នាំ២០១៣ និងមានការចូលរួមត្រឹមត្រូវពីគ្រប់អ្នកនយោបាយទាំងអស់”។
លោកស្រី នូឡិនមិនបានលើកឡើងថាសហរដ្ឋអាមេរិកចង់ឲ្យរដ្ឋាភិបាលកម្ពុជាអនុញ្ញាតឲ្យលោក សមរង្ស៊ី វិលត្រឡប់មកប្រទេសកំណើតវិញ ដើម្បីចូលរួមក្នុងការបោះឆ្នោតនោះទេ ហើយលោកស្រីបានចាត់ទុកការលើកឡើងបែបនេះ ថាជាបញ្ហារបស់ប្រទេសកម្ពុជា។
ដូចសន្និសីទកាសែតនៅក្នុង ទីក្រុងវា៉ស៊ីនតោនដែរនោះ សេចក្តីថ្លែងការណ៍កាលពីថ្ងៃសុក្ររបស់ក្រសួងការបរទេស បានកត់សម្គាល់ថា លោកស្រីគ្លីនតុននិងលោកហោណាំហុង បានពិភាក្សាគ្នាអំពីអ្នកភូមិនៅរាជធានីភ្នំពេញចំនួន១៥នាក់ ដែលត្រូវបានបញ្ជូនទៅដាក់ពន្ធនាគារព្រៃសកាលពីខែមុន ដោយសារតវ៉ានឹងការបណេ្តញប្រជាជនចេញពីបឹងកក់ អំពីសេចក្តីព្រាងច្បាប់ស្តីពីអង្គការក្រៅរដ្ឋាភិបាល ដែលបានពន្យារពេល និងអំពីការត្រៀមលក្ខណៈរបស់កម្ពុជាក្នុងនាមជាអ្នករៀបចំវេទិកាតំបន់អាស៊ាននៅខែក្រោយនេះ។ ទោះជាយ៉ាងណា សេចក្តីថ្លែងការណ៍នេះមិនបានលើកឡើងអំពីលោក សម រង្ស៊ីអំពីគណបក្សប្រឆំាង ឬអំពីការបោះឆ្នោតជាតិនោះទេ។
លោក កុយ គួង អ្នកនាំពាក្យក្រសួងការបរទេស ដែលចេញសេចក្តីថ្លែងការណ៍នេះ មិនអាចទាក់ទងសុំការអត្ថាធិប្បាយបានទេ។ លោកនាយករដ្ឋមន្ត្រី ហ៊ុន សែន បានច្រានចោលជាសាធារណៈចំពោះការអំពាវសុំឲ្យមានការលើកលែងទោសលោក សម រង្ស៊ី ដើម្បីឲ្យលោកបានចូលរួមក្នុងការបោះឆ្នោត។
នៅក្នុងសេចក្តីថ្លែងការណ៍នេះ ក្រសួងការបរទេសបានលើកឡើងថា លោកហោណាំហុង ក៏បានស្នើឲ្យសហរដ្ឋអាមេរិកបន្តពិភាក្សាអំពីលទ្ធភាពលុបចោលបំណុល ដែលកម្ពុជាជំពាក់តាំងពីសម័យលោក លន់ នល់ ហើយបានលើកឡើងថា ក្នុងឋានៈជាប្រធានអាស៊ាន កម្ពុជានឹងមិនជាប់ពាក់ព័ន្ធនៅក្នុងជម្លោះរបស់ចិនជាមួយប្រទេសហ្វីលីពីនអំពីកោះនៅសមុទ្រចិនខាងត្បូងនោះទេ។
សេចក្តីថ្លែងការណ៍នេះបានលើកឡើងថាលោកស្រី គ្លីនតុន ក៏បានសម្តែងការគាំទ្រចំពោះសំណុំរឿង០០១ និង០០២នៅសាលាក្តីខ្មែរក្រហមផងដែរ។ សេចក្តីថ្លែងការណ៍នេះមិនបានលើកឡើងអំពីសំណុំរឿងផ្សេងទៀតទេ ព្រោះជាសំណុំរឿង ដែលគណបក្សប្រជាជនកម្ពុជាជំទាស់ជាដាច់ខាត៕
(រាយការណ៍បន្ថែមដោយ Zsombor Peter)
ប្រែសម្រួលដោយចេវប៊ុននី